23 სექტემბერს შემოდგომის ბუნიობაა – დღე, რომელიც წელიწადის სეზონების ცვლილებასთან ერთად სხვადასხვა ხალხურ ტრადიციასა და რწმენასაც უკავშირდება.
შემოდგომის ბუნიობა ასტრონომიული მოვლენაა, რომელიც წელიწადში ერთხელ, სექტემბერში ხდება. ამ დროს მზე დედამიწის ეკვატორის სიბრტყეს კვეთს და მისი სხივები ჩრდილოეთ და სამხრეთ ნახევარსფეროებს თანაბრად ანათებს. სწორედ ამიტომ ბუნიობის პერიოდში დღე და ღამე თითქმის თანაბარი ხანგრძლივობისაა.
დღეს ბუნიობას ძირითადად ასტრონომიული მოვლენის სახით აღვიქვამთ, თუმცა ეზოთერულ პრაქტიკებსა და ხალხურ რწმენებში მას კვლავ განსაკუთრებული მნიშვნელობა ენიჭება – ხშირად განიხილება როგორც ბალანსის, ძველის დასრულებისა და ახალი ეტაპისთვის მომზადების დრო.
რა უნდა გააკეთოთ?
დაალაგეთ სახლი და გათავისუფლდით არასაჭირო ნივთებისგან – ერთ-ერთი ყველაზე გავრცელებული რჩევაა. ნივთების გადაყრა, გაჩუქება ან გაყიდვა სიმბოლურად ძველის გაშვებასა და ახალი ეტაპისთვის ადგილის გათავისუფლებას უკავშირდება.
დაასრულეთ გადადებული საქმეები – ბუნიობას ხშირად უკავშირებენ იმ საქმეების დასრულებას, რომლებიც დიდი ხანია გადადებული გაქვთ.
დაუთმეთ დრო საკუთარ თავს – მშვიდი დღე, სეირნობა, წიგნის კითხვა, მედიტაცია ან უბრალოდ საკუთარ გეგმებზე ფიქრი ბევრისთვის შეიძლება პირადი რიტუალი გახდეს.
დაასრულეთ ის ურთიერთობები და ჩვევები, რომლებიც აღარ გჭირდებათ – ასტროლოგიურ პრაქტიკაში ბუნიობა ხშირად ახალი ბალანსის ძიებას უკავშირდება. ამისთვის პატარა ფურცელზე ჩამოწერეთ ყველაფერი, რის მოშორებასაც ცდილობთ – იქნება ეს მავნე ჩვევა, არასასურველი ურთიერთობა თუ წარსულთან დაკავშირებული განცდა. შემდეგ ფურცელი ხმამაღლა წაიკითხეთ, დაწვით და მისი ფერფლი ქარს გაატანეთ.
შეცვალეთ თქვენი ცხოვრება მადლიერების რიტუალით – შეგიძლიათ, რვეულში ჩამოწეროთ 21 ოცნება, შემდეგ კი 22 დეკემბრამდე, ყოველ საღამოს, 10 მიზეზი მიუთითოთ, რის გამოც იმ დღისთვის მადლიერი ხართ. მოგვიანებით კი ეს რიცხვი თანდათან გაზარდოთ.
ამ პრაქტიკის მიზანი ყურადღების იმაზე გადატანაა, რაც უკვე გვაქვს და რაც ჩვენს ყოველდღიურობას მნიშვნელობას სძენს. მიიჩნევენ, რომ მადლიერების გამოხატვა პოზიტიური ენერგიის გაძლიერებასა და ახალი შესაძლებლობებისთვის გზის გახსნას უწყობს ხელს.
წარმატების მოსაზიდი რიტუალი
სურვილის მიხედვით შეარჩიეთ სანთლის ფერი – მწვანე ფინანსური კეთილდღეობისთვის, წითელი სიყვარულისთვის, ხოლო ყვითელი ან იასამნისფერი ჰარმონიისთვის. სანთელზე შეგიძლიათ ფრთხილად ამოკაწროთ თქვენი სურვილი, შემდეგ აანთოთ და რამდენიმე წუთით მთლიანად მასზე კონცენტრირდეთ.
ფინანსური კეთილდღეობის რიტუალი
ფულის მოსაზიდად ერთ-ერთი გავრცელებული რიტუალი კარის ხალიჩის ქვეშ სამი მონეტის მოთავსებაა. მიიჩნევენ, რომ მონეტებზე ოჯახის ყველა წევრმა უნდა გადაიაროს, შემდეგ კი ისინი უსაფრთხო ადგილას უნდა შეინახოთ. მონეტის დანახვისას გაიმეორეთ: „ფული სახლში შემოდის, ბედნიერება მოაქვს“.
სიყვარულის მოსაზიდი რიტუალი
სიყვარულისა და ურთიერთობის ჰარმონიისთვის კიდევ ერთი რიტუალი ნამცხვრის მომზადებას უკავშირდება. ცომის მოზელისას ამბობენ: „ბედნიერება არ მტოვებს, სიყვარული არ ქრება“. ტრადიციის მიხედვით, ნამცხვარი მცირე ულუფებით უნდა მომზადდეს. პარტნიორისთვის კი ცალკე ულუფას ამზადებენ. მიიჩნევენ, რომ ამ რიტუალის მთავარი მიზანი ურთიერთობაში სითბოს, სიყვარულისა და ჰარმონიის გაძლიერებაა.
რა არ უნდა გააკეთოთ?
- ჩხუბი და დაპირისპირება – მიიჩნევენ, რომ ამ დღეს დაწყებული კონფლიქტის ნეგატიური ემოციები შესაძლოა დიდხანს გაგყვეთ. ამიტომ უმჯობესია, თავი შეიკავოთ კამათისა და ზედმეტი დაძაბულობისგან.
- ფულის სესხება – ხალხური რწმენების მიხედვით, ბუნიობის დღეს სხვისთვის ფულის მიცემამ ან თავად სესხის აღებამ შესაძლოა ფინანსურ სტაბილურობაზე უარყოფითად იმოქმედოს. ამიტომ, თუ აუცილებლობა არ არის, ფინანსური საკითხების გადადებას გირჩევენ.
- ახალი ბიზნესის დაწყება – ზოგიერთი ასტროლოგიური შეხედულების მიხედვით, ბუნიობის პერიოდში ადამიანები შესაძლოა უფრო ემოციურად იღებდნენ გადაწყვეტილებებს. ამიტომ, მნიშვნელოვანი პროექტის დაწყებას რამდენიმე დღით გადადებას და გეგმის კიდევ ერთხელ გადახედვას გვირჩევენ.
- საკვების გადაყრა – ერთ-ერთი გავრცელებული რწმენის თანახმად, ბუნიობის დღეს საკვების გაფლანგვას სახლში ფინანსური სირთულეების მოზიდვას უკავშირებენ. თუ საკვები დაგრჩათ, შეგიძლიათ ის შინაურ ცხოველებს ან ქუჩის ცხოველებს გაუნაწილოთ, იზრუნოთ ფრინველებზე და ამ გზით დღე კეთილი საქმით დაასრულოთ. ეზოთერული შეხედულებების მიხედვით, გაცემული სიკეთე ადამიანს აუცილებლად უბრუნდება.
