ილონ მასკმა პოპულარული ჩატ-ბოტი ChatGPT გააკრიტიკა და მას სიცოცხლისთვის სახიფათო უწოდა. მილიარდერი მეწარმის შეფასება მოჰყვა სტატიას, რომელშიც ChatGPT – თან ურთიერთობის შემდეგ 9 ადამიანის დაღუპვაზეიყო საუბარი. მსხვერპლთა შორის როგორც ზრდასრულები, ისე მოზარდები არიან.
„ნუ მისცემთ თქვენს ახლობლებს ChatGPT-ის გამოყენების უფლებას“, — დაწერა მასკმა სოციალურ ქსელში.
1 მარტს ცნობილი გახდა, რომ ილონ მასკმა, ChatGPT-ის შემქმნელ კომპანიას, OpenAI-ს და მის გენერალურ დირექტორს, სემ ოლტმანს, სასამართლოში უჩივლა. მეწარმის თქმით, მათ უარი თქვეს სტარტაპის საწყის მისიაზე – შეექმნათ ხელოვნური ინტელექტი კაცობრიობის სასიკეთოდ და არა მოგების მისაღებად.
სარჩელი, რომელიც კალიფორნიის უზენაეს სასამართლოში შევიდა, მასკსა და იმ სტარტაპს შორის არსებული ხანგრძლივი დაპირისპირების შედეგია, რომლის ერთ-ერთი დამფუძნებელი თავად მასკიც იყო.
მოგვიანებით, ილონ მასკმა საკუთარი ხელოვნური ინტელექტის სტარტაპი, xAI დააარსა, რომელიც გასული წლის ივლისში ამუშავდა.
ChatGPT-ის შემქმნელი კომპანია OpenAI-ის გენერალურმა დირექტორმა, სემ ოლტმანმა მასკის ბრალდებები უარყო. მან აღნიშნა, რომ ამჟამად ჩატ-ბოტს დაახლოებით მილიარდი ადამიანი იყენებს და შესაძლოა, ზოგ მათგანს არამდგრადი ფსიქიკა აქვს. სწორედ ამიტომ, შესაძლოა „რთული და ტრაგიკული სიტუაციები“ წარმოიქმნას. ამასთან, კომპანია მომხმარებლების წინაშე „უზარმაზარ პასუხისმგებლობას“ გრძნობს და ცდილობს ყველა ზომა მიიღოს, რათა ჩატ-ბოტთან ურთიერთობა კომფორტული და უსაფრთხო იყოს.
ოლტმანმა ასევე მიუთითა, რომ ადამიანების სიცოცხლეს საფრთხეს არა ჩატ-ბოტი, არამედ ილონ მასკის თვითმართვადი ავტომობილები უქმნიან. მან განაცხადა, რომ ავტოპილოტთან დაკავშირებულ ავარიებში სულ მცირე, 50 ადამიანი დაიღუპა. გარდა ამისა, ოლტმანმა ნეიროქსელი Grok-იც ახსენა, რომელსაც უხამსი კონტენტის შექმნაში ადანაშაულებენ, — იუწყება პორტალი The News International.
ახლახან ცნობილი გახდა, რომ ChatGPT მომხმარებელთა ასაკის შემოწმებას დაიწყებს. მოდელი შეისწავლის ანგარიშის არსებობის ხანგრძლივობას, აქტივობის დროსა და სხვა ფაქტორებს. ეს კომპანიას საშუალებას მისცემს, რომ 18 წლამდე ასაკის მომხმარებლები გამოავლინოს და მოზარდებისთვის „შესაბამისი გამოცდილება და უსაფრთხოების ზომები“ უზრუნველყოს, — ნათქვამია OpenAI-ის პრესრელიზში. შეცდომის შემთხვევაში, მომხმარებელს შეეძლება ჩატ-ბოტზე წვდომა აღიდგინოს, თუ ასაკს იდენტიფიკაციის სამსახურის მეშვეობით დაადასტურებს.
შეგახსენებთ, რომ ChatGPT ორგანიზაცია OpenAI-ის პროექტია, რომელიც წარმოადგენს ერთგვარ მცდელობას, რომ ხელოვნურ ინტელექტთან საუბარი ადამიანური გახდეს. მომხმარებლებს შეუძლიათ, ბოტს შეტყობინებების სახით, სხვადასხვა კითხვა დაუსვან, ხოლო ის კითხვებს უპასუხებს და ეცდება, ადამიანის საუბრის რიტმს მიბაძოს. პროექტი 2022 წლის 30 ნოემბერს ამოქმედდა. 2023 წლის იანვრისთვის ის გახდა ყველაზე სწრაფად მზარდი სამომხმარებლო პროგრამული აპლიკაცია ისტორიაში, მოიპოვა 100 მილიონზე მეტი მომხმარებელი და წვლილი შეიტანა OpenAI-ის ამჟამინდელი 300 მილიარდი დოლარის ღირებულების ზრდაში.
ასევე დაგაინტერესებთ
#OK! ილონ მასკი ისტორიაში პირველი ადამიანია, რომლის ქონება 600 მილიარდ დოლარს შეადგენს
