ბავშვობის სიყვარულმა ხატვისა და ესთეტიკის მიმართ სილამაზის სფერომდე მიიყვანა, სადაც თითოეული პაციენტი მისთვის ინდივიდუალური ისტორიაა. დღევანდელი ჩემი რესპონდენტისთვის პროფესია მხოლოდ საქმე არაა, ეს სულიერი სიმშვიდის წყაროა. საკუთარი საქმის სიყვარული, წლების განმავლობაში ჩამოყალიბებული ნდობა და მუდმივი განვითარება მის პროფესიონალიზმს კიდევ ერთხელ უსვამს ხაზს. ჩვენი სტუმარია ესთეტიკოსი, ასოციაციის Georgian Skin Care Experts Association დამფუძნებელი და პოდკასტის „ყველაფერი ესთეტიკის შესახებ“ ავტორი – სოფიო თოიძე.
რატომ გაგიჩნდათ სურვილი, ამ პროფესიას დაუფლებოდით?
შეიძლება ითქვას, რომ ეს პროფესია ბავშვობიდან თან მდევს. ძალიან მიყვარდა ხატვა, არშემდგარი მხატვარი ვარ, არშემდგარი ხელოვანი, ალბათ ამანაც განაპირობა, სილამაზის სფერო რომ ავირჩიე. ჩემი პროფესია არანორმალურად მიყვარს, ვგიჟდები ჩემს პაციენტებზე. ჩემთვის სამსახური არის ადგილი, სადაც სულიერად ვმშვიდდები და ვისვენებ. სიამოვნება, რომელსაც განვიცდი ადამიანებთან ურთიერთობაში, ჩემი პროფესიისადმი უდიდესი სიყვარულის გამოხატულებაა.
მნიშვნელოვანია სპეციალისტს ენდობოდე, რა განაპირობებს ამ ნდობას?
ძალიან დიდი მნიშვნელობა აქვს პაციენტისა და სპეციალისტის პირველ შეხვედრას. პაციენტმა უნდა იგრძნოს შენი დადებითი განწყობა, უნდა შეგეძლოს მისი მოსმენა, რათა გაიგო, რა აწუხებს. შეიძლება ითქვას, რომ იმ მომენტში მათი ცხოვრებით უნდა იცხოვრო. ყოველ პაციენტში ვხედავ პიროვნებას და მათ ისტორიას. ალბათ წლებთან ერთად მოვიდა ის ნდობა, რაც პაციენტებსა და ჩემ შორისაა. წლებმა გვაჩვენა, რომ ვიმსახურებ მათ პატივისცემასა და ნდობას.
როგორ ინარჩუნებთ მაღალ სტანდარტს ამ სფეროში?
ძალიან რთულია მაღალი სტანდარტის შენარჩუნება, როდესაც გარშემო უამრავი ესთეტიკის ცენტრია გახსნილი. ვთვლი, რომ რაც უფრო მეტი პროფესიონალი კადრი და ჯანსაღი კონკურენცია იქნება, მით უფრო კარგია ამ სფეროს განვითარებისთვის. ესთეტიკოსისთვის ძალიან დიდი როლს თამაშობს ის სამსახური, სადაც მუშაობს. მე ბედნიერი ვარ, რომ ვარ საუკეთესო ესთეტიკური ცენტრის – botanic_skincare გუნდის წევრი. 26 წელია ვმუშაობ ამ ცენტრში, ის ჩემი მეორე ოჯახივითაა, სადაც ძალიან ბევრი ერთგული პაციენტი მყავს.
მაღალი სტანდარტისთვის აუცილებელია განათლება. სპეციალისტს უნდა ესმოდეს ის საქმე, რასაც აკეთებს, ეცნობოდეს დარგის სიახლეებს და რაც ყველაზე მთავარია, პაციენტთან გულწრფელი დამოკიდებულება ჰქონდეს. არ უნდა დაკარგო ინდივიდუალურობა და გქონდეს შენი მიდგომა.
დღეს, როდესაც ასეთი ტემპით ვითარდება ესთეტიკური მედიცინა, ძალიან საპასუხისმგებლოა გერქვას ესთეტიკოსი კოსმეტოლოგი. რა თქმა უნდა, არ უნდა ჩამორჩე ტემპს. ამ სფეროში დღემდე ახალი და საინტერესო მიმართულებების ძიებაში ვარ. რაც უფრო მეტი განათლებული თაობა იქნება ჩვენს სფეროში, მით უფრო განვითარდება ესთეტიკური კოსმეტოლოგია. რვა წელია ვემსახურებით სასწავლებელში – Aesthetic Hub – ახალი თაობების აღზრდას. შევქმენით ასოციაცია, რომლის მიზანია განვავითაროთ არაინვაზიური კოსმეტოლოგია. გავაკეთეთ პოდკასტი „ყველაფერი ესთეტიკის შესახებ“, რომლის მიზანია დარგის თანამედროვე ტენდენციებისა და პროფესიული გამოცდილების გაზიარება. დრო აჩვენებს, თუ რამდენად გაამართლებს ეს პროექტი.
რა განაპირობებს წარმატებას თქვენს პროფესიაში?
იყო წარმატებული შენს საქმეში, არის უდიდესი პასუხისმგებლობა და სიყვარული იმ საქმის მიმართ, რომელსაც ემსახურები. ჩემთვის ყველაზე დიდი წარმატებაა, როდესაც ჩემი პაციენტები საკუთარ თავს სარკეში ღიმილით უყურებენ. როდესაც თავს გარეგნულად და შინაგანადაც ლამაზად გრძნობენ, თავდაჯერება ემატებათ და ჰარმონიაში არიან საკუთარ თავთან. როდესაც ვიაზრებ, რომ მათ ბედნიერებაში მეც მიმიძღვის მცირედი წვლილი, რომ მე მათ ვასწავლე საკუთარი თავის, კანის სიყვარული და პატივისცემა, მაშინ მეც ბედნიერი ვარ, სწორედ ეს არის ჩემი პროფესიული გამარჯვება. გიყვარდეთ საკუთარი თავი, გიყვარდეთ საკუთარი კანი, ხშირად მოეფერეთ საკუთარ თავს, თქვენ ხომ ყველანი განუმეორებელი ხართ. მე თქვენ მიყვარხართ.
ტექსტი: სოფიო მალანია
ფოტო: ალექსეი სეროვი
