წარმოგიდგენთ რუბრიკა OK! მენეჯერის კიდევ ერთ გამორჩეულ სტუმარს საზოგადოებასთან ურთიერთობის მენეჯერს და კონტენტ კრეატორს მაკა უდესიანს, რომელიც პროფესიით ჟურნალისტია და პარალელურად ფოტოგრაფიით და ვიდეოგრაფიითაა გატაცებული. დღევანდელ დღემდე საკმაოდ ვრცელი კარიერული გზა გაიარა და უამრავი საინტერესო გამოცდილებაც დააგროვა, რის შესახებაც თავად გვიამბობს ინტერვიუში.
გაგვეცნით და გვიამბეთ თქვენი საქმიანობის შესახებ.
მოგესალმებით. მე ვარ მაკა უდესიანი, პროფესიით ჟურნალისტი, მიუხედავად ძალიან საინტერესო პროფესიისა კიდევ უფრო საინტერესო და მრავალფეროვანი მონათესავე პროფესია ავარჩიე და 11 წელია ვარ PR/SMM მენეჯერი, საზოგადოებასთან ურთიერთობის მენეჯერი, ასევე ვქმნი კონტენტს სხვადასხვა ბიზნესისთვის, გატაცებული ვარ ფოტოგრაფიით და ამჟამად ვიდეოგრაფიით ვარ დაინტერესებული, საჰაერო გადაღებები DJI დრონის მეშვეობით. მიყვარს მოგზაურობა და ამ ეტაპისთვის მსოფლიოს 70-მდე სხვადასხვა ქალაქში ვარ ნამყოფი, ასევე მუდმივად ვმოგზაურობ საქართველოს ირგვლივ.
გზა რომელიც დღევანდელ დღემდე გაიარეთ. თქვენი სამუშაო გამოცდილებების შესახებ გვიამბეთ.
მიუხედავად იმისა, რომ პროფესიით ჟურნალისტი ვარ, უნივერსიტეტის დასრულების შემდგომ გაზეთში დავიწყე მუშაობა სტაჟიორად, თუმცა შემდგომ „კიკალა სტუდიოში“ აღმოვჩნდი სამუშაოდ, ამის შემდეგ იყო „საფილო“, „პივოტ პოინტ საქართველო“, „ანბანელა Super Kids“, „რესტორანი ნამდვილი“ და სხვადასხვა საინტერესო პროექტები. ამ კომპანიებთან თანამშრომლობის პერიოდში, პარალელურად ვიღრმავებდი ცოდნას და გავიარე სხვადასხვა კურსები, სოციალური მედიის მიმართულებით, შევისწავლე დიზაინი, კონტენტის შექმნა სხვადასხვა პროგრამის მეშვეობით. შევიტანე მნიშვნელოვანი წვლილი კომპანიების განვითარებაში. რა თქმა უნდა ეს დიდი შრომაა, მაგრამ როდესაც ძალიან გიყვარს შენი პროფესია ეს ბუნებრივად ხდება. მე მართლა მთელი გულით ვარ ჩართული ჩემი კომპანიების განვითარებაში, მუდმივად ვეცნობი სიახლეებს და ვცდილობ არ ჩამოვრჩე თანამედროვეობას.
როგორ ფიქრობთ რა არის მთავარი წარმატების მისაღწევად? როგორ ვიპოვოთ საყვარელი საქმე?
ჩემი აზრით უნივერსიტეტში სწავლის დროს ადამიანი კარგად ვერ აცნობიერებს რა პროფესიას დაეუფლოს, ამისთვის ძალიან ბევრი ძიება არის საჭირო, რა ინტერესები აქვს და მისი ინტერესების შესაბამისად მოძებნოს საქმე, რომელსაც უფრო გულიანად გააკეთებს. როდესაც მიხვდები რომ ამ საქმეს სიამოვნებით აკეთებ, შემდგომ არ უნდა გაჩერდე, მუდმივად უნდა ეძიო სიახლეებს და დარწმუნებული ვარ წარმატება გარდაუვალი იქნება.
რა გაძლევთ მოტივაციას?
მოტივაციის წყარო ძირითადად არის შედეგი. შედეგი საქმეში, თუმცა ეს მარტო არაა საკმარისი მოტივაციისთვის. ძალიან მნიშვნელოვანია პირადი სივრცე, რაშიც ჩემი ოჯახი ძალიან დიდ ენერგიას მაძლევს. მყავს 6 წლის შვილი და ძალიან დიდ დროს ვატარებთ ერთად, დავდივართ სამოგზაუროდ, გასართობად, ფაქტობრივად ერთად ვიზრდებით. შემიძლია ვთქვა, ეს არის უპირობო მოტივაცია ქალისთვის და შემგომ საყვარელი საქმე. ერთი მეორეს გარეშე ვერ წარმომიდგენია.
რას ურჩევდი მათ, ვინც ახლა იწყებენ კარიერას?
აუცილებელია ცოდნა მუდმივად გააღრმაონ და თუ რამე არ იციან აუცლებლად იკითხონ, ისწავლონ, მიიღონ ბევრი გამოცდილება სხვადასხვა კუთხით… დიდი გამოცდილების შემდგომ ყალიბდები პროფესიონალად, როდესაც შენს თავში დარწმუნებული ხარ ყველაფერი გამოდის! ვურჩევდი არ გაჩერდნენ, იბრძოლონ მიზნისკენ.
როგორია თქვენი მიზნები და სამომავლო გეგმები?
ჩემი მიზნები დაკავშირებულია საკუთარ პროფესიასთან, მინდა ისევ გავიღმაო ცოდნა ამჯერად ვებ-დეველოპმენტის კუთხით, სხვათაშორის გასულ წელს მქონდა გამოწვევა და ერთი კომპანიისთვის შევქმენი ვებგვერდი და ძალიან მომეწონა პროცესი. მიზნები დიდი და საინტერესოა, მინდა კიდევ უფრო მასშტაბურ პროექტებზე ვიმუშაო.
