თითქმის 10-წლიანი პაუზის შემდეგ მეგან მარკლი შესაძლოა სამსახიობო კარიერას დაუბრუნდეს. ცნობები პირველად გასული კვირის ბოლოს გავრცელდა. Variety-მ და სხვა ჰოლივუდურმა გამოცემებმა გაავრცელეს ინფორმაცია, რომ მსახიობი სერიალის „The Gentlemen“ მესამე სეზონში შესაძლო მონაწილეობაზე მოლაპარაკებებს აწარმოებდა.
The Gentlemen გაი რიჩის 2019 წლის ამავე სახელწოდების კრიმინალური კომედიის მიხედვით შექმნილი სერიალია – მთავარი გმირი, არისტოკრატი ედი ჰორნიმანი, მამის გარდაცვალების შემდეგ ოჯახურ მამულს მემკვიდრეობით იღებს და აღმოაჩენს, რომ მისი ქონება დიდი ნარკობიზნესის დაფარვის მიზნით გამოიყენება.
სერიალში მთავარ როლებს თეო ჯეიმსი და კაია სკოდელარიო ასრულებენ.
მიუხედავად იმისა, რომ ახალი სეზონი ჯერ ოფიციალურად არ დაანონსებულა, გავრცელებული ცნობების თანახმად, მარკლისთვის კონკრეტული როლის შეთავაზება განიხილებოდა.
მოლაპარაკების წარმატებით დასრულების შემთხვევაში, ეს მისთვის სამსახიობო კარიერის მნიშვნელოვანი გაგრძელება იქნებოდა. მსახიობი მაყურებელმა სერიალ „Suits“-იდან გაიცნო, სადაც რეიჩელ ზეინის როლს ასრულებდა. მან სერიალი 2017 წელს დატოვა, პრინც ჰარისთან ქორწინების შემდეგ კი მსახიობობას ჩამოშორდა.
თუმცა 22 აგვისტოს ცნობილი გახდა, რომ მარკლი პროექტისთვის საერთოდ აღარ განიხილებოდა. ამის შესახებ ჟურნალისტმა თინა ბრაუნმა განაცხადა. მისი ინფორმაციით, სასექსის ჰერცოგინიას შესაძლო კასტინგმა ბრიტანეთში ძლიერი უკმაყოფილება გამოიწვია და მოლაპარაკებების გაგრძელება რთული გახდა.
ამასთან, მნიშვნელოვანია, რომ არც Netflix-ს და არც მარკლის წარმომადგენლებს ეს ინფორმაცია ოფიციალურად არ დაუდასტურებიათ.
მეგან მარკლის სამსახიობო გეგმებზე საუბარი მას შემდეგ გააქტიურდა, რაც ცნობილი გახდა, რომ ის და პრინცი ჰარი შვილებთან ერთად დიდ ბრიტანეთში დაბრუნებას გეგმავენ. ოჯახი ქვეყანაში ამ თვის ბოლოს ჩავა და ხანგრძლივი პერიოდით დარჩება. ბავშვები სექტემბრიდან ბრიტანულ სკოლაში დაიწყებენ სწავლას.
სასექსის ჰერცოგი და ჰერცოგინია 2020 წელს, სამეფო ოჯახის წევრების სტატუსზე უარის თქმის შემდეგ, ამერიკაში გადავიდნენ და კალიფორნიაში დასახლდნენ.
მათი დაბრუნება სამეფო ოჯახთან სრულ შერიგებას არ ნიშნავს. ჰარისა და მისი უფროსი ძმის, პრინც უილიამის ურთიერთობა კვლავ დაძაბულია, ბოლო ცნობებით, ძმებს ამ ეტაპზე ერთმანეთთან კონტაქტი არ აქვთ.
მიუხედავად ამისა, ბრიტანეთში დაბრუნება ჰარისთვის მხოლოდ ოჯახური მიზეზებით არ არის განპირობებული. ქვეყანაში ცხოვრებისას მას შესაძლებლობა ექნება, მეტი დრო დაუთმოს იმ საქველმოქმედო ორგანიზაციებსა და პროექტებს, რომლებთანაც წლების განმავლობაში თანამშრომლობდა. მათ შორისაა WellChild და Scotty’s Little Soldiers, ასევე Invictus Games.
