რამდენი ხანია, რაც ხატავთ?
ბავშვობიდან დავიწყე ხატვა, ალბათ სკოლის ასაკიდან.
ყოველთვის პორტრეტებს ხატავდით?
ყველაფერს ვხატავდი, განწყობის მიხედვით.
როდის და ვისი პორტრეტი დახატეთ პირველად?
მრავალი წლის წინ, პირველად ჩემი და დავხატე, თუმცა იმიტომ არა, რომ მხოლოდ პორტრეტები მაინტერესებდა. უბრალოდ, ასე მომინდა იმ მომენტში. 13–14 წლის ვიქნებოდი იმ დროს.
თქვენთვის, როგორც მხატვრისთვის, რა არის ადამიანში ყველაზე მნიშვნელოვანი, მის დასახატად?
ყველაფერი ერთად. არასოდეს ვიცი, რა არის მთავარი. ალბათ ის, რაც არ ჩანს.
ამყარებთ იმ ადამიანებთან კომუნიკაციას, რომელთაც ხატავთ?
არასოდეს. არ ვეკითხები არაფერს. თუმცა კომუნიკაცია აუცილებელია კონკრეტული ადამიანის დასახატად.
რით ხატავთ?
ძალიან დიდი ხანი ზეთის საღებავებით ვხატავდი. შემდეგ აკრილით. ფაქტობრივად, ყველაფრით, რაც ხატავს.
ხატვა ერთგვარი წამალია სამკურნალოდ. თუ არ გაქვს საღებავი, ფიქრით დახატავ ან დაწერ, რომ „დავხატე“. არაჩვეულებრივი საშუალებაა.
დაახლოებით რამდენი ადამიანის პორტრეტი გაქვთ დახატული?
ძალიან ბევრი. 300-ზე ბევრად მეტი.
რა დრო სჭირდება ერთი ადამიანის დახატვას?
დაახლოებით 2-3 საათი. თუმცა ზოგჯერ შესაძლოა რამდენიმე შეხვედრაც გახდეს საჭირო. განწყობაზე და კიდევ სხვადასხვა გარემოებაზეა დამოკიდებული.
თქვენს ნამუშევრებში ყოველთვის გარკვეული ფერთა გამა ჭარბობს − ნაღვლიანი, სევდანარევი. აქვს ამას თავისი ახსნა?
თავისთავად მოდის ეს ფერები. არასოდეს ვფიქრობ წინასწარ. ასეთ ფერებში ვხედავ სამყაროს. ასეთი აღქმა მაქვს.
ხატწერით ან ფრესკებით ყოფილხართ გატაცებული?
კი, რა თქმა უნდა. შავნაბადას მონასტრის სატრაპეზო მოვხატე. იქ 2 წლის განმავლობაში ვიყავი.
არის ისეთი რამ, ან ვინმე, რისი ან ვისი დახატვაც გსურთ და ჯერ არ დაგიხატავთ?
დიახ, შესაძლოა რამდენიმეც იყოს ასეთი. მომენტი უნდა ყველაფერს.
კიდევ რით ხართ დაკავებული, მხატვრობის გარდა?
როდესაც საღებავი არ მაქვს, ვძერწავ. თუმცა პლასტილინითაც ნახატებს ვაკეთებ.
