78 წლის რეჟისორი და მსახიობი რობ რაინერი და მისი 68 წლის მეუღლე, მიშელ ზინგერი, ლოს-ანჯელესში მდებარე სახლში ცივი იარაღით მოკლულები ნახეს. გამოცემა People-ის ინფორმაციით, მკვლელობაში ეჭვმიტანილი მათი შვილია.
მეუღლეები ბრენტვუდის რაიონში, დამწვარ სახლში, სხეულზე დანით მიყენებული მრავალრიცხოვანი ჭრილობებით აღმოაჩინეს. გავრცელებული ინფორმაციით, მკვლელობის შემდეგ დამნაშავემ სახლს ცეცხლი მოუკიდა, რის გამოც დამწვარი ცხედრების იდენტიფიცირება დიდხანს ვერ ხერხდებოდა.
დანაშაულში ეჭვმიტანილია წყვილის 32 წლის შვილი, სცენარისტი ნიკ რაინერი, რომელიც მშობლებთან ახლოს ცხოვრობს და მოზარდობის ასაკიდან ნარკოდამოკიდებულებით იტანჯება. ცნობილია, რომ ნიკი პერიოდულად, რეაბილიტაციას გადიოდა და რამდენიმე წელი სხვადასხვა შტატში ქუჩაში ცხოვრობდა. ნიკის ისტორია საფუძვლად დაედო ფილმს “ჩარლი” (Being Charlie), რომლის რეჟისორი მამამისი, რობ რაინერი იყო.
რობ რაინერი ვარსკვლავების ოჯახში დაიბადა – მამამისი კომიკოსი კარლ რაინერი, ხოლო დედა მსახიობი და მომღერალი ესტელ ლებოსტი იყვნენ. ის ჰოლივუდში ცნობილია, როგორც ამ და სხვა ფილმების რეჟისორი: “მიზერი“ (Misery), “როცა ჰარი შეხვდა სალის“ (When Harry Met Sally), “რამდენიმე კარგი ბიჭი“ (A Few Good Men), “ჭორები დადის“ (Rumor Has It). როგორც მსახიობმა, მან ლეონარდო დი კაპრიოს გმირის მამის როლი შეასრულა ფილმში “უოლ–სტრიტის მგელი“ (The Wolf of Wall Street). რაინერი კინოკომპანია Castle Rock Entertainment-ის ერთ-ერთი დამფუძნებელია.
რობ რაინერი და ფოტოგრაფი მიშელ ზინგერი ერთმანეთს ფილმის “როცა ჰარი შეხვდა სალის“ გადაღებებზე შეხვდნენ და 1989 წელს დაქორწინდნენ. წყვილს სამი შვილი ჰყავს: ვაჟები ჯეკი და ნიკი და ქალიშვილი რომი. რეჟისორი მანამდე დაქორწინებული იყო მსახიობ პენი მარშალზე, როომელთანაც ერთი ქალიშვილი შეეძინა.
ლოს ანჯელესის მერმა, კარენ ბასმა რაინერის გარდაცვალებას ლოს ანჯელესისა და ქვეყნისთვის „გამანადგურებელი დანაკარგი“ უწოდა.
