ჯგუფ One Direction-ის ყოფილი წევრი, ლიამ პეინი არგენტინაში 31 წლის ასაკში გარდაიცვალა. არგენტინის პოლიციამ დაადასტურა, რომ ლიამ პეინი გარდაცვლილი იპოვეს ბუენოს-აირესში, სასტუმროს მესამე სართულიდან გადმოვარდნის შემდეგ.
გავრცელებული ინფორმაციით, ის ქალაქში ნაილ ჰორანის კონცერტისთვის იმყოფებოდა, რომელიც რამდენიმე დღის წინ გაიმართა.
გამოცემის ცნობით, ლიამ პეინის გულშემატკივრები სასტუმროს გარეთ იკრიბებიან და მომღერლის გარდაცვალებას გლოვობენ.
პეინმა მსოფლიო პოპულარობა მოიპოვა 2010 წელს, როდესაც ის იყო The X Factor-ზე ჩამოყალიბებული ბიჭების ბენდის წევრი, რომელიც მსოფლიოში ერთ-ერთი უდიდესი პოპ ჯგუფი გახდა. ჯგუფმა 2016 წელს გამოაცხადა, რომ დროებით წყვეტდა მოღვაწეობას. 2019 წელს კი პეინმა თავისი ერთადერთი სოლო ალბომი გამოუშვა.
