მაისის თვე სავსეა საინტერესო მოვლენებით. ეს თვე მზის დაბნელებით და დაბნელების დერეფნის გახსნით დაიწყო, რომელიც 16 მაისს მთვარის დაბნელებით დასრულდება. ერთად გავიგოთ თუ როგორი იქნება ზოდიაქოს 12 ნიშნისთვის მაისის თვის ასტროლოგიური პროგნოზი.
ვერძი 21.03-20.04
ძვირფასო ვერძებო! 2022 წლის მაისი თქვენგან მობილიზებას მოითხოვს. დატვირთული აპრილის შემდეგ, შესაძლოა საქმეზე ფოკუსირება გაგიჭირდეთ, თუმცა ჩათვალეთ, რომ ეს აუცილებელიც კი არის. მოიკრიბეთ ძალა და შეუდექით იმ გადადებული საქმეების კეთებას, რომელიც ამ თვისთვის მოიტოვეთ. ვერძებო, მაისმა შესაძლოა მოულოდნელი სიახლეებითაც გაგაკვირვოთ. ნუ დაიხევთ უკან, მიიღეთ გამოწვევები და გადადგით ახალი ნაბიჯები.
კურო 21.04-20.05
სცენაზე ტრიუმფალურად დაბრუნებულ ადელს 5 მაისს 34 წელი შეუსრულდება. ამ საოცრად ჯადოსნური, მიზანსწრაფული და თავდაჯერებული ქალის ცხოვრებაში 2022 წლის მაისში ბევრი სიახლე, მოულოდნელი სიხარული და წარმატება იქნება. როგორც ადელმა, აგრეთვე კუროს ნიშნით დაბადებულმა ადამიანებმა უნდა დაიმახსოვროთ, რომ ახლა სწორედ თქვენი დროა. მზე თქვენს ნიშანშია, რაც იმას ნიშნავს, რომ შეგიძლიათ მიიღოთ ყველაზე თამამი გადაწყვეტილებები, დაგეგმოთ საკუთარი მომავალი, იყოთ სპონტანური და ამავდროულად დაუვიწყარი მოგონებებით დაიხუნძლოთ.
ტყუპები 21.05-21.06
ძვირფასო ტყუპებო! 2022 წლის მაისის თვეში თქვენ ხართ აქტიური, ინიციატივიანი და მიზანსწრაფული. თამამად შეიძლება ითქვას, რომ თქვენი ენერგოტონუსი შესაშურად მაღალია. გირჩევთ ეს გარემოება თქვენ სასიკეთოდ გამოიყენოთ. იყავით ხმამაღალი და თავდაჯერებული, გარისკეთ ხშირად და მხოლოდ იშვიათ შემთხვევებში დაიხიეთ უკან. გახსოვდეთ: მალე მზე სწორედ თქვენს ნიშანში გადავა და წინ კიდევ უფრო დიდი ამბები გელოდებათ.
კირჩხიბი 22.06-22.07
ძვირფასო კირჩხიბებო! 2022 წლის მაისი იდეალური პერიოდია საქმიანი მოლაპარაკებებისთვის, შეხვედრებისთვის და თქვენი ორგანიზატორული ნიჭის გამოსავლენად. გამოიყენეთ თქვენი მებრძოლი სულისკვეთება, თუმცა მოერიდეთ სიხისტესა და პირდაპირობას. რამდენად იდეალურადაც შეიძლება ჟღერდეს თქვენთვის მაისის თვე, იმდენად დიდი პრობლემები შესაძლოა შეგიქმნათ მან თქვენი ქმედებებიდან გამომდინარე.
ლომი 23.07-23.08
ძვირფასო ლომებო! 2022 წლის მაისი მთლიანად ინდივიდუალურ საქმეებს უნდა დაუთმოთ. ნუ ეცდებით კოლექტიური ძალისხმევით ყველაფრის ფლობას − ეს სიკეთეს ამ თვის განმავლობაში სულაც არ მოგიტანთ. პირიქით − იყავით მეტად ფრთხილი და შორსმჭვრეტელი, გაზომეთ ასჯერ და მხოლოდ ერთხელ მიიღეთ გაჭრის გადაწყვეტილება. კონცენტრირდით მხოლოდ იმაზე, რასაც ამჟამად აკეთებთ და თქვენი ძალისხმევით მაისი იმაზე ნაყოფიერი იქნება, ვიდრე წარმოიდგენდით.
ქალწული 24.08-23.09
ძვირფასო ქალწულებო! 2022 წლის მაისის თვის განმავლობაში დროა ფრიად მნიშვნელოვან საკითხზე − თქვენი ემოციური რესურსის სწორად გადანაწილებაზე ფოკუსირდეთ. ქალწულებო, ხშირად თქვენს ცხოვრებაში საკუთარ თავს იმდენად რთულ დავალებას აძლევთ, რომ მისი შესრულება მოკვდავთათვის უბრალოდ შეუძლებელია, ამას კი ემოციურ ზიანამდე მიჰყავხართ. იზრუნეთ იმაზე, რომ თქვენმა მაისმა მეტად რაციონალურად ჩაიაროს.
სასწორი 24.09-23.10
ძვირფასო სასწორებო! 2022 წლის მაისში პოტენციური შესაძლებლობა გაქვთ თქვენი ფინანსური საკითხები ნელი ტემპით, თუმცა საგრძნობლად გააუმჯობესოთ. სასწორებო, თქვენი ენერგოტონუსი თვის განმავლობაში მაღალია, ენთუზიაზმით ხართ დამუხტული, მომავალს იმედიანად უყურებთ და თამამად შეგიძლიათ იგი ისე დაგეგმოთ, როგორც ისურვებდით, რომ განვითარდეს − თქვენი სურვილები ხომ საბოლოოდ მიზნებად გარდაისახება.
მორიელი 24.10-22.11
ძვირფასო მორიელებო! 2022 წლის მაისი თქვენთვის კარმული პერიოდია − ყველაფერი, მათ შორის განწყობა, ემოციები თუ სურვილები, რომლებიც წლის დასაწყისიდან კოსმოსში მიმართეთ, უკან იწყებენ დაბრუნებას. მორიელებო, ყური დაუგდეთ მეგობრებს − ისინი შესაძლოა თქვენთან საინტერესო იდეებითა და პროექტებით გამოჩნდნენ, რომელიც საბოლოოდ დიდ აღმოჩენებამდე მიგიყვანთ.
მშვილდოსანი 23.11-21.12
ძვირფასო მშვილდოსნებო! სპონტანური იმპროვიზაციებისთვის 2022 წლის მაისი ზედგამოჭრილი პერიოდია, ორიგინალური გადაწყვეტილებები და მიმღებლობა მთელი თვის განმავლობაში თან გდევთ. თუმცა გახსოვდეთ, რომ სპონტანურობა სულსწრაფობაში არ უნდა აურიოთ. ნუ დააჩქარებთ ისეთ მოვლენებს, რომლებიც ყოველთვის საჭიროებდა ფიქრსა და სიფრთხილეს. თუ ამ მარტივ პრინციპს ალღოს აუღებთ, ყველაფერი თქვენ სასიკეთოდ ჩაივლის.
თხის რქა 22.12-20.01
ძვირფასო თხის რქებო! 2022 წლის მაისის თვეში თქვენი ენერგოტონუსი მაღალია, განწყობა − საუკეთესო. რაც შეეხება ინტუიციას, უდავოდ თქვენ სასიკეთოდ მუშაობს და საუკეთესო გადაწყვეტილებების მიღებაშიც საკუთარი წვლილი შეაქვს. მაშ რა გჭირდებათ ამ თვეში? − ეს საყვარელი ადამიანების თანადგომა და მათგან ემოციური უკუკავშირია. რამდენად გულცივისა თუ უკარებას იმიჯიც უნდა გქონდეთ, ძვირფასი ადამიანების სითბოზე უარს მაინც ვერასდროს იტყვით.
მერწყული 21.01-20.02
ძვირფასო მერწყულებო! პროფესიული წინსვლა და კარიერული განვითარება − აი, რა უნდა გახდეს თქვენი მიზანი 2022 წლის მაისში. შესაძლოა თვის განმავლობაში რამდენიმე წინაღობა შეგხვდეთ, ან გაუთვალისწინებელ პრობლემას გადაეყაროთ, თუმცა მათი მოგვარება შესაძლებელია და თქვენც მარტივად მოახერხებთ საკუთარი წარმატებისკენ გზა დამაჯერებლად განაგრძოთ.
თევზები 21.02-20.03
ძვირფასო თევზებო! 2022 წლის მაისს შესაძლოა არ ჰქონდეს თქვენთვის ის სახარბიელო სტარტი, რომელსაც გეგმავდით, თუმცა თვის მეორე ნახევრიდან ყველაფერი გამოსწორდება. თქვენი ენერგოტონუსიც საკმაოდ მაღალ ნიშნულს მიაღწევს და მზად იქნებით ახალი მწვერვალების დასაპყრობად. თევზებო, ახლა ორჭოფობისა და ზედმეტი ფიქრის დრო არ არის − მაისი მოქმედებისთვისაა შექმნილი და ეცადეთ ეს კარგად გაიაზროთ.
ტექსტი: ნინო ზაკუტაშვილი
