ჟურნალ OK!-ს ძვირფასო მკითხველებო,
გილოცავთ ახალ 2026 წელს!
გისურვებთ, რომ ახალი წელი ყოფილიყოს თქვენთვის, პირველ რიგში, ჯანმრთელობის, ქვეყანაში სიმშვიდის, სილაღის, ბარათზე მსუყე ციფრების და გულსა და გონებაში ბედნიერების წელიწადი.
მოდი, ცოტა მეტად განვავრცობ სურვილებს ჩემი ხაზის – ბიუთის მიმართულებით და გისურვებთ, მეტი დრო დაუთმოთ საკუთარ თავს და მის განებივრებას, საკუთარი თავის ჯანმრთელობასა და სილამაზეზე ზრუნვას. გარეგნობასა და ჯანსაღ კანზე, სხეულზე ზრუნვა და ფუსფუსი ხომ, პირველ რიგში, ჩვენი თვითშეფასების ამაღლებას, საკუთარი თავისთვის სიამოვნების მინიჭებასა და თვითზრუნვით თავის გაბედნიერებას ნიშნავს, ასე არაა? ამიტომ, გისურვებთ, სულ გქონოდეთ სურვილი, გამოყოთ დრო საკუთარი თავისთვის და იმ სილამაზის და პრანჭიაობის მყუდრო რიტუალების ჩატარებისთვის, რომელიც ასეთ თვითკმაყოფილებას და საკუთარ თავთან ჰარმონიას გვანიჭებს ყველას.
ახლა კი ჩემი სარედაქტორო სვეტის უფრო ფუნქციურ ნაწილზე გადავალ.
ახალი წლების შემდეგ ჭარბად მიღებული ალკოჰოლი და ნიგვზიანები თავის საქმეს აკეთებს, სამწუხაროდ.
ალბათ მეტ-ნაკლებად ყველანი შევშუპდით, სახეზე თავი იჩინა ვერაგმა გამონაყარმა, მიძინებულმა აკნემ გაიღვიძა, უძილობისგან თვალები ამოგვიღამდა. სასწრაფოდ, სასწრაფოდ გვჭირდება დეტოქსი და აღდგენა ყველას.
როგორ ვიქცევით ასეთ დროს პირველ რიგში?
აუცილებლად წყალი! დღეში ორი ლიტრი წყალი სასურველია მივიღოთ ნება-ნება, ყლუპ-ყლუპად მთელი დღის განმავლობაში. უბრალოდ, გადასარევი იქნება, თუ ერთ ლიმფოდრენაჟულ მასაჟს მაინც ჩაიტარებთ სხეულზე, ამით დიდ დეტოქსს მოუწყობთ თქვენს ორგანიზმს. აუცილებლად უნდა მოვიწესრიგოთ ძილი და ამის პარალელურად ჩაშავებულ უპეებს მივხედოთ. ასეთ დროს უებარია საშინაო პირობებში შავი ან მწვანე თბილი ჩაის გაჯერებულ ნაყენში დასველებული ბამბის დისკოების თვალებზე დაფენა. ჯერ ერთი, რომ საოცრად სასიამოვნოა და მეორეც, ქუთუთოებს დაამშვიდებს, მოუხსნის დაძაბულობას და თვალების ირგვლივ შავ წრეებზეც დადებითად აისახება. პირადად მე ხშირად ვიკეთებ ჩაის ნაყენის საფენებს, ჩემი საყვარელი რიტუალია… პარალელურად შეგვიძლია პრობლემას თვალის ჰიალურონის პაჩებიც მივაშველოთ.
რაც შეეხება გამონაყარს, მას არაჩვეულებრივად შველის ალფა და ბეტა ჰიდროქსიდ მჟავების გამოყენება. ამიტომ ჩართეთ რუტინაში პროდუქტები – დასაბანები, ტონერები, რომელიც სალიცილის, გლიკოლის და სხვა მჟავებს შეიცავს.
იმედი მაქვს, ყველა მალე გადავაგორებთ პოსტსაახალწლო დეტოქსპროცესს. ამაში ჩვენი რუბრიკაც ძალიან დაგეხმარებათ. თვალი გადაავლეთ იანვრის OK! Beauty-ს, საიდანაც ბევრ სასარგებლო ინფორმაციას მიიღებთ.
სიყვარულით,
თაკო გვაზავა
ჟურნალი OK!-ს ბიუთის რედაქტორი
