ლეგენდარული სოფი ლორენის ვაჟის, მსოფლიოში ცნობილი დირიჟორის კარლო პონტი უმცროსისა და ქართველი მარიამ შარმანაშვილის ინსტაგრამზე დაწყებული სიყვარულის ისტორია ულამაზესი ქართული ქორწილით დაგვირგვინდა.
რამდენიმე დღის წინ მარიამმა წინა საქორწილო წვეულებიდან სოციალურ ქსელში ფოტოები განათავსა და საზოგადოებას აცნობა, რომ ქართული ქორწილისთვის ემზადებოდა.
ჯვარი 26 ივლისს, სამთავროს ტაძარში დაიწერეს, ხელი ღია ცის ქვეშ, ყვავილებით გაფორმებულ სივრცეში მოაწერეს, ხოლო ეს ყველაფერი რესტორან ბარდაში აღნიშნეს. სოციალურ ქსელებში გავრცელებული ფოტოებისა და ვიდეოების მიხედვით, პატარძალი უმშვენიერესი თეთრი, დახვეწილი კაბით, ხოლო კარლო – ტრადიციული ქართული ჩოხით იყო წარმოდგენილი, რასაც საზოგადოების მხრიდან დიდი მოწონება მოჰყვა.
მიუხედავად იმისა, რომ სოფი ლორენი, ჯანმრთელობის მდგომარეობის გამო საქართველოში ვერ ჩამოვიდა, მან ძალიან თბილი და ემოციური ვიდეო მიმართვით მიულოცა ახლადშეუღლებულებს.
ცერემონიის შემდეგ მარიამ შარმანაშვილი მედიის წინაშეც წარსდგა და აღნიშნა, რომ სოფი ლორენთან შეხვედრა მისთვის განსაკუთრებული იყო. მათ ერთმანეთი ჟენევაში, 2022 წელს გაიცნეს. როგორც თავად ჰყვება, სოფიმ ის ძალიან თბილად და გულწრფელად მიიღო.
წყვილის მიერ შესრულებულმა ქართულმა ცეკვამ საზოგადოება განსაკუთრებით აღაფრთოვანა. ისინი აქტიურად აღნიშნავენ, რომ კარლომ ქართველი ნეფის როლი ძალიან კარგად მოირგო.
,,გულითადი მადლობა პუსკა გამსახურდიას, სუხიშვილებს და მათ წარმომადგენლებს – ნინუკა შარაშიძეს და გიორგი მანჯგალაძეს, გულმოდგინე თავდადებისთვის და ამ ლამაზი ქართული საქორწილო ცეკვის სწავლებისათვის. პრივილეგირებულად ვგრძნობ თავს, რადგან ქართული კულტურის სიმდიდრეს ვეზიარე” – წერს პონტი სოციალურ ქსელში.
ქორწილს უამრავი ადამიანი ესწრებოდა – ნინო სურგულაძე, თამარ ივერი, სუხიშვლები, ქრისტინე ბაგრატიონ-მუხრანი, ლიკა ევგენიძე, მუსიკოსი დავით ალადაშვილი, მგზავრები, წყვილის ქორეოგრაფი – ქეთი ზაზაშვილი და სხვები.
ცერემონიის ერთ-ერთი განსაკუთრებული მომენტი, ქართველი მეცო-სოპრანოს, ნინო სურგულაძის შესანიშნავი შესრულება და სუხიშვილების შთამბეჭდავი ცეკვა იყო, რომელმაც კიდევ უფრო ემოციური გახადა ორი კულტურის თავშეყრა.
ბოლოს, მარიამმა და კარლომ გრანდიოზული ფოიერვერკის ფონზე, ულამაზესი ტორტი გაჭრეს და საღამო კიდევ უფრო დასამახსოვრებელი გახადეს.
“გპირდები, პატივს გცემ, ვიზრუნებ თავდადებით და მთელი ცხოვრება შენი ერთგული ვიქნები” – წერს პონტი.
გაცნობებთ, რომ მარიამ შარმანაშვილის და კარლო პონტი უმცროსის ქორწილის გაგრძელება სექტემბერში, ჟენევაში იგეგმება.
