ძველი ბათუმის ისტორიულ გულში, სადაც ყოველი კუთხე დროის სუნთქვას ატარებს, განსაკუთრებულ ყურადღებას იქცევს სასტუმრო „მონარქი“, სივრცე, რომელიც ქალაქის ავთენტურობას თანამედროვე ელეგანტურობასთან აერთიანებს. აქ, ძველი ბათუმის ხიბლი დახვეწილი ინტერიერის სტილს ერწყმის, ხოლო მასპინძლობა გამორჩეული დეტალებით იქმნება. „მონარქში“ თითოეული სივრცე ისეა დაგეგმილი, რომ სტუმარმა ერთდროულად იგრძნოს ისტორიული გარემოს სიმშვიდე, თანამედროვე კომფორტი. ფართო, ნათელი ოთახები, ქალაქის საუკეთესო ხედები, ლამაზი ტერასა და სერვისებით გაჯერებული სივრცე, სრულფასოვან დასვენებას უზრუნველყოფს.
სერვისებზე, უპირატესობებზე და იმ დეტალებზე, რაც სასტუმროს ძველ ბათუმში გამორჩეულობას სძენს, OK! ბათუმთან „მონარქის“ გენერალური მენეჯერი
ქართლოს კობალაძე ისაუბრებს.
„მონარქი“ ქალაქის იმ ნაწილში მდებარეობს, სადაც თითოეული ქუჩა ისტორიას ყვება. როგორ ახერხებს სასტუმრო, შეინარჩუნოს ამ უბნის ავთენტურობა და ამავდროულად – სტუმრებს შესთავაზოს თანამედროვე სტილი და კომფორტი?
„მონარქი“ ძველი ბათუმის გულშია, გარემოში, სადაც თითოეული ქუჩა ქალაქის ისტორიას ინახავს. ჩვენთვის მთავარი მიზანია, შევინარჩუნოთ ამ უბნის ავთენტური ხასიათი და მასთან ჰარმონიაში შევქმნათ თანამედროვე სტილი და კომფორტი. ამიტომ, შენობაში რჩება ძველი ბათუმისთვის დამახასიათებელი დეტალები, ინტერიერში კი ვიყენებთ თბილ, ბუნებრივ ტონალობებს, თანამედროვე დიზაინს, რაც მშვიდ, კომფორტულ და ამავე დროს ქალაქის ისტორიასთან ახლოს მყოფ ატმოსფეროს ქმნის. ასე ვუთავსებთ ერთმანეთს ტრადიციასა და თანამედროვეობას, რათა სტუმრებმა ერთდროულად იგრძნონ ავთენტური ბათუმი და თანამედროვე სტუმარმასპინძლობის სტანდარტები.
„მონარქის“ინტერიერი განსაკუთრებულად დახვეწილია. როგორ ფიქრობთ, რა ასოციაციები უნდა გაუჩნდეს სტუმარს, როცა ამ სივრცეში შემოვა?
„მონარქის“ ინტერიერი ისეა შექმნილი, რომ სტუმარმა პირველივე ნაბიჯზე იგრძნოს სიმშვიდე, კომფორტი და დახვეწილი სტუმარმასპინძლობა. გვინდა, რომ სივრცემ სტუმარს სისუფთავესთან, ჰარმონიასთან, თბილ ატმოსფეროსთან ასოცირება გაუჩინოს, რასაც ძველი ბათუმის ხასიათს და თანამედროვე ელეგანტურობას უთავსებს. თითოეული დეტალი იმისკენ არის მიმართული, სტუმარმა იგრძნოს, რომ სახლში დაბრუნდა – მშვიდ, მოწესრიგებულ და სტილში დაბალანსებულ გარემოში.
რას სთავაზობთ სტუმრებს, რომელი სერვისებია თქვენი მთავარი სიამაყე და რა ქმნის „მონარქის“ განსაკუთრებული სტუმართმოყვარეობის სტანდარტს?
„მონარქში“ სტუმრებს ისეთი სერვისების კომბინაციას ვთავაზობთ, რომელიც აძლევთ დასვენებისა და განტვირთვის სრულფასოვან საშუალებას. ჩვენი მთავარი სიამაყე სასტუმროს ტერასაა – სივრცე, სადაც სტუმრები დატკბებიან ცოცხალი მუსიკით, ულამაზესი საღამოთი და შესანიშნავი ხედებით. ასევე გვაქვს თანამედროვე სპა-ზონა, რომელიც აერთიანებს სრულყოფილი დასვენებისათვის საჭირო მომსახურებებს, პოპულარულია ბილიარდის ოთახი, რომელიც იდეალურია მეგობრებთან ან ოჯახის წევრებთან ერთად გასართობად. ასევე, ჩვენს პარტნიორ კომპანიებს საქმიანი შეხვედრებისთვის ვთავაზობთ საკონფერენციო დარბაზს, რომელიც 60 ადამიანზეა გათვლილი, აღჭურვილია თანამედროვე ტექნიკითა და ყველა საჭირო ინვენტარით. სასტუმროს, სრული კომფორტისთვის, სტუმრებისთვის აქვს მიწისქვეშა პარკირების ადგილი. ჩვენთვის განსაკუთრებული სტუმართმოყვარეობის სტანდარტს ქმნის კომფორტზე მუდმივი ზრუნვა, მომსახურების მაღალი ხარისხი და იმ ატმოსფეროს შექმნა, სადაც თითოეულ სტუმარს შეუძლია თავი განსაკუთრებულად და თავისუფლად იგრძნოს.
ტერასა „მონარქის“ ერთ-ერთი ყველაზე გამორჩეული წერტილია. რა ხიბლს მატებს მას ძველი ბათუმის ატმოსფერო?
მართლაც, „მონარქის“ტერასა ერთ-ერთი ყველაზე გამორჩეული წერტილია, სადაც ერთმანეთს ხვდება ძველი ბათუმის აურა და თანამედროვე დახვეწილობა. იდეა არის სტუმრების შემოსვლა შუადღის სიმშვიდიდან საღამოს ცოცხალ, ენერგიულ გარემოში. სწორედ ამიტომ, ტერასაზე განთავსებულია ჩვენი ჯაზ ბარი, სადაც ცოცხალი მუსიკა უნიკალურ ატმოსფეროს ქმნის. ტერასას განსაკუთრებულ ხიბლს მატებს ძველი ბათუმის ქუჩებისა და აივნების ხედები, ისტორიული გარემო და ჰარმონიული დიზაინი, რაც სტუმრებს საშუალებას აძლევს, იგრძნონ ქალაქის ავთენტურობა და ამავდროულად შეიგრძნონ „მონარქის“ ელეგანტური და თანამედროვე სტილი.
ბათუმში სასტუმროების საკმაოდ მრავალფეროვანი არჩევანია. თქვენი დაკვირვებით, რა გამოარჩევს „მონარქს“ სხვებისგან, რით იპყრობთ სტუმრების გულს?
სასატუმრო „მონარქი“ ძველი ბათუმის ცენტრში მდებარეობს, ეს უკვე უპირატესობაა. სტუმრებისთვის აქ ყოველთვის ხელმისაწვდომია ქალაქის მთავარი ისტორიული და კულტურული წერტილები. თუმცა, ჩვენს სასტუმროს სხვებისგან მხოლოდ მდებარეობა არ განასხვავებს, აქ დაგხვდებათ დახვეწილი ინტერიერი და სასტუმროს სახურავზე არსებული ულამაზესი ტერასა, კონკურენტებთან შედარებით დიდი ოთახები… სასტუმროს ასევე გამოარჩევს სტუმრებისთვის მიწისქვეშა პარკირების ზონა, რაც მათ დამატებით კომფორტს უქმნის. სტუმრების გულს ვიპყრობთ დეტალებზე ზრუნვით, მაღალი ხარისხის მომსახურებით და ისეთი ატმოსფეროს შექმნით, სადაც იგრძნობა როგორც ძველი ბათუმის აურა, ასევე თანამედროვე ელეგანტურობა.
წარმატებული სასტუმროს უკან ყოველთვის ძლიერი გუნდი დგას. როგორია თქვენი გუნდის ფილოსოფია, მიდგომები, სტანდარტი?
„მონარქის“ წარმატების უკან ნამდვილად დგას ჩვენი გუნდი, რომლის ფილოსოფიის საფუძველი სტუმრის ყოვლისმომცველი კომფორტია. ჩვენი მიდგომები ეფუძნება დეტალებზე ზრუნვას, თანამშრომლობას და მაღალი სტანდარტების მუდმივ შენარჩუნებას. გუნდის თითოეული წევრი ცდილობს, სტუმარს აგრძნობინოს განსაკუთრებული ყურადღება და ჰარმონია – როგორც ოთახებში, ასევე სასტუმროს ნებისმიერ სერვისში. სწორედ ეს ერთგულება, პროფესიონალიზმი და პედანტური სიზუსტე ქმნის „მონარქის“ უნიკალური სტუმართმოყვარეობის სტანდარტს და სტუმრების მაღალი შეფასებების საფუძველს.
რას უკავშირდება „მონარქის“ სამომავლო გეგმები, რა მიმართულებით აპირებთ განვითარებას, რომ სასტუმრომ კიდევ უფრო გაამყაროს თავისი პოზიცია ბათუმის ტურისტულ რუკაზე?
„მონარქის“ სამომავლო გეგმები მიმართულია ხარისხისა და სტუმართმოყვარეობის მუდმივ განვითარებაზე. გვსურს კიდევ უფრო გავაძლიეროთ ჩვენი სერვისები, შემოვიტანოთ ახალი გამოცდილებები ჯაზ ბარიდან დაწყებული, სპა – სერვისებითა და ბილიარდის ოთახით დამთავრებული, განვავითაროთ ჩვენი ინფრასტრუქტურა ისე, რომ სტუმრებს ქალაქის ცენტრში ყოფნისას სრულყოფილი კომფორტი და განტვირთვა შეეძლოთ. ამ ყველაფრის მიზანია „მონარქის“ პოზიციის მყარად შენარჩუნება ბათუმის ტურისტულ რუკაზე, როგორც სასტუმროსი, რომელიც აერთიანებს ავთენტურობას, ელეგანტურ სტილს და უნიკალურ სტუმართმოყვარეობას.
