ბრიტანელმა მომღერალმა რობი უილიამსმა ბრიტანულ ჩარტებში პირველ ადგილზე გასული ალბომების რაოდენობით The Beatles-ის რეკორდი მოხსნა. The Official Charts Company -ის ცნობით, მომღერლის მე-16 ალბომი – Britpop, 16 იანვარს გამოვიდა და მაშინვე ეროვნული ჩარტის სათავეში მოექცა. აღსანიშნავია, რომ უილიამსის 13 ალბომიდან მხოლოდ ერთმა ვერ მიაღწია ეროვნულ ჩარტში პირველ ადგილამდე – „Reality Killed The Video Star“ (2009), რომელმაც მეორე ადგილი დაიკავა.
„რობი უილიამსმა ისტორია გადაწერა, რადგან პირველ ადგილზე გასული ალბომების რაოდენობით The Beatles-ს გაუსწრო“ – განაცხადა კომპანიამ.
The Beatles-ი რეკორდს (ჩარტების ლიდერი 15 ალბომი) 1967 წლიდან ინარჩუნებდა.
„Britpop“-ის გამოშვება თავდაპირველად, 2025 წლის ოქტომბერში იყო დაგეგმილი, შემდეგ 2026 წლის თებერვლამდე გადაიდო, თუმცა, მოგვიანებით, უილიამსმა ალბომის გამოშვება 16 იანვარს დანიშნა.
„ცხოვრებაში რამდენჯერ გეძლევა შესაძლებლობა, გქონდეს იმაზე მეტი პირველადგილოსანი ალბომი, ვიდრე დიდ ბრიტანეთში ოდესმე ვინმეს ჰქონია?“, – აღნიშნა მუსიკოსმა.
რობერტ პიტერ უილიამსი პოპულარული ბრიტანელი მუსიკოსი, მომღერალი და სიმღერების ავტორია, რომელმაც უამრავ გამოწვევას გაუძლო და დამოკიდებულებას გაუმკლავდა.
მის ანგარიშზე ათობით ჯილდოა. მათ შორის: Brits Global Icon Award (რომელიც მხოლოდ მას, დევიდ ბოუის და ელტონ ჯონს აქვთ), რვა ECHO, სამი MTV European Music Awards და ორი გრემის ნომინაცია. 2004 წელს რობი უილიამსი ოთხმოცდაათიანი წლების საუკეთესო მომღერლად დასახელდა და ბრიტანეთის მუსიკის დიდების დარბაზში შეიყვანეს. ერთი წლის შემდეგ, 2005 წელს, მომღერალი ფულის შოვნის სისწრაფით გინესის რეკორდების წიგნში მოხვდა – Close Encounters მსოფლიო ტურზე 1.6 მილიონი ბილეთი ტურის გამოცხადებიდან 24 საათში გაიყიდა.
ასევე დაგაინტერესებთ
