ფრანგული სტილი ყოველთვის ბუნებრივ ელეგანტურობასთან ასოცირდება – თითქოს ყველაფერი მარტივადაა, თუმცა საბოლოოდ ლუქი მაინც განსაკუთრებულად დახვეწილი გამოდის. ეს მიდგომა თმაზეც ვრცელდება:
ამ ვარცხნილობებს ერთი საერთო აქვთ – ზედმეტად „დავარცხნილად“ არ გამოიყურება. მსუბუქი ფენები, ბუნებრივი ტალღები და სახის ირგვლივ ჩამოშვებული თმა სწორედ ის დეტალებია, რომლებიც ფრანგულ იერს ქმნის. Vogue-ის მიხედვით, ამ ზაფხულის ყველაზე გამორჩეულ ვარცხნილობებს შორის ლილი-როუზ დეპის, ჯეინ ბირკინის, ბრიჯიტ ბარდოს, კატრინ დენევის და ჟანა დამასის სტილი დომინირებს.
ლილი როუზ-დეპი
ლილი-როუზ დეპის ვარცხნილობა თანამედროვე ფრანგული სტილის ერთ-ერთი გამორჩეული მაგალითია. მისი საშუალო სიგრძის თმა მსუბუქ ტალღებად და თითქმის შეუმჩნეველ ფენებადაა შეჭრილი, რაც ვარცხნილობას ბუნებრივ მოძრაობას და მოცულობას აძლევს.
სახის ირგვლივ ჩამოშვებული გრძელი ფენები განსაკუთრებით ლოყებსა და ნიკაპს უსვამს ხაზს. თმის ბუნებრივი ძირების გაზრდაც პრობლემას არ წარმოადგენს – პირიქით, განსხვავებული ტონები ვარცხნილობას მეტ სიღრმეს აძლევს.
ეს სტილი განსაკუთრებით უხდება ოვალური, გულის ფორმისა და კვადრატული სახის მქონე ქალებს.
ჯეინ ბირკინი
ფრანგული სტილი ჯეინ ბირკინის გარეშე წარმოუდგენელია. მისი გრძელი, სწორი თმა და სქელი, მსუბუქად ჩამოშვებული წინამო ათწლეულების შემდეგაც არ კარგავს აქტუალურობას.
ბირკინის სტილის მთავარი ხიბლი სწორედ მის სიმარტივეშია. წინამო თვალებთან ახლოს ჩამოდის და წარბებს ნაწილობრივ ფარავს. ეს ვარცხნილობა კარგი არჩევანია მათთვის, ვისაც ბუნებრივი და ნაკლებად ფორმალური იერი მოსწონს. განსაკუთრებით უხდება ოვალურ, გულის ფორმისა და წაგრძელებულ სახეებს.
ბრიჯიტ ბარდო
მოცულობითი ქერა თმა და შუაზე გაყოფილი, სახის ორივე მხარეს ჩამოშვებული წინამო ბარდოს გამორჩეული იმიჯის ნაწილი იყო.
ეს დღესაც აქტუალურია და განსაკუთრებით კარგად გამოიყურება მაშინ, როდესაც თმას ბუნებრივი მოცულობა აქვს.
განსაკუთრებით უხდება ოვალურ, გულის ფორმის, მრგვალ და კვადრატულ სახეებს.
კატრინ დენევი
კატრინ დენევის ვარცხნილობა ფრანგული ელეგანტურობის კიდევ ერთი კლასიკური მაგალითია. ამ სტილის მთავარი უპირატესობა მოძრაობაა – ფენები თმას უფრო მსუბუქს და ფორმირებულს ხდის, ამასთან, ვარცხნილობას მუდმივი ჩასწორება არ სჭირდება. მისი გაშრობა შესაძლებელია როგორც ფენით, ისე ბუნებრივად.
ეს სტილი განსაკუთრებით კარგად მუშაობს ოვალურ, მრგვალ და კვადრატულ სახეებზე. ამასთან, სწორად გაკეთებული ფენები უხდება როგორც სქელ, ისე თხელ თმას – სქელ თმაზე მოცულობის მართვაში გვეხმარება, თხელ თმას კი მეტ მოძრაობასა და ფორმას მატებს.
ჟანა დამასი
თანამედროვე პარიზული სტილის ერთ-ერთი ყველაზე ცნობადი სახე ჟანა დამასია – მოდის დიზაინერი და Rouje-ს დამფუძნებელი. მისი ვარცხნილობაც იმავე პრინციპს მიჰყვება: მარტივი, ქალური და ყოველდღიურად ადვილად სატარებელი.
დამასის საფირმო ვარცხნილობა გრძელი კარეა, რომელსაც სახის ორივე მხარეს მსუბუქად ჩამოშვებული წინამო და რბილი ტალღები ავსებს. მთავარი უპირატესობა კი მისი უნივერსალურობაა – ის სახის ფორმების უმეტესობას უხდება.
ასევე დაგაინტერესებთ:
#OK! 90-იანების Bixie – 2025 წლის ზაფხულის ყველაზე ტრენდული ვარცხნილობა
#OK! სილამაზის ახალი საზომი – რატომ არის „სუფთა“ სახე უფრო ლამაზი და ძვირი, ვიდრე მაკიაჟიანი
