მოდელი და მსახიობი ჯენიფერ ენი ქანიე უესტს სექსუალურ ძალადობაში ადანაშაულებს. ამის შესახებ მან BBC-ის პოდკასტ Fame Under Fire-თან ინტერვიუში ისაუბრა და დეტალურად გაიხსენა 2010 წელს მომხდარი შემთხვევა.
მისი თქმით, ინციდენტი მუსიკალური ვიდეოს გადაღების დროს მოხდა. მოდელის მტკიცებით, არ იცოდა, რა სცენის შესრულება მოუწევდა და არანაირი წინასწარი მითითება არ მიუღია.
„უბრალოდ მითხრეს, რომ სკამზე დავმჯდარიყავი. შემდეგ გადაღება დაიწყო და მოულოდნელად ვერ მივხვდი, რა ხდებოდა,“ — იხსენებს მოდელი.
მისივე მტკიცებით, გადაღების დროს, ქანიემ ყელში ხელი მოუჭირა, შემდეგ კი თითები პირში ჩაუდო, რაც, ჯენიფერი თქმით, ორალური სექსის იმიტაციას წარმოადგენდა.
„არ ვიცოდი, რა ხდებოდა. შიშის, დაბნეულობისა და გაურკვევლობის განცდა მქონდა. იმედს ვიტოვებდი, რომ გადასაღები ჯგუფიდან ვინმე ჩაერეოდა და ყველაფერს შეაჩერებდა,“ — განაცხადა ენიმ.
საქმე ჯერ სასამართლოში არ განხილულა.
უესტის იურიდიულმა გუნდმა სარჩელის შეწყვეტა მოითხოვა. ისინი ამტკიცებენ, რომ აღნიშნული მოქმედებები მხატვრული წარმოდგენის ნაწილი იყო და შესაბამისად, დაცულია აშშ-ის კონსტიტუციის პირველი შესწორებით, რომელიც გამოხატვის თავისუფლებას ეხება. მათივე თქმით, უესტი იმ დროს ფილმის “American Psycho” ერთ-ერთი სცენის იმიტაციას ცდილობდა.
ამის საპასუხოდ, ენის ადვოკატებმა განაცხადეს, რომ მსგავსი არგუმენტის მიღება სახიფათო პრეცედენტს შექმნის.
„მხატვრული გამოხატვის თავისუფლება მნიშვნელოვანია, თუმცა ეს არ უნდა გახდეს უკანონო ქმედებების გამართლების საშუალება,“ — აცხადებენ იურისტები.
