სექტემბერი კინომოყვარულებისთვის საკმაოდ მრავალფეროვანი იქნება – ეკრანებზე ცნობილი მსახიობები ბრუნდებიან, წლების შემდეგ საკულტო ფილმის გაგრძელებას ვიხილავთ, მაყურებელს კი არაერთი ახალი, განსხვავებული ისტორია ელოდება.
გთავაზობთ ფილმებს, რომელთა ნახვაც სექტემბერში ნამდვილად ღირს:
Practical Magic 2
სექტემბრის ერთ-ერთი ყველაზე საინტერესო პრემიერა 1998 წლის პოპულარული ფილმის გაგრძელებაა. ნიკოლ კიდმანსა და სანდრა ბულოკს დების, ჯილიანისა და სალი ოუენსების როლებში წლების შემდეგ კვლავ ვიხილავთ.
ამჯერად მოვლენებში მათი შვილებიც ერთვებიან, ამიტომ მაყურებელს ახალი თავგადასავლები და საინტერესო ამბები ელოდება. ფილმში ასევე ჯოი კინგი და მეისი უილიამსი მონაწილეობენ.
„Practical Magic 2“ კინოთეატრებში 11 სექტემბერს გამოვა.
The Uprising
„The Uprising“ 1381 წელს, ინგლისში განვითარებულ მოვლენებზე მოგვითხრობს. მძიმე გადასახადები და სოციალური უთანასწორობა გლეხების უკმაყოფილებას იწვევს. მთავარი გმირი ღარიბი ფერმერია, რომელიც მხოლოდ საკუთარი ოჯახის დაცვაზე ფიქრობს, თუმცა ვითარების გამწვავების შემდეგ აჯანყებულებს უერთდება.
ფილმში მთავარ როლს ენდრიუ გარფილდი ასრულებს. „The Uprising“-ის პრემიერა 11 სექტემბერს შედგება.
Resident Evil
ცნობილი ვიდეოთამაშის ახალი კინოადაპტაცია სექტემბრის ერთ-ერთი მთავარი საშინელებათა ჟანრის ფილმია.
მთავარი გმირი ბრაიანი, სამედიცინო კურიერია, რომელსაც რაკუნ-სიტის საავადმყოფოში ორგანო მიაქვს. ქალაქში შესვლისას აღმოაჩენს, რომ ყველა უჩვეულოდ იქცევა – ადამიანები საშიშ, აგრესიულ არსებებად გარდაიქმნებიან.
ფილმის რეჟისორი ზაკ კრეგერია. მთავარ როლებს კი ოსტინ აბრამსი, პოლ უოლტერ ჰაუზერი, ზაკ ჩერი და კალი რეისი ასრულებენ.
Primetime
რობერტ პატინსონისთვის 2026 წელი დატვირთული აღმოჩნდა – სექტემბერში მსახიობს კიდევ ერთ განსხვავებულ როლში ვიხილავთ.
„Primetime“ რეალურ მოვლენებზე დაფუძნებული დრამაა, რომელიც ამერიკული სატელევიზიო შოუს „To Catch a Predator“-ის შესახებ გვიყვება. გადაცემის წამყვანი ჟურნალისტი კრის ჰანსენი ფარული ოპერაციების საშუალებით პედოფილიას ამხელს.
The Weight
თუ ისტორიული დრამები და დაძაბული სიუჟეტები გიყვართ, „The Weight“ სექტემბრის ერთ-ერთი საინტერესო არჩევანია.
ფილმის მოქმედება დიდი დეპრესიის პერიოდში, ორეგონში ვითარდება. ეთან ჰოუკი მარტოხელა მამას, სამუელ მერფის, განასახიერებს, რომელიც უსამართლოდ შრომით ბანაკში ხვდება – თუ სახლში დროულად არ დაბრუნდა, შესაძლოა შვილის მეურვეობის უფლება ჩამოერთვას.
ბანაკის სასტიკი ზედამხედველი, რომლის როლსაც რასელ ქროუ ასრულებს, მას თავისუფლებას ჰპირდება, თუმცა სანაცვლოდ სამუელსა და სხვა პატიმრებს მოპარული ოქროს ზოდების გადატანა მოუწევთ.
ფილმის რეჟისორი პადრაიკ მაკ-კინლია. ეთან ჰოუკთან და რასელ ქროუსთან ერთად ჯულია ჯონსი და ოსტინ ამელიო მონაწილეობენ.
Heart of the Beast
ფილმის სიუჟეტი თვითმფრინავის ჩამოვარდნის შემდეგ ვითარდება. ბრედ პიტის პერსონაჟი, სპეცრაზმის ყოფილი სამხედრო მოსამსახურე, ალასკის უკაცრიელ ტყეში აღმოჩნდება. მის წინაშე მხოლოდ ერთი მიზანია – გადარჩეს და ადამიანებით დასახლებულ ადგილამდე მიაღწიოს.
თუმცა ამ სახიფათო გზას მარტო არ გადის. მისი ერთადერთი თანამგზავრი სამხედრო ძაღლი ოდინია, რომელიც პატრონისთვის არა მხოლოდ ერთგული მეგობარი, არამედ გადარჩენის მთავარი იმედიც ხდება. გაყინულ ტყეში, სადაც საკვების, სითბოსა და უსაფრთხო ადგილის პოვნა თითქმის შეუძლებელია, მათი ურთიერთობა და ერთმანეთის დახმარების უნარი გადამწყვეტ მნიშვნელობას იძენს.
Knife: The Attempted Murder of Salman Rushdie
სექტემბრის ერთ-ერთი ყველაზე მნიშვნელოვანი ფილმი დოკუმენტური ნამუშევარია და ცნობილი მწერლის, სალმან რუშდის, ისტორიას ეხება.
2022 წლის 12 აგვისტოს რუშდი ნიუ-იორკის შტატში ლექციას ატარებდა, როდესაც სცენაზე უცნობი ადამიანი ავარდა და მწერალს დანით 15 ჭრილობა მიაყენა. რუშდი თავდასხმას გადაურჩა. მოგვიანებით ამ გამოცდილებაზე მემუარებიც დაწერა, რომლის მიხედვითაც რეჟისორმა ალექს გიბნიმ დოკუმენტური ფილმი გადაიღო.
ასევე დაგაინტერესებთ:
#OK! Variety-ის კრიტიკოსებმა 2025 წლის ყველაზე ცუდი ფილმები დაასახელეს
#OK! კრისტოფერ ნოლანის ფენომენი – თანამედროვე კინოს ერთ-ერთი ყველაზე გავლენიანი რეჟისორი
