ბოლო დღეებში ჰოლივუდი ჯონ ტრავოლტასთან დაკავშირებულმა სკანდალმა შეძრა. სამშაბათს, 16 დეკემბერს, ელვის პრესლის ყოფილი ცოლის, პრისცილა პრესლის და მისი შვილის, ნავარონე გარიბალდის, მრავალმილიონიანი სასამართლო პროცესი დაიწყო.
ელვის პრესლის ოჯახთან დაკავშირებულ სასამართლო პროცესში ჯონ ტრავოლტას სახელი მოულოდნელად გაჟღერდა. Daily Mail-ის ცნობით, მსახიობის მოზარდი ვაჟი, რომელიც გარდაცვლილ მეუღლესთან, კელი პრესტონთან შეეძინა, შესაძლოა როკ-ნ- როლის მეფის შვილთაშვილი იყოს. სასამართლოში სარჩელი პრისცილა პრესლის ყოფილმა ბიზნესპარტნიორებმა, ბრიჯიტ კრუსმა და კევინ ფიალკომ შეიტანეს და ხელშეკრულების სავარაუდო დარღვევისთვის 50 მილიონი დოლარი მოითხოვეს.
საქმის მასალების მიხედვით, ჯონ ტრავოლტას მეუღლეს, კელი პრესტონს შვილის გაჩენა არ შეეძლო, ამიტომ წყვილმა ელვისის ერთადერთ შვილს, ლიზა მარის კვერცხუჯრედების გადაცემა სთხოვეს. ლიზა მარიმ ცოლ-ქმრის თხოვნა გაითვალისწინა და მათ კვერცხუჯრედები გადასცა.
ჯონ ტრავოლტა და კელი პრესტონი შვილთან, ჯეტთან ერთად. ჯონ ტრავოლტას სოციალური ქსელი
პირველი შვილის გარდაცვალების შემდეგ, ჯონ ტრავოლტამ და მისმა ცოლმა კიდევ ერთი შვილის ყოლა გადაწყვიტეს, თუმცა, იმ დროისთვის უკვე ცნობილი იყო, რომ ლიზა მარი ნარკოტიკებზე დამოკიდებულებით იტანჯებოდა. პრისცილა პრესლის ყოფილი თანაშემწეების თქმით, ტრავოლტამ და პრესტონმა გადაწყვიტეს, მომღერლის ქალიშვილის კვერცხუჯრედების ნაცვლად, მისი შვილიშვილის, რაილი კიოს მიერ მიწოდებული ბიოლოგიური მასალა გამოეყენებინათ.
„გარიგების სანაცვლოდ, რაილი კიომ ძველი იაგუარი და 10 000-დან 20 000 დოლარამდე თანხა მიიღო“, – ნათქვამია სკანდალურ მასალებში.
ამგვარად, გახმაურებული სასამართლო დოკუმენტების თანახმად, ტრავოლტას უფროსი შვილები ელვის პრესლის შვილიშვილები არიან, ხოლო მისი უმცროსი ვაჟი – მისი შვილთაშვილი, იუწყება Daily Mail.
კელი პრესტონი და ჯონ ტრავოლტა ქალიშვილ ელასთან და ვაჟ ბენჯამინთან ერთად
ლიზა მარი ბრალდებებს ვერ უპასუხებს – ელვის პრესლის ერთადერთი მემკვიდრე 2023 წლის 12 იანვარს, 54 წლის ასაკში გარდაიცვალა. რაილი კიო სკანდალურ საქმეში არ ფიგურირებს – საქმეში მოპასუხეები პრისცილა პრესლი და მისი ვაჟი, ნავარონე გარიბალდი გარსია არიან. პოპის მეფის 36 წლის შვილიშვილს შოკისმომგვრელ განცხადებებზე კომენტარი არ გაუკეთებია.
საქმის მასალებში ინფორმაციის სავარაუდო წყაროდ არაერთხელ არის დასახელებული ლიზა მარის ყოფილი ქმარი მაიკლ ლოკვუდი და მისი 17 წლის ტყუპი ქალიშვილების, ჰარპერისა და ფინლის მამა, თუმცა, 61 წლის პროდიუსერი კატეგორიულად უარყოფს ოჯახური საიდუმლოებების ბრიჯიტ კრუზისა და კევინ ფიალკოსთვის გამხელას.
„ეს უბრალოდ სიგიჟეა. ამის შესახებ არაფერი მსმენია“, – თქვა მაიკლმა.
რაილი კიო და ლიზა მარი პრესლი
სარჩელში ზემოთხსენებული ფაქტების დასადასტურებლად არანაირი სამედიცინო დოკუმენტაცია არ არის წარმოდგენილი. აპრილში ტრავოლტამ გარდაცვლილი შვილის ფოტო გამოაქვეყნა, რომელიც ამ დღეს 33 წლის გახდებოდა.
„გილოცავ დაბადების დღეს, ჯეტ, ძალიან მენატრები! სამუდამოდ მიყვარხარ!“ – დაწერა „ოქროს გლობუსის“ და „ემის“ ჯილდოს მფლობელმა.
ჯონ ტრავოლტა შვილებთან ერთად
შეგახსენებთ, რომ ჯონ ტრავოლტასა და კელი პრესტონის ქორწინება 29 წელი გაგრძელდა, სანამ 57 წლის მსახიობი და მოდელი 2020 წელს, მკერდის კიბოთი არ გარდაიცვალა. წყვილის პირველი ვაჟი, ჯეტი, 2009 წელს, 16 წლის ასაკში, ბაჰამის კუნძულებზე მდებარე სახლში, კავასაკის დაავადებით გამოწვეული ეპილეფსიური კრუნჩხვით გარდაიცვალა. ჯონ ტრავოლტას კიდევ ორი შვილი ჰყავს: 25 წლის ელა და 15 წლის ბენჯამინი.
ასევე დაგაინტერესებთ
#OK! ვარსკვლავების უხერხული მომენტები: სახალისო კადრები, რომლებიც ისტორიას დარჩება
