ლორენ სანჩესმა 56-ე დაბადების დღე კარდაშიანების ოჯახის წევრთა გარემოცვაში, მდიდრული წვეულებით აღნიშნა. პარასკევს, 19 დეკემბერს, ჟურნალისტმა Amazon-ის დამფუძნებლის, ჯეფ ბეზოსის მეუღლის რანგში პირველი დაბადების დღე აღნიშნა. წვეულების მთავარი სტუმრები ქლოე კარდაშიანი და მისი დედა, კრის ჯენერი იყვნენ, რომლებმაც სანჩესთან ერთად ფოტოები გადაიღეს.
კარდაშიანსაც და ჯენერსაც ბეწვით გაფორმებული სადღესასწაულო სამოსი ეცვათ. კიმმა ნაცრისფერი მოკლე კაბა აირჩია ბეწვის მოსასხამით, კრისმა კი უპირატესობა შავ პალტოს მიანიჭა.
იუბილარი ტანზე მომდგარი, ლეოპარდის პრინტიანი შავი კოსტიუმით პოზირებდა. ქალბატონებმა წითელი Mercedes-ის კაბრიოლეტის წინ რამდენიმე სელფი გადაიღეს, რომელიც ხელოვნური თოვლითა და საშობაო განათებით იყო მორთული.
„შესანიშნავი საღამო. ლორენ, შენ უბრალოდ საუკეთესო ხარ. გილოცავ დღესასწაულებს და შობას”, – მიაწერა კრის ჯენერმა ფოტოს.
ცნობისთვის, ლორენ სანჩესი მილიარდერ ჯეფ ბეზოსს 2016 წელს, Amazon Studios-ის წვეულებაზე შეხვდა, რომელსაც მეუღლესთან, პატრიკ უაითსელთან ერთად დაესწრო. ორი წლის შემდეგ მათი გზები ისევ გადაიკვეთა -სანჩესი, რომელმაც იმ დროისთვის პილოტის ლიცენზია მოიპოვა და აეროფოტოგადაღების მიმართულებით მუშაობდა, ბეზოსის აეროკოსმოსურ კომპანია Blue Origin-ში პროექტებს შეუერთდა.
ლორენ სანჩესსა და ჯეფ ბეზოსს შორის რომანი 2019 წლის დასაწყისში, მას შემდეგ გახდა ცნობილი, რაც მილიარდერმა მაკენზი სკოტთან 25 წლიანი ქორწინების დასრულების შესახებ გამოაცხადა. იმავე წლის ოქტომბერში ერთმანეთს სანჩესი და მისი მეუღლეც დასცილდნენ. ლორენ სანჩესი და ჯეფ ბეზოსი 2023 წლის მაისში დაინიშნენ. საფრანგეთში მოგზაურობისას, მილიარდერმა საყვარელ ადამიანს იშვიათი, 30 კარატიანი ვარდისფერი ბრილიანტით გაფორმებული ბეჭედი აჩუქა. 2025 წლის 14 აპრილს ლორენ სანჩესმა თავისი ყველაზე ამბიციური ოცნება აისრულა – ის კოსმოსში Blue Origin New Shepard NS-31 კოსმოსური ხომალდით გაფრინდა. ფრენის დროს, რომელიც ათ წუთზე ოდნავ მეტხანს გაგრძელდა, სანჩესს კაფსულაში ახლდნენ მომღერალი კეტი პერი, ტელეწამყვანი გეილ კინგი, ინჟინერი და NASA-ს ყოფილი თანამშრომელი აიშა ბოე, კინოპროდიუსერი კერიან ფლინი და აქტივისტი და ნობელის მშვიდობის პრემიის ლაურეატი ამანდა ნგუენი.
ჯეფ ბეზოსისა და ლორენ სანჩესის ქორწილი ვენეციაში, 24 ივნისიდან 27 ივნისამდე პერიოდში გაიმართა. ქორწილს 200-მდე სტუმარი დაესწრო, მათ შორის მსახიობები, ტელეწამყვანები და სამეფო ოჯახების წარმომადგენლები იყვნენ.
ასევე დაგაინტერესებთ
