როდესაც მოდის ინდუსტრიაში უამრავი ბრენდი არსებობს რთულია რამით გამოირჩეოდე, მაგრამ წლების წინ ტადასი იანაიმ შეძლო, რომ სწორი ხედვებითა და ბიზნეს გათვლებით შეექმნა ერთერთი ყველაზე წარმატებული ბრენდი Uniqlo.
40 წლის წინ ტადასი იანაი მუშაობდა მამის პატარა დახლზე, სადაც ტანსაცმელს ყიდდა. მას არ ჰქონდა არც ფული, არც სტატუსი და რაც მთავარია – არ ჰქონდა გეგმა, რომ ოდესმე მსოფლიო დაეპყრო. მას ჰქონდა მხოლოდ მამის ბიზნესი, რომელიც გადარჩენისთვის იბრძოდა.
როდესაც ტადასი იანაიმ მამის ბიზნესი გადაიბარა, ყველას ეგონა, რომ ის უბრალოდ მეტ პროდუქციასა და უფრო მოდურ სივრცეს შექმნიდა, როგორც ამას ყველა სხვა ბიზნესი აკეთებდა. მაგრამ მან სრულიად განსხვავებული კითხვა დასვა:
„და თუ ტანისამოსი საერთოდ არ არის საჭირო, რომ იყოს მოდური?“
იმ პერიოდში ყველა ბრენდი ცდილობდა მოდის ტენდენციებისთვის ფეხი აეწყო – კოლექციებს ყოველ 3 თვეში ერთხელ ცვლიდნენ და ქმნიდნენ გამორჩეულ დიზაინებს. ამის პარალელურად ტადასი იანაი თითქმის არ ცვლიდა ასორტიმენტს: ის აუმჯობესებდა მხოლოდ ერთ მაისურს, ქმნიდა მსუბუქ ქურთუკებს და ისეთ ტანსაცმელს, რომელიც ბევრს უინტერესოდ ეჩვენებოდა.
ის არ ქმნიდა მოდის სახლს, ის ქმნიდა Uniqlo-ს, როგორც ტექნოლოგიურ სისტემას.
როდესაც სხვა ბრენდები დიზაინერებს ქირაობდნენ, ტადასი იანაი მეცნიერებსა და ინჟინრებს იწვევდა, რათა ტანსაცმელი ყოფილიყო უფრო გამძლე, კომფორტული და თავისი დანიშნულება სწორად შეესრულებინა.
დღეს, სწორი ბიზნეს იდეებითა და ზუსტი გათვლებით, ტადასი იანაის შემოსავალი 50 მილიარდ დოლარს აღემატება. Uniqlo-ს მაღაზიები წარმოდგენილია მთელი მსოფლიოს მასშტაბით, ხოლო მისი ფილოსოფია გახდა მაგალითი იმისა, თუ როგორ შეიძლება უბრალო იდეამ, თანმიმდევრულობამ და გრძელვადიანმა ხედვამ მთლიანად შეცვალოს ინდუსტრია.
