სამხრეთ-აღმოსავლეთ აზიაში მდებარე მიანმარის რამდენიმე შტატი პერიოდულად როჰინჯა მუსლიმებსა და ბუდისტ მოსახლეობას შორის რელიგიური და ეთნიკური კონფლიქტების ასპარეზი ხდება.
ძნელი სათქმელია, ვინ არის დამნაშავე ამ დაპირისპირებაში, მაგრამ, როგორც ყოველთვის, მისგან ყველაზე მეტად, მშვიდობიანი მოსახლეობა ზარალდება. ადამიანები იძულებულნი არიან მშობლიური სახლები დატოვონ და თავის გადასარჩენად, მეზობელ ქვეყნებში გაიქცნენ. მიანმარელი დევნილების უმეტესობა თავს ბანგლადეშში აფარებს.
ფოტოს საშუალებით, რომელიც მედიაში შემთხვევით მოხვდა, ამ რეგიონში დევნილების მდგომარეობის შესახებ სოციალური მედიის მილიონობით მომხმარებელმა შეიტყო.
როდესაც კონფლიქტის გამო მისი სოფლის მოსახლეობამ სახლები დატოვა, მუჰამედ აიუბას ყველა ეუბნებოდა, რომ უნდა გაქცეულიყო და თავი გადაერჩინა, მაგრამ მან მშობლების დატოვებაზე უარი თქვა. მუჰამედმა 65 წლის პარალიზებული დედა და 85 წლის, მძიმედ დაავადებული მამა ნაქსოვ კალათებში ჩასვა და 160 კილომეტრი ზურგით ატარა.
შვიდი დღის განმავლობაში, მამაკაცი ჯუნგლებში, უღრან ტყეებსა და ციცაბო ბორცვებზე ფეხშიშველი მიდიოდა, საკვებისა და ცოტაოდენი წყლის ამარა დარჩენილი დაღლილობისგან კანკალებდა, მაგრამ მშობლებთან ერთად, წინ ნაბიჯ-ნაბიჯ მიიწევდა, სანამ სამივე ბანგლადეშში, უსაფრთხო ადგილზე არ მივიდა.
მუჰამედმა ადგილობრივ ჟურნალისტებს ინტერვიუ მისცა და თავისი ხალხის მდგომარეობაზე ისაუბრა. როდესაც ჰკითხეს, რატომ მარტო არ გაიქცა, მან უპასუხა – „ჩემი მშობლები ხელით მატარებდნენ, როდესაც სიარული არ შემეძლო. ახლა ჩემი ჯერია“.
სამწუხაროდ, კუტუპალონგის ლტოლვილთა ბანაკის საშინელ პირობებში, მუჰამედის მამა მალე გარდაიცვალა.
ასევე დაგაინტერესებთ
#OK! ისევ კევინი – აშშ-ში 12 წლის ბიჭი პოლიციას მის სახლში შეპარული ქურდის დაჭერაში დაეხმარა
