გილოცავთ გაზაფხულის შემობრძანებას!
როგორც იქნა, მოვილიეთ ზამთარი და მარტში შევაბიჯეთ. თავს ვიიმედებთ, რომ ფორმალურად მაინც გაზაფხულია, თუმცა, მარტმა თუ მოიგიჟიანა თავი, ყველამ ვიცით, რა ქარტეხილების დატრიალებაც შეუძლია…
და მაინც, გარეთ უკვე გაზაფხულია…
ყველა სეზონს თავისი გამოწვევები აქვს. ზამთრის შემდეგ თითქოს კანიც გამოღვიძების რეჟიმში გადადის. მე გირჩევთ, სანამ სეზონი ამის საშუალებას იძლევა და მზე აქტიურ ფაზაში შევა, აუცილებლად დაუთმეთ დრო და ყურადღება პილინგებს, როგორც საშინაო რუტინაში, ასევე, კაბინეტურ, ქიმიურ პილინგებს. ჯერ კიდევ გვაქვს დრო, რომ აგრესიული ექსფოლიატორები გამოვიყენოთ და ეპიდერმისი განვაახლოთ, კანიდან მკვდარი უჯრედები მოვიშოროთ, სებუმი – ცხიმის გამოყოფა დავარეგულიროთ და სტატიკური ნაოჭების მკვდარი უჯრედებისგან განთავისუფლების შედეგად, შესანიშნავი გამაახალგაზრდავებელი ეფექტი მივიღოთ. დიახ, ამ ყველაფერს უზრუნველყოფს პილინგები. სწორედ ამიტომ არის პილინგი, მრავალ თანამედროვე კოსმეტოლოგიურ პროცედურებს შორის, ჩემი ფავორიტი.
არ დაგავიწყდეთ, საშინაო რუტინაში ჩართოთ AHA და BHA მჟავები, ესენია რძემჟავა, ციტრუსის მჟავა, გოჯიკის, გლიკოლის, სალიცილის მჟავები, რომელთა აგრესიულობა და მოხმარების სიხშირე კანის ტიპების მიხედვით განსხვავდება. კომბინირებულ/ცხიმიან და ძალიან ცხიმიან კანს უფრო ძლიერი მოქმედების პილინგები უხდება, მაშინ, როცა მშრალი და მგრძნობიარე კანისთვის ფაქიზი პილინგებია განკუთვნილი. კაბინეტში კი თავად სპეციალისტი შეარჩევს თქვენი კანის ტიპისთვის იდეალურად მორგებულ ქიმიურ პილინგს. არ დაგავიწყდეთ პილინგების შემდეგ SPF მზისგან დამცავი საცხის გამოყენება შინიდან გასვლის წინ. ეს აუცილებელი პირობაა, რომ თქვენ კანი დაცული იყოს.
მარტში ორი არაჩვეულებრივი ქალთა დღესასწაული გვაქვს. ვფიქრობ, ჩვენს ბიუთი რუბრიკაში თავისუფლად შეძლებთ თქვენი საყვარელი ადამიანებისთვის კარგი საჩუქრის არჩევას. აქ ნახავთ სეზონურ კანის მოვლის საშუალებებს, ტრენდულ მაკიაჟს, არაჩვეულებრივი პალიტრის ტუჩსაცხებს და რა თქმა უნდა, მარტის სურნელოვან პარფიუმს.
თუმცა, მთავარი ხომ არა მხოლოდ საჩუქარი, არამედ ყურადღებაა, რომელსაც ერთმანეთს ასეთ განსაკუთრებულ დღეებში ვჩუქნით. საჩუქარი ხომ იმ ემოციის, იმ დადებითი ენერგიების გვირგვინია, რომელსაც ერთმანეთს ვუზიარებთ და რომლითაც ერთმანეთს სასიცოცხლოდ ვკვებავთ.
დღესასწაულებს გილოცავთ, ქალებო, დედებო, საქართველოსი!
დაე, ყოველთვის გქონოდეთ თავისუფლება და ძალა, რომ მხოლოდ თქვენ თავად განკარგოთ საკუთარი ცხოვრება, საკუთარი სურვილები და თავად აირჩიოთ ცხოვრების ის გზა, რომელიც ბედნიერებამდე მიგიყვანთ. ყოველთვის გქონოდეთ საშუალება და სურვილი, იზრუნოთ საკუთარ თავზე, ჯანმრთელობასა და სიამოვნებაზე. ვინ, ვინ და ჩვენ ხომ ვიცით, სხვებზე ზრუნვა და სიყვარული საკუთარ თავზე ზრუნვითა და სიყვარულით იწყება.
თაკო გვაზავა
ჟურნალი OK!-ს ბიუთი რედაქტორი
