ამერიკელი მსახიობი და რეჟისორი სტივენ სიგალი რუსეთში მდებარე უძრავ ქონებას ყიდის. რუსული ტელეგრამ არხების ინფორმაციით, დაახლოებით 500 კვ.მ ფართობის სახლი მოსკოვის ელიტურ რუბლიოვკის რაიონში, 22 ოჯახისთვის შექმნილ დაცულ ტერიტორიაზე მდებარეობს.
მსახიობის უძრავი ქონება ორსართულიანი სახლისა და სასტუმრო სახლისგან შედგება. ორსართულიან სახლში ოთხი საძინებელი, რამდენიმე სველი წერტილი, სამუშაო ოთახი, კინოთეატრი, მარანი და ავტოფარეხია. სასტუმრო სახლი ორდონიანიანია – პირველზე საშხაპე და საუნა, მეორეზე კი საძინებელი მდებარეობს.
უძრავი ქონება დაახლოებით 9,5 მილიონ დოლარად არის შეფასებული. როგორც ამბობენ, სიგალმა ის 2019 წელს, გაცილებით იაფად, 1,3 მილიონ დოლარად შეიძინა.
ჯერჯერობით, 70 წლის მსახიობს რუსეთიდან სამუდამოდ წასვლის შესახებ არ განუცხადებია, თუმცა რუსეთის ფედერაციაში ბიზნეს პროექტები და მენეჯერული პოზიციები უკვე დატოვა. 2025 წლის ივლისში მსახიობმა Five Elements LLC-ის აღმასრულებელი დირექტორის თანამდებობა დატოვა, რასაც LLC, Russian Fairs LLC, Steven Seagal Group LLC და სხვა კომერციული ორგანიზაციებიდან წასვლა მოჰყვა.
ამრიგად, სტივენ სიგალმა რუსეთში ბიზნეს საქმიანობაც შეწყვიტა და სახლსაც ყიდის. რუსული ონლაინ-გამოცემები ვარაუდობენ, რომ მსახიობსა და ვლადიმერ პუტინს შორის უთანხმოება მოხდა და სიგალმა რუსეთიდან წასვლის გადაწყვეტილება მიიღო.
შეგახსენებთ, რომ სტივენ სიგალმა საერთაშორისო აღიარება 1990-იან წლებში მოიპოვა. მისი ყველაზე ცნობილი როლია პოლიციის სერჟანტი ნიკო ტოსკანი ფილმში „კანონზე მაღლა“ (Above the Law).
სტივენ სიგალმა რუსეთის მოქალაქეობა 2016 წელს მიიღო, თუმცა ამავე დროს აშშ-ისა და სერბეთის მოქალაქეც გახლავთ. მოქალაქეობის მიღების შემდეგ, სიგალი რუსეთის ხელისუფლების ორგანიზებულ ღონისძიებებზე რეგულარულად გამოდიოდა და კრემლის პოლიტიკის მხარდაჭერას ღიად გამოხატავდა, მათ შორის უკრაინის წინააღმდეგ სრულმასშტაბიანი ომის დაწყების შემდეგ.
2009 წელს „Russia.ru”-სთან ინტერვიუში სტივენ სიგალმა განაცხადა, რომ თავს რუსად გრძნობს.
„შემიძლია ვთქვა, რომ თვითონ მე რუსი ვარ. რუსული ოჯახი მყავს, მე მიყვარს რუსეთი და მეამაყება, რუსი რომ ვარ. ნამდვილად მიყვარს ეს ქვეყანა და ხალხი, რომელიც რუსეთში ცხოვრობს“, – განაცხადა მსახიობმა.
უცნობია, აპირებს თუ არა სიგალი სამშობლოში დაბრუნებას. 2018 წელს აშშ-ში მის წინააღმდეგ სექსუალური შევიწროების ბრალდებით საქმე აღიძრა, თუმცა გამოძიება არ ჩატარებულა, რადგან დანაშაული 20 წელზე მეტი ხნის წინ მოხდა და ხანდაზმულობის ვადა გავიდა.
