ესთეტიკური სფერო პირდაპირ კავშირშია მედიცინასთან, რის გამოც ის მოითხოვს შესაბამის ცოდნასა და მრავალწლიან პრაქტიკულ გამოცდილებას. ჟურნალი OK-ს დღევანდელი რესპონდენტი ესთეტიკური ცენტრის „ესტიას“ დამფუძნებელი ნათია ბერიძეა, რომელიც ძლიერი და წარმატებული ქალის ნამდვილი სახეა. ჩვენი რესპონდენტი არის ქალი, რომელიც მიიჩნევს, რომ ადამიანის ნამდვილი სილამაზე სულიერი სიმშვიდიდან მოდის. მიუხედავად გადატვირთული და დიდი პასუხისმგებლობის მქონე პროფესიული საქმიანობისა, იგი იდეალურად ახერხებს საქმიანობის, დედობისა და ბებიობის ერთმანეთთან შეთავსებას, რაც მას უფრო აძლიერებს.
როგორ დაიწყო თქვენი გზა ესთეტიკურ სფეროში?
ჩემთვის ესთეტიკური სამყარო ყველაფერია. მგონია, თითქოს ამ სამყაროში გავჩნდი და ეს ცხოვრება ერთი დიდი ფილმია, რომლის მთავარი მსახიობიც მე ვარ. განსაკუთრებულად მიყვარს ეს სფერო.
ესთეტიკა და მედიცინა ერთმანეთის კვალდაკვალ ვითარდება, რის გამოც ესთეტიკურ სფეროში საქმიანობისთვის აუცილებელია შესაბამისი განათლების მიღება და მრავალფეროვანი კვალიფიკაციების გავლა.
როდის და რატომ გადაწყვიტეთ საკუთარი ესთეტიკური ცენტრის „ესტია“-ს შექმნა?
რა თქმა უნდა, ჩემი პროფესიის ბევრ ადამიანს თავიდანვე უჩნდება სურვილი, შექმნას საკუთარი ესთეტიკური ცენტრი, თუმცა ამას ძალიან დიდი ფინანსური რესურსი სჭირდება. ყოველთვის მქონდა ოცნება, შემექმნა საკუთარი ესთეტიკური ცენტრი, სადაც ჩემს თანამოქალაქეებს მომსახურებას გავუწევდი.
სანამ „ესტიას“ დავაარსებდი, ვმუშაობდი უკრაინაში. როდესაც ჩემი ბავშვობის ქალაქში, ბათუმში, დავბრუნდი, გამიჩნდა სურვილი, აქაც მქონოდა ჩემი „ესტია“ და ყოველგვარი მომსახურება მიმეწოდებინა ჩემი თანამოქალაქეებისთვის. ჩემი მომხმარებლები არიან როგორც ქალები, ისე მამაკაცები.
ქ-ნო ნათია, თქვენ ხართ წარმატებული ქალის ჭეშმარიტი სახე, როგორ უთავსებთ ერთმანეთს დედობას, ბებიობას და პროფესიულ საქმიანობას?
იმდენი დრო გავიდა, რაც ჩემი საქმიანობა დავიწყე და იმდენად გავიზარდე, რომ ხანდახან ვფიქრობ, ნეტავ ვარ წარმატებული-მეთქი? მაგრამ პასუხს ყოველთვის ვპოულობ ჩემს პაციენტებში, ჩემი ესთეტიკური ცენტრის მომხმარებელთან, იმით, თუ როგორ ვუყვარვართ, როგორი ღიმილით შემოდიან, როგორი სიყვარულით გვემშვიდობებიან და ვფიქრობ, რომ ეს არის ჩემთვის ყველაზე დიდი წარმატება და ყველაზე დიდი გამარჯვება. მართლა რთულია ეს ყველაფერი ერთმანეთს შეუთავსო, მაგრამ სიყვარული გაძლევს ძალას შენი პროფესიისადმი, ოჯახისადმი. თუ საქმეს სიყვარულით აკეთებ, ის აუცილებლად გამოგივა. რაც შეეხება დედობას და ბებიობას, ვარ 2 შვილის დედა, 3 შვილიშვილის ბებია, მალე მეოთხეც შეგვეძინება და ყველა ერთი დიდი სიყვარულით ვცხოვრობთ.
რა არის თქვენი მთავარი პრინციპი პაციენტებთან ურთიერთობისას?
პაციენტებთან ურთიერთობა ნამდვილად არ მიჭირს, პირველ რიგში, ამაში გამოცდილებაც მეხმარება. ჩვენს სფეროში ფსიქოლოგობაც გამოგვდის. როდესაც პაციენტი ცდილობს, გული გაგიხსნას, საკუთარი შეხედულება და ემოცია გაგიზიაროს, რომ ეს პროცედურები მას გაალამაზებს, უფრო მეტად გამოკვეთს მის სილამაზეს და ეს თვითშეფასების ამაღლებაში ეხმარება, ეს ბედნიერებაა. როცა ისინი ჩემი კაბინეტიდან კმაყოფილები გადიან, სიხარულის ცრემლებიც კი მომდგომია თვალზე. მათთან მუშაობისას ჩემი მთავარი პრინციპია, ზუსტად ის მიზნობრივი პროცედურა მივაწოდო მათ, რაც რეალურად სჭირდებათ, რადგან ესთეტიკური პროცედურები მთლიანად მედიცინის ნაწილია.
დამღლელი დღის შემდეგ რა გაძლევთ ყველაზე დიდ მოტივაციას?
დაღლილი დღის შემდეგ ყველაზე დიდი მოტივაცია ჩემთვის არის ბედნიერი პაციენტი. როდესაც ის გადის კაბინეტიდან, მოღიმარი თვალებით მიყურებს და მადლობების კორიანტელში მახვევს, ამ დროს ვარ ძალიან ბედნიერი.
არასდროს დამავიწყდება მომენტი, როდესაც ასაკოვანი, 80 წლამდე ქალი მოვიდა, ყოფილი მსახიობი, რომელმაც შემდეგი სიტყვები მითხრა: „ისე არ გამალამაზოთ, ქალბატონო ექიმო, რომ ჩემმა მეგობრებმა ვერ მიცნონ“. ბოლოს რომ ადგა და სარკეში ჩაიხედა, ისეთი გაბრწყინებული მიყურებდა, ჩამეხუტა და გადამკოცნა. აი, ზუსტად ეს არის ყოველი დაღლილი დღის შემდეგ ჩემი მთავარი მოტივაცია მეორე დღისთვის.
როგორ უმკლავდებით სირთულეებს პროფესიულ საქმიანობაში?
რა თქმა უნდა, როგორც ყველა პროფესიულ საქმიანობაში, ჩვენთანაც არსებობს სირთულეები. მას რომ გავუმკლავდეთ, უნდა გავძლიერდეთ, ცოდნის საფეხურის ყველაზე მაღალ დონეზე უნდა ვიყოთ. ყველა პროფესიაში არის კონკურენცია, ამიტომ თუ ჩვენ ვიქნებით ძლიერები, ყველა სირთულის გადალახვა შესაძლებელი იქნება.
ოჯახის მხარდაჭერა რამდენად მნიშვნელოვანი იყო თქვენს წარმატებაში?
ჩემი ოჯახი ჩემი ყველაზე დიდი მოტივაცია და უდიდესი ბედნიერებაა, რაც შეიძლება დედის გულში არსებობდეს. მჯერა, რომ ნებისმიერი წარმატებული ადამიანის საფუძველი სწორედ საკუთარი ოჯახია. მთელი ჩემი სიხარული, სიყვარული და ბედნიერება ჩემს ოჯახს უკავშირდება.
რას ეტყოდით ქალებს, რომლებიც ფიქრობენ, რომ კარიერა და ოჯახი ერთმანეთთან შეუთავსებელია?
სხვათა შორის, ყოველთვის ვფიქრობდი, ამ თემაზე ვრცელი სტატია დამეწერა. ოჯახი და კარიერა ერთმანეთთან შეუთავსებელი არ არის. ადამიანს ყოველთვის უნდა ჰქონდეს ძალა და უნარი, სწორად გადაანაწილოს დრო და ენერგია. ოქროს შუალედის პოვნა პროფესიულ საქმიანობასა და ოჯახს შორის ნორმალური და სრულფასოვანი ცხოვრების აუცილებელი ნაწილია. სწორედ ამიტომ, ოჯახსა და კარიერას შორის შეუთავსებლობა არ არსებობს.
რა უნარჩუნებს ადამიანს სილამაზესა და ახალგაზრდობას?
ადამიანი, რომელიც სულითა და ხორცით კეთილია, რომელსაც სხვისი უბედურება გულთან მიაქვს და სხვისი ბედნიერება საკუთარი სიხარულივით ახარებს იმ დონემდე, რომ სიხარულის ცრემლებამდეც კი მიდის – სწორედ ასეთი ადამიანი იძინებს ღამე მშვიდად, რადგან მისი სული თავისუფალია ბოროტებისგან.
ახალგაზრდობისა და სილამაზის ყველაზე დიდი საიდუმლო კი სწორედ კეთილმოსურნეობაშია. როდესაც სარკეში იხედები და ხედავ დამშვიდებულ სულს და დამშვიდებულ სახეს, ამ დროს ხარ ბედნიერი და ახალგაზრდა. ეს არის სილამაზისა და ახალგაზრდობის შენარჩუნების ნამდვილი საიდუმლო.
ტექსტი: მარიამ შულაია
ფოტო: ლაურა ზოიძე
