PLAN USA – ასე ქვია მობილურ აპლიკაციას, რომელიც სპეციალურად შეიქმნება იმ ადამიანებისთვის, ვინც ამერიკაში აპირებენ მოგზაურობას. იდეის ავტორი ნიუ-იორკში მცხოვრები მარიკა დვალიშვილია. მარიკა პროფესიით ტურიზმის მენეჯერია, საქართველოში წარმატებული კარიერის შემდეგ ცხოვრება უკვე რამდენიმე წელია, რაც ნიუ-იორკში გააგრძელა.
მარიკა ამბობს, რომ მისი პროფესიიდან გამომდინარე კარგად იცის რამდენად რთული და სტრესულია მოგზაურობის დაგეგმვა და იდეა, რომ მოგზაურებისთვის მობილური აპლიკაცია შეექმნა სწორედ აქედან წამოვიდა.
PLAN USA – შეერთებულ შტატებში ჩამოსულ ტურისტებს ვიზიტის დაგეგმვაში დაეხმარება. ეს აპლიკაცია გააერთიანებს კულტურულ და გასართობ ღონისძიებებს, საკვებ ობიექტებს, ტურისტულ სანახაობებსა და ადგილობრივ გიდებს. მობილური აპლიკაცია ინტერნეტში გაბნეულ ინფორმაციას ერთ პლატფორმაზე მოუყრის თავს, რაც ტურისტს მოგზაურობის დაგეგმვის სტრესს თავიდან ააცილებს. რაც მთავარია, PLAN USA დაგეხმარებათ საკუთარი გემოვნების გათვალისწინებით აირჩიოთ აქტივობები და დაგეგმოთ შეერთებულ შტატებში მოგზაურობა. მთავარ აქცენტს კი PLAN USA ე.წ. პასუხისმგებლიან ტურიზმზე აკეთებს, რაც კულტურული მემკვიდრეობის დაცვასა და ეკო ტურიზმის პოპულარიზაციას გულისხმობს – აღნიშნა მარიკა დვალიშვილმა.
მარიკა ტურიზმის მენეჯერად 10 წელზე მეტია მუშაობს. წარმატებულ კომპანიებში კარიერის შემდეგ უკვე საკუთარი ტურისტული კომპანიაც გახსნა, რომელსაც დღეისთვის ნიუ-იორკიდან მართავს.
მსოფლიოს ტურისტულ ცენტრად აღიარებულ ნიუ-იორკში მარიკა პირველად 2019 წელს ჩავიდა, მაშინ როდესაც New York Times-ის მიერ ორგანიზებულ ტურისტულ გამოფენაში მიიღო მონაწილეობა და საქართველო ამერიკულ აუდიტორიას გააცნო. აქვე არაერთი წარმატებული მოლაპარაკება სხვადასხვა ამერიკულ კომპანიასთან აწარმოა. მარიკა ამბობს, რომ პირველმა ვიზიტმა ნიუ-იორკში იმდენად დიდი შთაბეჭდილება მოახდინა მასზე, რომ მაშინვე მიხვდა საკუთარ მომავალსა და პროფესიას აუცილებლად ამ ქალაქს დაუკავშირებდა.
მისი კარიერის მანძილზე ყველაზე მეტად იმით ამაყობს, რომ საქართველოს ტურიზმის წარმატებაში წვლილი მიუძღვის და უამრავ ადამიანს მთელი მსოფლიოდან საქართველო შეაყვარა. ახლა კი მის ცხოვრებაში ახალი გამოწვევის დროა. მისი თქმით, PLAN USA-ზე მუშაობა უკვე აქტიურ ფაზაშია და მობილური აპლიკაციის ამოქმედება 2026 წლისთვის იგეგმება.
