სილამაზეზე ზრუნვა მხოლოდ ვიზუალზე ზრუნვას არ გულისხმობს, ეს არის საკუთარი თავის პატივისცემა. ზრუნვა როგორც გარეგნულ, ასევე ემოციურ მდგომარეობაზე, რასაც მოაქვს თავდაჯერება და შინაგანი ჰარმონია. ჩემი რესპონდენტის აზრით, სწორედ ამ ბალანსის პოვნაში გვეხმარება თანამედროვე ესთეტიკური მედიცინა. სწორედ ამ ხედვით შექმნა ჩიტო შაქარიშვილმა საკუთარი ცენტრი „თათას ესთეტიკ ცენტრი“ – სივრცე, სადაც პროფესიული ცოდნა, გამოცდილება და ინდივიდუალური მიდგომა გააერთიანა. მისთვის კოსმეტოლოგია არ არის მხოლოდ პროფესია, ეს არის ყოველდღიური მოტივაცია, დაეხმაროს ადამიანებს საკუთარი თავის საუკეთესო ვერსიის აღმოჩენაში.
რამ განაპირობა თქვენი პროფესიული არჩევანი?
ჩემი პროფესიული არჩევანი განაპირობა სილამაზისა და ესთეტიკის მიმართ განსაკუთრებულმა ინტერესმა. ყოველთვის მიზიდავდა იდეა, რომ თანამედროვე მეთოდებით შესაძლებელი იყო არა მხოლოდ ვიზუალის გაუმჯობესება, არამედ ადამიანების თავდაჯერებულობის გაზრდაც. ადამიანებში პოზიტიური ცვლილებების დანახვა გახდა ჩემი მთავარი მოტივაცია.
ამ ინტერესმა მიმიყვანა კოსმეტოლოგიის სფეროში, სადაც საფუძვლიანად შევისწავლე როგორც კლასიკური, ისე ინიექციური პროცედურები. პრაქტიკამ და მუდმივმა განვითარებამ მომცა შესაძლებლობა, დამეგროვებინა გამოცდილება და შემექმნა საკუთარი ხედვა სილამაზის ინდუსტრიაში, რაც საბოლოოდ საკუთარი ცენტრის გახსნით დაგვირგვინდა.
რა იყო საკუთარი ცენტრის გახსნის მიზეზი?
საკუთარი ცენტრის გახსნის მთავარი მიზეზი იყო სურვილი, შემექმნა სივრცე, სადაც პროფესიონალიზმი, უსაფრთხოება და ინდივიდუალური მიდგომა იქნებოდა მთავარი პრიორიტეტი. მინდოდა მქონოდა ადგილი, სადაც თითოეული პაციენტი თავს იგრძნობდა კომფორტულად და დარწმუნებული იქნებოდა მიღებული მომსახურების ხარისხში.
ასევე, ჩემთვის მნიშვნელოვანი იყო თანამედროვე ტექნოლოგიებისა და მეთოდების დანერგვა, რაც საშუალებას გვაძლევს, მაქსიმალურად ეფექტური და ბუნებრივი შედეგები მივიღოთ. საკუთარი ცენტრი არის ადგილი, სადაც ჩემი პროფესიული ხედვა სრულად რეალიზდება.
რა პროცედურებს სთავაზობთ საზოგადოებას?
თანამედროვე სერვისებს, რომლებიც მოიცავს როგორც ესთეტიკურ, ისე სამედიცინო მიმართულებებს.
ინიექციური კოსმეტოლოგიის მიმართულებით ვთავაზობთ: ტუჩისა და სახის კონტურირებას, კანის გაახალგაზრდავების პროცედურებს, ბიორევიტალიზაციას, მეზოთერაპიას და სხვა ინოვაციურ მეთოდებს.
კლასიკური კოსმეტოლოგია კი მოიცავს კანის ღრმა წმენდას, მოვლასა და ინდივიდუალურად შერჩეულ პროცედურებს.
გარდა ამისა, ცენტრში შესაძლებელია მანიკიურისა და პედიკიურის მომსახურება, პოდოლოგის კონსულტაცია და მკურნალობა, ასევე ლაზერული ეპილაცია თანამედროვე აპარატურის გამოყენებით.
ჩვენი მთავარი მიზანია თითოეულ მომხმარებელს შევთავაზოთ მის საჭიროებებზე მორგებული, უსაფრთხო და ეფექტური სერვისი. მნიშვნელოვანია, რომ ნებისმიერი პროცედურა ჩატარდეს პროფესიონალთან, რადგან სწორი დიაგნოსტიკა და ინდივიდუალური მიდგომა არის წარმატებული შედეგის მთავარი საფუძველი.
ამ სეზონზე რომელი პროცედურაა აქტუალური და რა რჩევას მისცემდით ქალებს?
ამ სეზონზე განსაკუთრებით აქტუალურია კანის დატენიანებისა და აღდგენის პროცედურები, როგორიცაა ბიორევიტალიზაცია და მეზოთერაპია, რომლებიც ხელს უწყობს კანის ელასტიკურობისა და ჯანმრთელი იერის შენარჩუნებას. ასევე დიდ ინტერესს იწვევს ლაზერული ეპილაცია, რადგან სწორედ ამ პერიოდში მიღებული შედეგები განსაკუთრებით ეფექტურია.
ქალებს ვურჩევდი განსაკუთრებული ყურადღება მიაქციონ კანის დაცვას, გამოიყენონ მზისგან დამცავი საშუალებები, არ გამოტოვონ ყოველდღიური მოვლის ეტაპები და არჩევანი გააკეთონ ხარისხიან, დერმატოლოგიურად დამოწმებულ პროდუქტებზე.
როგორ ახერხებთ დედობისა და პროფესიული ცხოვრების შეთანხმებას?
დედობა და კარიერა ჩემთვის ერთდროულად დიდი პასუხისმგებლობა და უდიდესი მოტივაციაა. ვცდილობ სწორად გავანაწილო დრო და პრიორიტეტები, რათა არც ოჯახი და არც პროფესიული საქმიანობა არ დარჩეს ყურადღების გარეშე.
დროის მენეჯმენტი და მიზნების სწორად განსაზღვრა მეხმარება ამ ბალანსის შენარჩუნებაში. რა თქმა უნდა, ეს ყოველთვის მარტივი არ არის, მაგრამ სწორედ ეს გამოწვევები მაძლევს ძალას და სტიმულს, ვიყო უკეთესი როგორც დედა, ასევე პროფესიონალი.
რა გაძლევთ მოტივაციას თქვენს საქმეში?
ყველაზე დიდი მოტივაცია ჩემთვის არის კმაყოფილი პაციენტები – მათი სიხარული, თავდაჯერებულობა და დადებითი ემოციები, რასაც შედეგის მიღების შემდეგ ვხედავ. ეს არის ის, რაც ყოველდღიურად მაძლევს ენერგიას და სურვილს, კიდევ უფრო მეტად განვვითარდე.
ასევე, უდიდესი მოტივაციაა ჩემი ოჯახი და შვილები. განსაკუთრებული ადგილი უჭირავს ჩემს გოგოს, რომლის სახელზეც არის შექმნილი ცენტრი. სწორედ ისინი მაძლევენ ძალას, მუდმივად განვაახლო ცოდნა, დავნერგო სიახლეები და შევინარჩუნო მაღალი სტანდარტი.
რა გეგმები გაქვთ მომავალში და როგორ ხედავთ საქმიანობის განვითარებას?
მომავალში ვგეგმავ ცენტრის გაფართოებას და მომსახურების პორტფელის განვითარებას, რათა შევძლო მომხმარებელს შევთავაზო კიდევ უფრო მრავალფეროვანი და თანამედროვე პროცედურები. ასევე, გეგმაშია პროფესიული ტრენინგებისა და საგანმანათლებლო პროგრამების დანერგვა, რაც ხელს შეუწყობს როგორც ჩემი გუნდის, ისე სფეროში დაინტერესებული ადამიანების ზრდა და განვითარებას.
ტექსტი: სოფიო მალანია
ფოტო: ლაურა ზოიძე
