ფრანგული ბრენდი Lacoste რომელიც ცნობილია თავისი პოლოს მაისურებით, ახალ კოლექციაში საკულტო ლოგოტიპს ცვლის – ნიანგი ათი გადაშენების პირას მყოფი ცხოველის სახეობის გამოსახულებით შეიცვალა.
ფრანგულმა კომპანიამ, რომელიც 1933 წელს, ცნობილმა ფრანგმა ჩოგბურთელმა რენე ლაკოსტმა დააარსა, კოლექცია ბუნების დაცვის საერთაშორისო კავშირთან (International Union for Conservation of Nature) თანამშრომლობით შეიმუშავა.
სერია მოიცავს: ვაკიტა – 30, ბირმულ კუ – 40, ჩრდილოეთ ლემური – 50, იავური მარტორქა – 67, აღმოსავლური შავქოჩრიანი გიბონი – 150, კაკაპო – 157, კალიფორნიული კონდორი – 231, საოლა – 250, სუმატრული ვეფხვი – 350, ვირჯინიული ციყვი – 450.
ბრენდმა სულ 1775 პოლოს მაისური შექმნა. აღსანიშნავია, რომ თითოეული სახეობისთვის გამოშვებული მაისურების რაოდენობა ველურ ბუნებაში დარჩენილი ინდივიდების რაოდენობას ემთხვევა – თუ ბუნებაში ამა თუ იმ სახეობის 30 ცხოველია დარჩენილი, მაშინ მაისურიც 30-ია, თუ 450 ცხოველია დარჩენილი, მაშინ მაისურიც 450-ია. მაისურების შეძენა ბრენდის ონლაინ მაღაზიაშია შესაძლებელი. გაყიდვებიდან მიღებული შემოსავალი გადაშენების პირას მყოფი სახეობების მხარდამჭერ პროგრამებს მოხმარდება.
კოლექციის გამოშვებიდან დღემდე, თითოეული მაისური ისეთივე იშვიათი გახდა, როგორც მის მიერ წარმოდგენილი ცხოველის სახეობა. ეს მხოლოდ შეზღუდული კოლექცია კი არა, იმის შეხსენებაა, რომ ამ სახეობების გადასარჩენად დრო იწურება.
შეგახსენებთ, რომ უახლოეს მომავალში ცხოველთა და ფრინველთა სამყაროს რამდენიმე წარმომადგენლის ნახვა მხოლოდ ზოოპარკებში იქნება შესაძლებელი. ველური ბუნების ფონდის მიერ გამოქვეყნებული მონაცემების თანახმად, 1970 წლიდან დღემდე გარეული ცხოველების პოპულაცია 52%-ით შემცირდა. ცხოველთა რიცხვის შემცირების ყველაზე მკვეთრი ტენდენცია ტროპიკებშია შესამჩნევი. მაგალითისთვის, ცენტრალურ და სამხრეთ ამერიკაში გარეული ცხოველების რაოდენობა 83%-ით არის შემცირებული. აღსანიშნავია, რომ დროის იგივე მონაკვეთში, ადამიანთა რაოდენობა 3,7 მილიარდიდან 7 მილიარდამდე გაიზარდა.
