ნიუ-იორკში, ბრუკლინში, ახალი რესტორანი და ლაუნჯი — CHRONOS გაიხსნა. პროექტი ქართველების მიერ არის შექმნილი და მისი ერთ-ერთი მთავარი და ყველაზე გამორჩეული ნაწილი ინტერიერის დიზაინია, რომლის ავტორიც ქართველი დიზაინერი Mariam Kapanadze — Marita Design Studio გახლავთ.
CHRONOS-ის კონცეფცია დროის, მითოლოგიისა და რეალობის საზღვრების იდეაზეა აგებული. ინტერიერში ერთმანეთს ერწყმის ანტიკური სამყაროს მოტივები, კლასიკური ხელოვნების ელემენტები და თანამედროვე, ფუტურისტული დეტალები. ქვის მასიური ფაქტურები, მითოლოგიური სკულპტურები, კლასიკური ჩარჩოები, უჩვეულო არტ-ობიექტები და დრამატული განათება ქმნის გარემოს, სადაც თითქოს სხვა განზომილებაში , დროსა და სივრცეს მიღმა ხვდები.
სწორედ ეს მოულოდნელი კონტრასტები და განსხვავებული ატმოსფერო იქცა CHRONOS-ის ერთ-ერთ მთავარ ეფექტად. სივრცეში პირველად შესული სტუმრების რეაქცია ხშირად გაოცებაა — ინტერიერი იმდენად განსხვავდება ტრადიციული რესტორნისა თუ ლაუნჯის გარემოსგან, რომ პირველივე წამებიდან ძლიერ ვიზუალურ შთაბეჭდილებას ქმნის.
CHRONOS მხოლოდ რესტორანი არ არის. საღამოს განმავლობაში იცვლება მისი ხასიათიც — ელეგანტური სადილისა და ლაუნჯის გარემო თანდათან უფრო დინამიკურ და ენერგიულ ღამის სივრცედ გარდაიქმნება. განათება, მუსიკა და ინტერიერის თეატრალური დეტალები ამ ტრანსფორმაციის ნაწილია.
პროექტის განსაკუთრებული მნიშვნელობა ქართული აუდიტორიისთვის იმაშიც მდგომარეობს, რომ ნიუ-იორკში შექმნილი ეს გამორჩეული სივრცე ქართული შემოქმედებითი ხედვის შედეგია. CHRONOS კიდევ ერთი მაგალითია იმისა, თუ როგორ შეიძლება ქართველმა დიზაინერმა საკუთარი ხელწერა საერთაშორისო გარემოში წარმოაჩინოს და თანამედროვე ნიუ-იორკის სტუმართმასპინძლობის სივრცეს განსხვავებული იდენტობა შესძინოს.
