მსახიობ მეთიუ პერის გარდაცვალებაში ბრალდებული ხუთი პირიდან ერთ-ერთის განაჩენი გამოაცხადა. კალიფორნიელი ექიმი, სალვადორ პლასენსია, რომელმაც პერის მედიკამენტი „კეტამინი“ გადასცა, სასამართლო დარბაზში დააპატიმრეს – ის ფედერალურ ციხეში ორწელიწადნახევარს გაატარებს.
მსახიობის დედამ, სიუზან მორისონმა ექიმს ემოციურად მიმართა და მისი მიმოწერა გაიხსენა, რომელშიც პლასენსიამ პერის იდიოტი უწოდა. „მასში იდიოტური არაფერი ყოფილა. თქვენ ფიცი დადეთ, რომ ადამიანებს დაიცავდით და ჩემი შვილიც უნდა დაგეცვათ“, – განაცხადა ქალმა.
თავად სალვადორ პლასენსიამ პერის ოჯახს ბოდიში მოუხადა. სასამართლოსთვის მიცემულ ახსნა-განმარტებაში მან თავისი კლინიკის ფინანსურ სირთულეებზე ისაუბრა და აღნიშნა, რომ პაციენტში ნარკო დამოკიდებულების ნიშნების მიუხედავად, „დიდი ფულის“ შეთავაზებამ მის ქმედებებზე გავლენა მოახდინა.
დანარჩენ ოთხ ბრალდებულს, მათ შორის მსახიობის პირად ასისტენტს, განაჩენს მომდევნო თვეებში გამოუტანენ.
ამერიკელ-კანადელი მსახიობი მეთიუ პერი, რომელიც ტელესერიალ „მეგობრები“-ში შესრულებული ჩენდლერ ბინგის როლით გახდა ცნობილი, 2023 წლის 28 ოქტომბერს გარდაიცვალა. მსახიობის სიკვდილის მიზეზად „კეტამინის მწვავე ეფექტები“ დასახელდა.
პერის საქმეზე დაკავებულთა შორისაა: ორი ექიმი, მეთიუ პერის თანაშემწე და ნარკოტიკული საშუალებით მოვაჭრე ორი პირი.
გამოძიება ამტკიცებს, რომ ბრალდებულებმა იცოდნენ, რომ ამით მსახიობს დიდ საფრთხეს უქმნიდნენ, მაგრამ პირადი მიზნებისთვის, მსახიობის ნარკოდამოკიდებულებით ისარგებლეს.
გავრცელებული ინფორმაციით, მეთიუ პერი კეტამინის კურსს გადიოდა, რაც შფოთვით აშლილობასა და დეპრესიასთან ბრძოლაში ეხმარებოდა, თუმცა მსახიობმა ბოლო კეტამინი კურსის ფარგლებს გარეთ მიიღო, რაც გარდაცვალების მიზეზი გახდა.
ასევე დაგაინტერესებთ
#OK! იხილეთ F.R.I.E.N.D.S-ის პირველი თრეილერი: სპეციალურ ეპიდოზს მაყურებელი 27 მაისს იხილავს
