ქართველი მაყურებელი ალექსანდრე ლორთქიფანიძეს კარგად იცნობს. იგი უმრავლესობისთვის ლიტერატურასთან, ინტელექტუალურ თამაშებთან და პოეზიასთან ასოცირდება. ამჯერად ალექსანდრე ლორთქიფანიძე OK! MEN- ის სტუმარია, რომელიც იმ ყველაფერზე უფრო სიღრმისეულად ისაუბრებს, რითაც ქართველმა საზოგადოებამ შეიყვარა.
როგორ აღმოჩნდით ლიტერატურის სამყაროში?
90-იანების დასაწყისში დიდად ბევრი გასართობი არ არსებობდა ბავშვისთვის. იყო ერთი ალტერნატივა ეზო,რომელშიც ასევე მიყვარდა ხოლმე ყოფნა, თუმცა მეორე იყო დიდი იდუმალებით მოცული სამყარო რასაც ერქვა ჩემი საოჯახო ბიბლიოთეკა.
პირველად რომელმა წიგნმა იქონია თქვენზე გავლენა?
მახსოვს პირველი ყველაზე დიდი შთაბეჭდილების მომხდენი წიგნი იყო ბიძია თომას ქოხი, რომელიც 6 წლისამ წავიკითხე. პიროვნულად ამ წიგნმა ძალიან გამზარდა.
რა გავლენა აქვს ლიტერატურას ადამიანზე?
ლიტერატურას აქვს უნარი, რომ ადამიანი არ იყოს მარტო. როდესაც კარგ წიგნს კითხულობ, თითქოს ვიღაცებს ელაპარაკები და არა ერთს.
რატომ ჯორჯ ორუელის „1984“?
ეს წიგნი ყველაზე სწორ დროს წავიკითხე ცხოვრებაში. მან ჩემში გააღვიძა მეამბოხე და შეურიგებელი არსება.
რა როლი აქვს “წიგნების თაროს”?
ლიტერატურაზე სიღრმისეული საუბარი სხვა ფორმატით ჯობია. წიგნების თაროზე აზარტული სხვა თამაშებიც არსებობს. ასე ცალ-ცალკე სხვა ბევრი ეფექტი აქვს, მაგრამ მთავარი ეფექტი არის ახალგაზრდებისთვის მოტივაციის მიცემა.
რომელი უნარები გეხმარებათ ღირსეულ კაპიტნობაში?
იმისათვის, რომ რა სად როდისში იყო კარგი კაპიტანი, რამდენიმე უნარია საჭირო. ერთი ეს არის ზოგადი ცოდნა, მეორე – გამბედაობა, მესამე – მოსმენის უნარი, მეოთხე ეს არის ლოგიკური, პრაგმატული აზროვნება, მეხუთე- ინტუიცია, რომელიც როცა ეს ყველაფერი არ მუშაობს, და ვერ მიჰყავხარ შედეგამდე, ბოლოს რჩები შენს ინტუიციასთან და უნდა მოარტყა მიზანში.
