დიდი ხანია, რაც ჟურნალი OK!-ის აქტიური მკითხველი ვარ. ძალიან მომწონს წერის სტილი, ფორმატი, მიმართულება… აქედან გამომდინარე, გამიხარდა, როდესაც ჩემთვის ასეთი საყვარელი და სამაგალითო გამომცემლობის გუნდისგან მივიღე შემოთავაზება, ვყოფილიყავი OK! Travel Book-ის მოწვეული რედაქტორი.
მსგავს ამპლუაში პირველად ვარ. საინტერესო იყო მუშაობის პროცესი. დიდი მადლობა რედაქციას, რომ არჩევანი ჩემზე შეაჩერა და ასეთი საპასუხისმგებლო საქმე მომანდო. სერიოზული გამოწვევა იყო ჩემთვის და ვფიქრობ, ერთობლივად ძალიან კარგად გავართვით თავი. ერთი სიტყვით, სიამოვნებით დავთანხმდი ამ შემოთავაზებას. თავიდან ცოტა შევშინდი კიდევაც, რადგან მთელი თვის განმავლობაში ჟურნალზე მუშაობა დიდ შრომას მოითხოვს, თუმცა სირთულეებს არ გავექეცი და შედეგად, მოწვეული რედაქტორის ამპლუაში უდიდესი სიამოვნება და გამოცდილება მივიღე. ისიც უნდა აღინიშნოს, რომ პროფესიონალთა გუნდის დახმარების იმედი თავიდანვე მქონდა და არც შევმცდარვარ, ერთობლივი მუშაობით ძალზე საინტერესო ჟურნალი შევთავაზეთ მკითხველს.
რაც შეეხება თემებს, რომლებიც მე შევარჩიე OK! Travel Book-ის მკითხველისთვის, მარტივად და გასაგებადაა გადმოცემული. ვისაუბრეთ იმ საკითხებზე, რაც აქტუალური და საინტერესოა როგორც გამოცდილი მოგზაურებისთვის, ისე მათთვის, ვინც ხშირად ვერ მოგზაურობს და ბევრ რამეში გამოცდილება არ აქვს. ჩვენ კი დავეხმარებით მათ, რათა უკეთ დაგეგმონ და გაერკვნენ ყველა საჭირო საკითხში.
შევარჩიეთ სტატიების ისეთი ფორმატი, როგორიც მკითხველისთვის იქნებოდა სასარგებლო. თავი მოვუყარეთ რჩევებს, რაც ადამიანმა გაუთვალისწინებელი პრობლემების თავიდან ასაცილებლად მოგზაურობამდე უნდა გაითვალისწინოს. საბოლოოდ ერთობ საინტერესო რჩევების კრებული გამოვიდა თვეებისა და სეზონების მიხედვით როგორც ფრენასთან, ასევე სასტუმროებთან დაკავშირებით. ჟურნალში ასევე გაეცნობით საუკეთესო მიმართულებებს ბავშვებთან ერთად სამოგზაუროდ, რომანტიკულ მიმართულებებს თქვენს მეწყვილეებთან ერთად. გარდა ამისა, მოგცემთ რამდენიმე გასათვალისწინებელ რჩევას, რაც დაგეხმარებათ, მოგზაურობა უფრო ბიუჯეტურად დაგეგმოთ, თუმცა არც მაღალბიუჯეტიანი მოგზაურობები დაგვიტოვებია უყურადღებოდ და საკრუიზო მიმართულებებზეც გიამბობთ.
