დღეს Swarovski-ს ბრენდი და მისი ყელმოღერებული გედის ლოგი მთელ მსოფლიოშია ცნობილი. ბრჭყვიალა მინის კრისტალებმა ბრილიანტი ჩაანაცვლეს და კინოს, მოდისა და დიზაინის სამყარო დაპყრეს, არადა, ყველაფერი პატარა ქარხნით დაიწყო, რომელიც თავიდან წარმატებულიც კი არ იყო..
დანიელ სვაროვსკის მამას მინის პატარა ქარხანა ჰქონდა, რომელიც ბროლის დამუშავებით იყო დაკავებული. პატარა დანიელს ბროლის წარმოება ნებისმიერ სათამაშოზე მეტად იზიდავდა. ბიჭუნა ბროლის დაწახნაგების ხელოვნებას მამის ქარხანაში, ადრეულ ასაკში დაეუფლა, მოგვიანებით კი ცოდნა გამოცდილ ოსტატებთან გაკვეთილებით გააღრმავა. ის თამამად მიდიოდა ექსპერიმენტებზე, თუმცა ბიზნესის განვითარებაში მთავარი როლი ელექტროენერგიას უნდა ეთამაშა. დანიელი 21 წლის იყო, როდესაც 1883 წელს ვენაში გამართულ საერთაშორისო ელექტროტექნიკურ გამოფენას ეწვია. მან სწრაფად გააცნობიერა, რომ ენერგიის ახალ ფორმას კრისტალების წარმოების შეცვლა შეეძლო.
დანიელი დაუღალავად შრომობდა, სანამ იმ დროისთვის უნიკალური მინის საჭრელი ელექტრო ჩარხი სრულყოფილებამდე არ მიიყვანა. მის სიზუსტესა და სიჩქარეს ყველაზე გამოცდილი ოსტატიც კი ვერ შეედრებოდა. დანიელის ძალისხმევით, ოჯახურ ბიზნესს „მეორე სუნთქვა“ გაეხსნა და კარგი შემოსავალი მოიტანა, თუმცა ახალგაზრდა ბიზნესმენს მეტი უნდოდა. მან საკუთარი კომპანიის დაარსება გადაწყვიტა, სადაც უახლეს აღჭურვილობასა და ტექნოლოგიებს გამოიყენებდა. ცოლიძმასთან, ფრანც ვაისთან და ფრანგ მეწარმე არმანდ კოსმანთან მოლაპარაკებების შედეგად, ავსტრიის პატარა ქალაქ ვატენსში კომპანია Swarovski-ს გახსნა გადაწყდა.
თავიდან Swarovski მხოლოდ ბროლს უშვებდა, მაგრამ 6 წლის შემდეგ, 1919 წელს, პირველი შვილობილი კომპანია Tyrolit აამუშავა, რომელიც ჭრისა და მოხვეწის ხელსაწყოებს ამზადებდა. 1930 წელს კომპანიამ დრეკადი „სტრაზების“ გამოშვება დაიწყო, რომელიც სამოსისა და ფეხსაცმლის მოსართავად გამოიყენებოდა. ამ დროისთვის ოჯახურ ბიზნესში დანიელის ვაჟი, ვილჰელმი ჩაერთო, მაგრამ მან ახალი მიმართულება – ოპტიკური ხელსაწყოები აირჩია. ვილჰელმი წლების განმავლობაში ატარებდა ექსპერიმენტებს მინის დნობის ტექნოლოგიებში. მან ოპტიკური კომპონენტების დამუშავების ახალი მეთოდები შეიმუშავა და საველე ბინოკლის პროტოტიპი დაამზადა. მეორე მსოფლიო ომის წლებში ამან კომპანიას საშუალება მისცა, შაშხანების სამიზნეებისა და ჭოგრიტების წარმოებით თავი გადაერჩინა.
Swarovski-ს ოქროს ხანა
ომის შემდგომ პერიოდში კომპანიამ ახალი მიმართულება – Swarovski Optik გახსნა, რომელიც პრემიუმ კლასის ოპტიკურ ხელსაწყოებს ამზადებდა. მონადირეები Swarovski –ს ჭოგრიტებს და ტელესკოპებს სიამოვნებით ყიდულობდნენ. 1950 წელს კიდევ ერთი საწარმო – Swareflex გაჩნდა. ამაში დანიელის უმცროსმა ვაჟმა, ფრიცმა დიდი წვლილი შეიტანა.
ფოტო: Dior -ის დიზაინერული გულსაკიდი Swarovski –ის კრისტალებით
ამავე პერიოდში Swarovski -ის ბრენდმა მოდის სამყაროს დაპყრობა დაიწყო. 1950-იანი წლების შუა ხანებში კრისტიან დიორის კოლექციებში მოციმციმე კრისტალები პირველად გამოჩნდა. მოგვიანებით, დიზაინერმა დანიელის შვილიშვილ მანფრედთან ერთად, ვაკუუმური დაფრქვევის განსაკუთრებული მეთოდი შექმნა. ამის წყალობით კრისტალებზე ლამაზი, ცისარტყელასებრი ბზინვარება გაჩნდა, რომელსაც „ჩრდილოეთის ციალი“ (Aurora Borealis) უწოდეს. მალე Swarovski-ს კრისტალების გამოყენება დაიწყეს ელზა სკიაპარელიმ, კრისტობალ ბალენსიაგამ და კოკო შანელმა. Swarovski -ის ქვებით ჰოლივუდის მსახიობები და შოუ-ბიზნესის ვარსკვლავებიც დაინტერესდნენ.
თუ გავიხსენებთ ფილმს „საუზმე ტიფანისთან“, მასში ულამაზესი ოდრი ჰეპბერნი Swarovski-ს კრისტალების ტიარით გამოჩნდა, ხოლო მერლინ მონროს კაბა, რომლითაც მან „Happy Birthday, Mr. President“ იმღერა, 2500 კრისტალით იყო მორთული. ბრენდის პოპულარობა სწრაფად იზრდებოდა. მას შემდეგ, რაც ინსბრუკის ზამთრის ოლიმპიადის მონაწილეებს სვაროვსკის ბროლის პატარა ფიგურები აჩუქეს, ბრენდის პროდუქციაზე მოთხოვნა მკვეთრად გაიზარდა.
დაარსებიდან 1980-იანი წლების ბოლომდე ბრენდის ლოგოტიპი კრისტალით დამშვენებული ედელვაისი იყო, მაგრამ 1989 წელს ის გედმა ჩაანაცვლა, რომელიც ელეგანტურობას, ძალასა და სისუფთავეს განასახიერებდა. 1995 წელს კომპანიის მართვა დანიელის შვილთაშვილმა, ნადია სვაროვსკიმ ჩაიბარა. ნადია ოცნებობდა, რომ კომპანია ისევ მაღალი მოდის ნაწილი გამხდარიყო და ალექსანდრე მაკქუინთან თანამშრომლობა დაიწყო.
ნადიამ ინგლისელ მოდის დიზაინერს 1993 წელს გამოგონებული ქსოვილის გამოყენება შესთავაზა. ეს იყო დრეკადი ლითონის ბადე ინტეგრირებული კრისტალებით. მაქუინს იდეა მოეწონა. 1999 წლის გაზაფხული-ზაფხულის ჩვენებაზე მოდელები უჩვეულო სამოსით გამოვიდნენ, რასაც უდიდესი წარმატება მოჰყვა. Crystal Mesh -ის ქსოვილი მალე ჟან–პოლ გოტიეს, პრადას, ვალენტინოსა და სხვა დიზაინერების კოლექციებშიც გამოჩნდა.
ცნობილი ადამიანები სიამოვნებით თანამშრომლობდნენ ბრენდთან: მაიკლ ჯექსონი სცენაზე ხშირად გამოდიოდა თეთრი ხელთათმანით, რომელიც Swarovski-ს კრისტალებით იყო გაფორმებული. 2010 წელს „გრემის“ დაჯილდოებაზე ლედი გაგა ბრჭყვიალა ბოდეთი წარსდგა, ხოლო მადონას 2015 წლის ტურნეს კოსტიუმები 2,5 მილიონზე მეტი კრისტალით გააფორმეს.
2018 წელს, „ოსკარის“ მე-90 ცერემონიაზე, სცენა Swarovski-ს 45 მილიონი კრისტალით მორთეს. ერთი წლის შემდეგ კი ოქრომჭედლებმა როკფელერის ცენტრის ნაძვის ხისთვის საშობაო ვარსკვლავი დაამზადეს, რომელიც 450 კილოგრამს იწონიდა და 3 მილიონ კრისტალს მოიცავდა.
Swarovski ტრიუმფალურ სვლას აგრძელებს. სამი წლის წინ კომპანიის ლოგო ისევ შეიცვალა – გედი უფრო დახვეწილი გახდა და თავი მყიდველისკენ მიაბრუნა. ეს სიმბოლურად, წინსვლას და ამავდროულად, ტრადიციების ერთგულებას ნიშნავს. მსოფლიოში Swarovski –ის 3000-ზე მეტი მაღაზია მუშაობს და კომპანიის შემოსავლები სტაბილურად იზრდება.
ასევე დაგაინტერესებთ
