ჟურნალი OK! წარმოგიდგენთ Best Model of Azerbaijan-2022-ის გამარჯვებულს, ლიზა უზუნს. მიუხედავად აღნიშნული წარმატებისა, ლიზამ გადაწყვიტა ბედი სხვა სფეროში სცადოს, ის მალე თავისი პირველი სინგლის გამოშვებას გეგმავს. თუ რა აკავშირებს ლიზას საქართველოსთან და როგორია მისი სამომავლო გეგმები, გაიგეთ ჩვენი ინტერვიუდან.
ლიზა, მოგვიყევით თქვენ შესახებ….
ბავშვობა საქართველოში გავატარე, 12 წლამდე აქ ვიზრდებოდი. ასე რომ, ჩემი ბევრი კარგი მოგონება სწორედ ამ ქვეყანას უკავშირდება. მართალია, ხშირად არ გამომდის, მაგრამ დღემდე მიყვარს საქართველოში ჩამოსვლა, მომწონს სტუმართმოყვარე ხალხი, უგემრიელესი სამზარეულო და შესანიშნავი ბუნება. 12 წლიდან კი სტამბულში ვცხოვრობ.
რაც შეეხება ჩემს სამოდელო კარიერას, სიმართლე გითხრათ, მას მხოლოდ ჰობიდ აღვიქვამდი. მახსოვს, ბოლო წუთს მივიღე Best Model of Azerbaijan-2022-ში მონაწილეობის გადაწყვეტილება. მეგობართან ვიხუმრე, მეც ხომ არ მეცადა ბედი-მეთქი და რატომაც არა?! შემდეგ დამიკავშირდნენ ორგანიზატორები და ასე მოვხვდი აღნიშნულ კონკურსში, სადაც გავიმარჯვე. ამ ყველაფერს მოჰყვა შემოთავაზებები სააგენტოებიდან, ვმონაწილეობდი გადაღებებშიც, თუმცა ჩემი სამომავლო გეგმები მაინც სხვა სფეროს უკავშირდება.
სანამ სამომავლო გეგმებზე გკითხავთ, მოგვიყევით როგორია თქვენი ერთი დღე?
ჩემი დღე იწყება ფიტნესით, ვცდილობ ვიყო აქტიური და დრო სწორად გადავანაწილო. ასევე, ძალიან მიყვარს იოგა და გოლფი. მიუხედავად დატვირთული რეჟიმისა, ვცდილობა ამ ყველაფრისთვის დრო გამოვნახო, სხვანაირად არ გამოვა. თუ ჩემი ჰობისთვის არ დამრჩა დრო, მაშინ ბალანსსაც ვერ დავიცავ. ჩემთვის სასიცოცხლოდ მნიშვნელოვანია სულიერი და კარიერული განვითარების ბალანსი.
როგორია თქვენი თავის მოვლის რუტინა?
ძალიან მომწონს სახლში დამზადებული ნატურალური თავის მოვლის საშუალებები, როგორიცაა, მაგალითად, ბრინჯის ტონერი, რაც ძალიან კარგია სახისთვის – ეს კორეული თავის მოვლის საშუალებაა. ასევე მომწონს როზმარინისგან დამზადებული თმის მოვლის საშუალება, რომელიც სწრაფად ზრდის თმას და ასევე სიჯანსაღეს მატებს.
დაახასიათეთ თქვენი თავი სამი სიტყვით…
მიზანდასახული, შრომისმოყვარე და კეთილი.
წარმატება მოაქვს…
თავდაუზოგავ შრომასა და მიზანდასახულობას.
როგორია თქვენი სამომავლო გეგმები?
ჩემი სამომავლო გეგმები მუსიკას უკავშირდება, მალე გამოვა ჩემი პირველი სინგლი, სახელწოდებით HABIBI COME TO DUBAI. მომღერლობა ჩემი ბავშვობის ოცნებაა, ძალიან მინდა მყავდეს ჩემი მსმენელი, როგორც საზღვრებს გარეთ, ისე საქართველოში. მუსიკა ჩემთვის ყველაფერია, ჩემთვის ის ბედნიერების წყაროა. მინდა ჩემი მუსიკით კვალი დავტოვო დედამიწაზე.
