OK! Techno Book-ის მოწვეულ რედაქტორს − სანდრო ბოლქვაძეს წარმოგიდგენთ, რომელიც უკვე არაერთხელ ყოფილა ჩვენი ჟურნალის ობიექტივში სხვადასხვა მიმართულებითა თუ წამოწყებით. ამჯერად კი ვეცადეთ ყველა ამ მნიშვნელოვანი თემისთვის ერთად მოგვეყარა თავი და ჩვენი მკითხველისთვის კიდევ ერთი დასამახსოვრებელი და საინტერესო Book-ი შეგვეთავაზებინა. მანამდე კი გთავაზობთ ინტერვიუს, სადაც უკეთ გაეცნობით ინფორმაციას მის მიერ მიღებული გამოცდილების, განვლილი გზისა და განხორციელებული პროექტების შესახებ.
სანდრო, თქვენ არაერთხელ ყოფილხართ ჟურნალ OK!-ის რესპონდენტი. ამჯერად Techno Book-ის მოწვეული რედაქტორი ბრძანდებით. გაგვიზიარეთ ამ გამოცდილების შესახებ. ყოფილხართ თუ არა აქამდე მსგავს ამპლუაში და რამდენად საინტერესო იყო მუშაობის პროცესი?
Techno Book-ის მოწვეული რედაქტორობა ჩემთვის ძალიან საინტერესო და ახალი გამოცდილებაა. ვფიქრობ, ამით უფრო ახლოს მივედი მკითხველთან, ვიდრე მანამდე ვყოფილვარ. ვგრძნობ როგორც პასუხისმგებლობას, ასევე შესაძლებლობას. გარდა ამისა, უშუალოდ წერის პროცესი ძალიან საინტერესო იყო ჩემთვის. შევეცადე ანალიტიკური ესეის სტრუქტურით გადმომეცა საკუთარი აზრები და სათქმელი მაქსიმალურად გამემარტივებინა.
რომელი თემები შეარჩიეთ OK! Techno Book-ის მკითხველისთვის?
OK!-ის მკითხველებისთვის შევარჩიე ისეთი თემები, რომლებიც გამოხატავს ჩემს დამოკიდებულებას სხვადასხვა პროცესის მიმართ ტექნოლოგიების სფეროში. შევეცადე ამეხსნა, როგორ და რატომ მივედი არსებულ პროექტებამდე და გადაწყვეტილებამდე. ასევე, შევეცადე გამეზიარებინა საკუთარი შეხედულებები როგორც სტარტაპის, ასევე კორპორაციული კულტურისა და ზოგადად, ინფორმაციული ტექნოლოგიების მიმართ.
გვიამბეთ თქვენს ამჟამინდელ საქმიანობასა და მიღწევებზე.
ამჟამად ჩვენ წარმატებით დავნერგეთ Sfero ქართულ ბაზარზე და პლატფორმა ძალიან სწრაფად იზრდება, უკვე ასობით ადამიანი დასაქმდა მისი საშუალებით. გარდა ამისა, მონტესორის საბავშვო ბაღში ადმინისტრირების ნაწილში აღარ ვარ ჩართული, თუმცა აქტიურად ვაწარმოებ კომუნიკაციას მონტესორის საერთაშორისო ასოციაციასთან ჰოლანდიაში, რათა კიდევ უფრო უკეთესი პროგრამები დავნერგოთ სკოლამდელ აღზრდაში. ამავდროულად, ვმუშაობ საერთაშორისო კომპანია One Smart Star-ში, კორპორაციული გაყიდვების ხელმძღვანელის პოზიციაზე საქართველოს რეგიონში.
გარდა ამისა, თავისუფალ დროს ვუთმობ ახალი მიმართულებების შესწავლას ვებტექნოლოგიებში. ჩემი აზრით, ძალიან ახლოს არის ინტერნეტის ახალი ეპოქა, რომელიც საოცრად დიდ ცვლილებებსა და შესაძლებლობებს მოგვანიჭებს. მე ვფიქრობ, რომ ეს გლობალიზაციის ახალ ეტაპს უკავშირდება, სადაც ტექნოლოგიების მფლობელები არა კერძო კომპანიები, არამედ ყველანი ვიქნებით.
რა გზა გაიარეთ დღევანდელ დღემდე?
სკოლის დასრულების შემდეგ, პროფესიის შერჩევის პროცესში, არჩევანის წინაშე დავდექი. სამ ალტერნატიულ ვარიანტს განვიხილავდი: მუსიკა, არქიტექტურა და ბიზნესის ადმინისტრირება. არჩევანი შევაჩერე ბიზნესის ადმინისტრირებაზე, საიდანაც დაიწყო ჩემი საკმაოდ საინტერესო პროფესიული ცხოვრება. მეორე კურსზე ვიყავი, როდესაც პირველად დავიწყე მუშაობა. მას შემდეგ არაერთი კუთხით განვავითარე საკუთარი შესაძლებლობები − IT-მენეჯმენტის, ფინანსების, ბიზნესის მოდელირებისა და სხვა მიმართულებებით. შესაბამისად, სწავლასთან ერთად, ძალიან დიდ დროსა და ენერგიას ვუთმობდი მიღებული ცოდნის პრაქტიკაში გამოყენებასა და იმის გაგებას, თუ საბოლოოდ რა მიმართულებით მსურდა მუშაობის გაგრძელება. როდესაც ბაკალავრიატი დავხურე, მივხვდი, რომ სფერო, რომელიც მაინტერესებდა, იყო სტატისტიკური ანალიზი და ზოგადად, ბიზნესის მენეჯმენტი. სწორედ მაშინ ვცადე პირველად საკუთარი თავი წარმოების მიმართულებით. ლერი მილდიანთან ერთად მონაწილეობას ვიღებდი და ვმუშაობდი ქარხნებისა და საწარმოების შექმნაში, ასევე − ტურისტულ სექტორში. ვითვლიდი და ვაკეთებდი პროგნოზებს, ვქმნიდი ორგანიზაციულ სტრუქტურას და ვასაქმებდი ადამიანებს. დღეს მაქსიმალური ძალისხმევა დავუკავშირე ახალი ტექნოლოგიების კვლევასა და შექმნას. ვფიქრობ, ეს ძალიან მნიშვნელოვანი სფეროა, რადგან სწრაფად იძლევა პროცესების უკეთესობისკენ გარდაქმნის შესაძლებლობას.
როდის დაინტერესდით პირველად ტექნოლოგიებით?
ჩემი აზრით, ადამიანის გზა იწყება სწორედ მაშინ, როცა მას უყალიბდება საკუთარი თავის შეცნობის უნარი. მაგალითად, ბავშვები საკუთარ თავს არა სახელით − მესამე პირში, არამედ „მე“-თი მიმართავენ.
ჩემი გზაც ალბათ პატარა ასაკში დაიწყო, როდესაც დავინტერესდი ასტრონომიით, ანთროპოგენეზით და ბიოლოგიით. ძალიან მაინტერესებდა რა ხდებოდა კოსმოსში, სხვა პლანეტებზე, როგორ მუშაობდნენ ტელესკოპები და ხელოვნური თანამგზავრები. ალბათ სწორედ მაშინ გამიჩნდა ტექნოლოგიების მიმართ სიყვარული, რომელიც უნივერსიტეტის ბოლო კურსებზე გამოვლინდა. სწორედ მაშინ შემიპყრო ახალი ტექნოლოგიების დანერგვის სურვილმა.
გვესაუბრეთ საქართველოს მაგალითზე. როგორ ვითარდება ტექნოლოგიები და ტექნოლოგიებით დაინტერესება საზოგადოების მხრიდან?
ღრმად მწამს, რომ საქართველოს აქვს პოტენციალი, იყოს ტექნოლოგიური განვითარებით გამორჩეული არა მხოლოდ რეგიონში, არამედ გლობალური მასშტაბითაც, რადგან არაერთი ძალიან კარგი სტარტაპია შექმნილი, თუმცა სწრაფ ტექნოლოგიურ ზრდას ორი ფაქტორი აფერხებს: ერთი ის, რომ არშემდგარი სტარტაპები აქტიურად სუბსიდირდება და მეორე − საზოგადოების გარკვეული ნაწილი სკეპტიკურად არის განწყობილი სიახლეების მიმართ.
რას ურჩევდით დამწყებ ტექნოლოგებს?
დამწყებ მეწარმეებს ტექნოლოგიურ სფეროში ვეტყოდი შემდეგს: დასვით შეკითხვა, თუ რომელ პრობლემას აგვარებს თქვენი ტექნოლოგია, შემდეგ იფიქრეთ იმაზე, თუ როგორ მოაგვარებთ ამ პრობლემას და ბოლოს დაიწყეთ ტექნოლოგიის შექმნა მაშინ, როდესაც დარწმუნდებით, რომ თქვენი ტექნოლოგია ყველაზე მარტივად აგვარებს იდენტიფიცირებულ პრობლემას.
როგორია თქვენი სამომავლო გეგმები?
ჩვენ აქცენტი გავამახვილეთ გლობალურ ტექნოლოგიებზე და გლობალურ კონკურენციაზე. ვფიქრობ, ჩვენი პროექტები კონკურენტული იქნება საერთაშორისო ბაზარზე. გარდა ამისა, ვაპირებთ ისეთი ტექნოლოგიების შექმნას, რომელიც ბიზნესმოდელს გარდაქმნის და გახდის უფრო შედეგზე ორიენტირებულს, რითაც მოიგებს როგორც საბოლოო მომხმარებელი, ასევე კომპანია.
ტექსტი: ციაკო ღამბაშიძე
ფოტო: ალექსეი სეროვი
