სალმა ჰაიეკი 1966 წლის 2 სექტემბერს მექსიკის ვერაკრუსის შტატის ქალაქ კოაცაკოალკოსში დაიბადა. მისი მამა, სამუელ დომინგეს ხიმენესი, ლიბანური წარმოშობის იყო, დედა – დიანა ხიმენეს მედინა კი – ესპანური წარმოშობის ოპერის მომღერალი. ჰაიეკი შეძლებულ ოჯახში გაიზარდა და დაწყებითი განათლება კათოლიკურ სკოლაში მიიღო.
მსახიობობის სურვილი იმდენად ძლიერი იყო, რომ უნივერსიტეტი დატოვა და კამერის წინ საკუთარი შესაძლებლობების გამოცდა გადაწყვიტა. სწორედ ამ ნაბიჯმა შეცვალა მისი ცხოვრება – მექსიკაში დაწყებულმა სამსახიობო კარიერამ მალე ტელენოველამდე, შემდეგ კი ჰოლივუდამდე მიიყვანა.
სტატიაში სწორედ ჰაიეკის კარიერის ყველაზე გამორჩეულ და დასამახსოვრებელ როლებს გავიხსენებთ – პერსონაჟებს, რომლებმაც მისი სახელი მსოფლიო კინოს ისტორიაში ჩაწერა.
Teresa
1989 წელს გამოსულ ტელენოველაში „Teresa“ მან მთავარი როლი განასახიერა – ახალგაზრდა ქალი, რომელიც სიღარიბისგან თავის დაღწევას და უკეთესი ცხოვრების შექმნას ცდილობს.
ტერეზა კლასიკური „კარგი გოგოს“ ტიპის გმირი არ ყოფილა. ის ამბიციური, ჭკვიანი და მიზანდასახული ქალია, რომელიც საკუთარი სურვილების მისაღწევად რთულ გადაწყვეტილებებს იღებს.
სერიალის წარმატებამ მსახიობს მექსიკაში დიდი პოპულარობა მოუტანა.
Desperado
1995 წელს რობერტ როდრიგესის ფილმში მსახიობი ანტონიო ბანდერასის გვერდით გამოჩნდა და კაროლინას როლი შეასრულა – ქალი თავდაპირველად მშვიდი და შედარებით თავშეკავებული ჩანს, თუმცა სიუჟეტის განვითარებასთან ერთად მისი სიმტკიცე და დამოუკიდებლობა უფრო აშკარა ხდება.
სწორედ ამ ნამუშევრით გაიცნო იგი ჰოლივუდმა და საერთაშორისო აუდიტორიამ.
From Dusk Till Dawn
„From Dusk Till Dawn“-ში მისი პერსონაჟი სატანიკო პანდემონიუმია, ვამპირი, რომლის გამოჩენაც ერთ-ერთ ყველაზე ცნობილ ეპიზოდად იქცა. ფილმში ჰაიეკს პარტნიორობას ჯორჯ კლუნი, კვენტინ ტარანტინო და ჰარვი კეიტელი უწევენ.
Frida
2002 წლის ბიოგრაფიულ დრამაში ჰაიეკმა მექსიკელი მხატვრის არა მხოლოდ გარეგნული სახე, არამედ მისი რთული შინაგანი სამყარო, ფიზიკური ტკივილი, პოლიტიკური შეხედულებები და დაუმორჩილებელი ხასიათიც გააცოცხლა.
ფილმი ჰეიდენ ჰერერას ბიოგრაფიულ წიგნს „Frida: A Biography of Frida Kahlo“ ეფუძნება. სიუჟეტი ფრიდა კალოს ცხოვრების მნიშვნელოვან ეტაპებს მიჰყვება – მძიმე ავტოავარიას, რომელმაც მისი ჯანმრთელობა სამუდამოდ შეცვალა, დიეგო რივერასთან ურთიერთობას, მათ ქორწინებას, დაშორებასა და ხელახლა შერიგებას…
როლისთვის ჰაიეკმა ფრიდა კალოს წერილები, დღიურები, ფოტოები და მისი ცხოვრების შესახებ არსებული მასალები დეტალურად შეისწავლა. მსახიობი ცდილობდა, ფრიდასთვის დამახასიათებელი მოძრაობა, საუბრის მანერა და სხეულის ენა ზუსტად გადმოეცა. განსაკუთრებული ყურადღება დაეთმო მის გარეგნობასაც – წარბებს, ვარცხნილობას, ტრადიციულ მექსიკურ სამოსსა და სამკაულებს, რომლებიც კალოს ვიზუალური იდენტობის განუყოფელი ნაწილი იყო.
ამ შესრულებამ სალმა ჰაიეკს ოსკარის ნომინაცია მოუტანა საუკეთესო მსახიობი ქალის კატეგორიაში. ფილმმა ჯამში ექვსი ნომინაცია მიიღო და ორი ჯილდო მოიგო – საუკეთესო მაკიაჟისა და საუკეთესო ორიგინალური მუსიკისთვის.
Bandidas
2006 წელს სალმა ჰაიეკმა პენელოპე კრუსთან ერთად ითამაშა „Bandidas“-ში.
პერსონაჟები მე-19 საუკუნის მექსიკაში ცხოვრობენ და ერთმანეთისგან რადიკალურად განსხვავდებიან. ერთი მდიდარი და განათლებული ოჯახიდანაა, მეორე კი უფრო მკაცრ და დაუმორჩილებელ გარემოშია გაზრდილი. თუმცა, როცა მათ ცხოვრებას უსამართლობა და ძალადობა ანგრევს, ეს განსხვავებები უკანა პლანზე გადადის.
„Bandidas“ ერთი შეხედვით მსუბუქი სათავგადასავლო კომედიაა, მაგრამ ფილმის მთავარი ხიბლი მხოლოდ იუმორსა და მოქმედებაში არ მდგომარეობს. მთავარი თემა ორი ქალის ურთიერთობაა – დაპირისპირება, უნდობლობა, კონკურენცია. ჰაიეკი და კრუსი ეკრანზე განსხვავებულ ენერგიას ქმნიან: ჰაიეკის გმირი უფრო თავდაჯერებული და იმპულსურია, კრუსის პერსონაჟი კი თავშეკავებული, დაკვირვებული და დახვეწილი.
ასევე დაგაინტერესებთ:
#OK! რატომ არ იბანს დილით პირს სალმა ჰაიეკი? – მექსიკელი მსახიობის სილამაზის საიდუმლო
#OK! ჰოლივუდის ვარსკვლავები, რომლებმაც პლასტიკურ ქირურგიაზე უარი თქვეს
