მოგესალმებით, ძვირფასო მკითხველებო!
გადავწყვიტე, ივნისის ბიუთი-სარედაქტორო მივუძღვნა სხეულის კანის მოვლას. მოვლისას ხშირად განსაკუთრებული აქცენტები გვაქვს სახის მოვლაზე და სხეულს ნაკლებ ყურადღებას ვუთმობთ, რასაც სათანადო შედეგამდეც მივყავართ. სხეულის კანის მოვლის დროს ვხელმძღვანელობთ ფაქტობრივად იმავე პრინციპებით, რაც სახის შემთხვევაშია აქტუალური: სრულყოფილი წმენდა, ექსფოლიაცია, დატენიანება და მზისგან დაცვა.
სხეულის წმენდა/დაბანაზე დიდხანს არ გავჩერდები, რადგან ნებისმიერი კულტურული ადამიანის უმარტივეს ჰიგიენას წარმოადგენს და ყველა მეტ-ნაკლებად ასრულებს.
გადავიდეთ მეორე ეტაპზე – ექსფოლიაციაზე. ხშირად ჩივიან ადამიანები, რომ ტანის დატენიანება თითქოს არ ჰყოფნით, რომ კანი მაინც გამომშრალია, უხეში და ხაოიანია და ა.შ. ამის მთავარი მიზეზი კი არა არასათანადო დამატენიანებელი, არამედ სწორედ ისაა, რომ არ ვატარებთ შესაბამის პილინგს, ექსფოლიაციას, შესაბამისად, სხეულის კანზე მრავლადაა დაგროვილი მკვდარი უჯრედები, რომელიც ფარავს ახალგაზრდა უჯრედებს და ისინი ვერ იღებენ ტენს პროდუქტისგან. თუ ეპიდერმისი საგულდაგულოდ არ გავათავისუფლეთ მკვდარი უჯრედებისგან, ახალგაზრდა უჯრედები ზემოდან მოდებული ნადებისა და ჭუჭყისგან, დატენიანება ვერ იქნება სრულყოფილი. პირველი საშუალება, რაც ამ პრობლემის გადაჭრაში გვეხმარება, არის სხეულის უხეში ღრუბელი ან ჯაგრისი, რაც შეიძლება თამამად განვიხილოთ სხეულის ეპიდერმისის სრულყოფილად წმენდის საშუალებად. მე გირჩევთ, რომ 1-2 კვირაში ერთხელ ინტერვალით კანი აუცილებლად დაიმუშაოთ ამ საშუალებით, ტანის დასაბან გელთან ერთად. ღრუბელი/ჯაგრისი გამოიყენეთ ყელის და დეკოლტეს მიდამოებზეც. შემდეგ კი აუცილებლად იხმარეთ სკრაბები, სასურველია, არა ფაქიზი, არამედ მძლავრი ზემოქმედების გრანულებიანი სკრაბები, რომელიც კარგად ჩამობანს და გაათავისუფლებს კანს ნარჩენი ჭუჭყისა და მკვდარი უჯრედებისგან. სკრაბის გამოყენება მიზანშეწონილია ყოველდღეც კი, თქვენი მხრიდან საჭიროების მიხედვით. ამ ეტაპების ჩატარების შემდეგ კი სრულად დაიტენიანეთ სხეული.
მინდა თქვენი ყურადღება განსაკუთრებით გავამახვილო ყელსა და დეკოლტეზე – ჩვენი სხეულის უფაქიზეს არეებზე, რომელიც პირველ რიგში მეტყველებს ჩვენს ასაკსა და დაბერების დონეზე. არასდროს დაივიწყოთ ამ უბნების კარგად დასკრაბვა, ძალიან კარგი იქნება თუ დაბანის შემდეგ გამოიყენებთ ტონერს და კანს კარგად გადაიწმენდთ ტონერიანი ბამბით. შემდეგ კი შეეცადეთ ყელისა და დეკოლტეს არეები დაიტენიანოთ უმეტესად სხეულის ბალზამით ან კარაქით – მსუყე კონსისტენციის დამატენიანებლებით. ასევე, სასურველია ყელსა და დეკოლტეზე ჩაიტაროთ შესაბამის სეზონზე მსუბუქი ქიმიური პილინგის პროცედურები, რომელიც სრულყოფილად გაათავისუფლებს კანს მკვდარი უჯრედებისგან, სტატიკურ ნაოჭებს გაწმენდს და მოგცემთ შესანიშნავ anti-age ეფექტს.
ასევე, ცალკე განვიხილოთ ტერფებსა და იდაყვებზე კანის მოვლა, რადგან ამ ნაწილებზე კანი შესამჩნევად უხეში და გამომშრალია. პირადად ჩემთვის ძალიან მოსახერხებელია სკრაბის დატანამდე, კვირაში ერთხელ ტერფების ელექტროპილინგის აპარატით დამუშავება, რომელიც სრულყოფილად და ფაქიზად აშორებს მკვდარ კანს, ისე, რომ არც ბარიერს აზიანებს და სათანადო შედეგსაც იძლევა. სწორედ ამ ფაქიზი და ზუსტი მოქმედების სისტემის გამო მირჩევნია ელექტროაპარატი მექანიკურ სახეხ საშუალებებს. დასატენიანებლად ტერფებსა და იდაყვებზე გირჩევთ გამოიყენოთ შარდოვანას (urea) შემცველი საშუალებები, რომელიც მრავლად არის წარმოდგენილი სააფთიაქო ქსელებში. თუ კანი ძალიან გამომშრალია, მსუყედ წაისვით კრემი და 2 საათით ან მთელი ღამით ნატურალური ბამბის წინდები ამოიცვით, დილას ტერფებზე ბავშვის კანით გაიღვიძებთ.
ახლა კი, ივლისის ნომრამდე გემშვიდობებით.
საუკეთესო სურვილებით,
თქვენი თაკო გვაზავა
ჟურნალი OK!-ს ბიუთი რედაქტორი
