მსოფლიოს მეორე უმდიდრესი ადამიანი, Amazon-ის დამფუძნებელი ჯეფ ბეზოსი და ტელეწამყვანი, ჟურნალისტი, ყოფილი ვერტმფრენის პილოტი ლორენ სანჩესი ზაფხულში ქორწილს გეგმავენ. როგორც მიწვეული სტუმრებისთვის გაგზავნილი მოსაწვევები მოწმობს, წყვილი ვენეციის სანაპიროსთან ბეზოსის მდიდრულ იახტაზე იქორწინებს, რომლის ღირებულება 500 მილიონ ამერიკულ დოლარს შეადგენს.
წყვილმა ერთმანეთი „Blue Origin” -ისა და „Amazon” -ის საერთო ავიაციის პროექტზე გაიცნო. თავდაპირველი მეგობრობა მალევე სიყვარულში გადაიზარდა. 2019 წელს ბეზოსი თავის ყოფილ მეუღლეს, მაკენზი სკოტს, 25-წლიანი თანაცხოვრების შემდეგ დაშორდა. ლორენი მანამდე პატრიკ ვაითსელზე იყო დაქორწინებული, მათი ქორწინება 2018 წელს დასრულდა.
ბეზოსი და სანჩესი 5 წელზე მეტია ერთად არიან. 2023 წლის მაისში მილიარდერმა მას ხელი 20-კარატიანი, 2.5 მილიონი დოლარის ბრილიანტის ბეჭედით სთხოვა. წყვილმა ნიშნობა იტალიის ქალაქ პოზიტანოში აღნიშნა, რომელსაც ჰოლივუდის ვარსკვლავები და ცნობილი ბიზნესმენები ესწრებოდნენ.
ტაბლოიდები მათ შესაძლო ქორწინებაზე 2024 წლის დეკემბერში ალაპარაკდნენ , თუმცა ბიზნესმენმა ეს ინფორმაცია უარყო. წყვილი საზოგადოების წინაშე ხშირად ჩნდება ახლახანს ისინი ბევერლი ჰილსში გამართულ წვეულებას დაესწრნენ.
როგორც სხვადასხვა უცხოური მედია იუწყება, ქორწილამდე ლორენი კოსმოსში გაფრინდება კომპანია „Blue Origin“-თან ერთად პროექტის ფარგლებში. ამ ისტორიულ მისიაში მასთან ერთად იქნებიან ოპრა უინფრი, კეტი პერი, გეილ კინგი და სხვა ცნობილი სახეები. კოსმოსიდან დაბრუნების შემდეგ კი წყვილი საქორწინო სამზადისს შეუდგება.
