Jonas Brothers ამერიკული პოპ-როკ ბენდია, რომელიც 2005 წელს სამი ძმის კევინის, ჯოს და ნიკის გაერთიანებით დაფუძნდა. ჯგუფმა თავდაპირველად პოპულარობა Disney Channel-ზე გამოჩენით მოიპოვა, ბენდმა პირველი ჩანაწერი Hollywood Records-თან თანამშრომლობით გამოუშვა. ძმები 2008 წელს ფილმებში Camp Rock და Camp Rock 2: The Final Jam გამოჩნდნენ, მოგვიანებით კი საკუთარი სატელევიზიო სერიალი Jonas შექმნეს. მრავალწლიანი წარმატებული მუსიკალური კარიერის შემდეგ ნიკმა, ჯომ და კევინმა ჯგუფის დაშლა გადაწყვიტეს, თუმცა ექვსწლიანი პაუზის შემდეგ გაერთიანდნენ და 2019 წლის პირველ მარტს პირველი სინგლი Sucker გამოუშვეს. ძმებმა ჯონასებმა აქამდე ოფიციალურად ხუთი სტუდიური ალბომი გამოუშვეს, გასული წლების განმავლობაში კი რიგით მეექვსე, ყველაზე განსხვავებულ ალბომზე Republic Records-თან თანამშრომლობით მუშაობდნენ. ბენდის ახალი ალბომი 2023 წლის მაისში გამოვა, მთავარი სინგლი Wings კი ალბომიდან რამდენიმე კვირის წინ გავრცელდა. ახალ ალბომს 70-იანი წლების პოპკულტურისა და Americana-ს ელემენტები ექნება, რომელიც, რა თქმა უნდა, თანამედროვე მელოდიასთან შერწყმით შესანიშნავ კომბინაციას შექმნის.
2013 წელს საზოგადოება შოკირებული იყო, როდესაც Jonas Brothers-ის წევრებმა დაგეგმილი ტურნეები გააუქმეს. მაყურებლის საყვარელი ბენდი ძალიან მოკლე პერიოდში დაიშალა. რამდენიმე წლის შემდეგ ნიკმა მოახერხა და მუსიკალურ ინდუსტრიაში თავი წარმატებული სოლო კარიერით დაიმკვიდრა, ჯო მაყურებლის წინაშე პოპ-როკ ბენდის DNCE-ის სახით გამოჩნდა, მესამე ძმამ კევინმა, რომელიც მათ შორის მამა პირველად გახდა, საკუთარი სამშენებლო კომპანია დააარსა. მარტივად რომ ვთქვათ, Jonas Brothers-ის წევრებმა ბენდის დაშლიდან კვლავ აღდგენამდე საწადელ მიზნებს ნამდვილად მიაღწიეს.
ჯო: ცხოვრების ამ ეტაპზე ჩვენ ვცდილობთ ვიმუშავოთ ბევრი, რათა გვქონდეს წარმატებული კარიერა, მაგრამ დაგვრჩეს საკმარისი დრო იმისთვის, რომ გავატაროთ საკმარისი დრო ოჯახის წევრებთან ერთად. ჩვენთვის პრიორიტეტულია, როგორც ძმებს გვქონდეს სამაგალითო ურთიერთობა.
ძმები ჯონასები ამჯერად დაოჯახებულები არიან, თუმცა სამივე სხვადასხვა ადგილას, ერთმანეთისგან მოშორებით ცხოვრობს. ნიკი მეუღლესთან, პრიანკა ჩოპრასთან და ერთ ქალიშვილთან ერთად ლოს ანჯელესში ცხოვრობს. ჯო, მისი მეუღლე სოფი ტერნერი და მათი ორი შვილი ერთად მაიამიში ცხოვრობენ, ხოლო მესამე ძმა კევინი, მეუღლესთან დენიელ ჯონასთან და ორ შვილთან ერთად ნიუ-ჯერსიში ცხოვრობს.
ნიკი: კარიერულმა პაუზამ ჩვენზე გარდამტეხი ზეგავლენა მოახდინა. ჩვენ ცხოვრებაში ვიპოვეთ ჩვენი პარტნიორები, რამაც ჩვენ რადიკალურად შეგვცვალა. ვფიქრობ, ოჯახების შექმნამ სამივე ძმა პიროვნულად ნამდვილად გაგვზარდა. პირადად, მე ბედნიერი ვარ, რომ გამიმართლა და ვიპოვე ადამიანი, რომელიც დრეს ყველაფერში მეხმარება, ვფიქრობ მეც, კევინსაც და ჯოსაც ცხოვრების ახლა ერთ-ერთი ყველაზე საუკეთესო წლები გაქვს.
ჩვენ ძალიან ბევრს ვფიქრობდით იმაზე, თუ როგორი ალბომი შეგვექმნა, დღეს გვისმენს ძალიან ბევრი ადამიანი, რომლებიც არიან სხვადასხვა თაობის წარმომადგენლები. როგორ უნდა შეგვექმნა ალბომი, რომელიც ისაუბრებდა ჩვენი ცხოვრების მნიშვნელოვან პერიოდზე? გვინდოდა გვეპოვნა უნივერსალური გზა, რომ ჩვენი პერსონალური სურვილები კარგად გამოგვეხატა.
კევინი: 70-იანი წლების მუსიკამ ნამდვილად დიდი გავლენა მოახდინა ჩვენს შემოქმედებაზემ განსაკუთრებით Bee Gees-მა. ჩვენ ფაქტობრივად მათთან ერთად გავიზარდეთ. ისინიც სამი ძმანი იყვნენ და ჩვენ საკუთარ თავთან მსგავსებები მალევე ვიპოვეთ. სწორედ ამიტომ, აუცილებლად შენიშნავს მსმენელი 70-იანი წლების პოპკულტურის ელემენტებს ჩვენს ახალ ალბომში.
ახალ ალბომთან დაკავშირებით ძმებმა საზოგადოებას ფავორიტი სიმღერების სახელებიც გაუზიარეს.
ჯო: Wings – ყველაზე მოკლე სიმღერაა ალბომში, მაგრამ ჩემთვის ეს სიმრერა ძალიან მნიშვნელოვანია, რადგან თრეილერივითაა, რომელიც მთლიანად ალბომისთვის გვამზადებს. ასევე ძალიან მომწონს Montana Sky, ამ სიმრერაში ისმის გიტარის და სხვა კლასიკური ინსტრუმენტების მელოდიები, რაც მას განსაკუთრებულად ლამაზს ხდის.
კევინი: Vacation Eyes – დაფუძნებულია იმაზე, თუ როგორ დაიწყო ჩემი და ჩემი მეუღლის ურთიერთობა. ჩვენ ერთმანეთს შევხვდით არდადეგებზე, სადაც დაიწყო ჩვენი სიყვარულის ისტორია. ამ სიმღერას რომ ვუსმენ, ყოველთვის სანაპიროზე მინდება ყოფნა და ძველი დროის დაბრუნება.
ნიკი: ჯერ კიდევ ვერ ამირჩევია ჩემი ფავორიტი Little Bird-სა და Waffle House-ს შორის. ეს სიმღერები ყველაზე კარგად გამოხატავს ჩვენს სტილს, რაც უკავშირდება 70-იანი წლების მუსიკას, ვიმედოვნებ, ჩვენს გულშემატკივრებს ჩვენი ახალი ალბომი ძალიან მოეწონებათ.
