ლუდის მოყვარულებმა კარგად იციან, რომ ქუთაისის ისტორიულ უბანში „ჰაკერ-ფშორს“ უნდა ესტუმრონ, სადაც პაბის კულტურა და ლაუნჯის კომფორტული გარემო ერთმანეთს საოცრად ერწყმის. „ჰაკერ-ფშორი“ უკვე 6 წელია სიამოვნებით მასპინძლობს სტუმრებს. კომფორტული და მყუდრო გარემო ნებისმიერი გემოვნების ადამიანისთვის თანაბრად მიმზიდველია. პაბი როგორც ზრდასრულების, ასევე თინეიჯერების, საქმიანი ადამიანებისა თუ ტურისტების საყვარელ ადგილად იქცა. მეტი ინფორმაციისთვის OK! „ჰაკერ-ფშორის“ მენეჯერს, თამარ რიჟამაძეს ესაუბრა.
გვიამბეთ „ჰაკერ-ფშორის“ ისტორია. რამდენი ხანია, რაც ქუთაისის ბაზარზე ოპერირებს?
თავად Hacker-Pschorr-ის, როგორც ბრენდის ისტორია 600 წელზე მეტს ითვლის და იგი სათავეს 1417 წლიდან იღებს. „ჰაკერ-ფშორის“ დაარსებულია მსოფლიოში სახელგანთქმული ყველაზე დიდი ლუდის ფესტივალი, „ოქტობერფესტი“ (Oktoberfest), რომელიც მრავალი წელია, ყოველწლიურად იმართება მიუნხენში და დაახლოებით 6 მილიონი ადამიანი სტუმრობს. ფესტივალს, დაარსებიდან დღემდე, მხოლოდ „ბავარიული დიდი ექვსეული“ – Hacker-Pschorr, Augustiner, Hofbräu, Paulaner, Spaten, Löwenbräu მასპინძლობს. ეს ერთგვარი უმაღლესი ლიგაა, რომლებიც საუკუნეებია მსოფლიოში ლუდის სტანდარტებს ქმნიან.
ქუთაისში „ჰაკერ-ფშორი“ 2017 წლიდან გამოჩნდა. რაც შეეხება იდეას, გვინდოდა ადამიანებს ბავარიული გამოცდილების კომფორტულ და მყუდრო გარემოში მიღების საშუალება ჰქონოდათ. მოგეხსენებათ, ქუთაისი უდიდესი ისტორიისა და ტრადიციების ქალაქია ბევრი მიმართულებით და მათ შორის – სტუმარმასპინძლობის. სად-სად და, ქუთაისში ყველაზე კარგად იციან უმაღლესი ხარისხის სამზარეულოსა და სერვისის ფასი. შესაბამისად, ჩავთვალეთ, რომ ეს სიახლე დიდ მოწონებას დაიმსახურებდა და ასეც აღმოჩნდა. „ჰაკერ-ფშორი“ გახსნის დღიდანვე შეიყვარა ქუთაისმა და ის თავისუფალი დროის გასატარებლად ყველასთვის სასურველ ადგილად იქცა. შევეცადეთ, კლასიკური პაბი ცოტათი შეგვეცვალა და სტუმრებისთვის განსხვავებული კონცეფცია შეგვეთავაზებინა. შესაბამისად, გაჩნდა ქუთაისში პირველი ლაუნჯ-პაბ (Lounge-Pub) კონცეფციის ადგილი, სადაც პაბის კულტურა და ლაუნჯის კომფორტული გარემო კარგადაა შეზავებული.
რას სთავაზობთ სტუმრებს. რა გამოარჩევს „ჰაკერ-ფშორს“ სხვა რესტორნებისგან?
რა თქმა უნდა, ლუდი Hacker-Pschorr არის ერთ-ერთი მთავარი, რითაც გამოვირჩევით სხვებისგან და ამით ძალიან ვამაყობთ. როგორც ზემოთ აღვნიშნეთ, ეს ლუდი ერთ-ერთი საუკეთესოა მსოფლიოში. საუკეთესო ლუდი კი, ცხადია, საუკეთესო კერძებსა და გარემოს მოითხოვს. ვცდილობთ, ამ გამოწვევებს ღირსეულად ვუპასუხოთ. მენიუს ანალიზს რეგულარულად ვატარებთ და სიახლეებს ვნერგავთ. ამ კუთხით მომხმარებლების უკუკავშირს ძალიან დიდ ყურადღებას ვაქცევთ.
რაც შეეხება გარემოს, ლაუნჯ-პაბის კონცეფცია ლუდის კულტურისა და კომფორტული ლაუნჯის შერწყმას გულისხმობს. შესაბამისად, შიდა სივრცე დაპროექტებულია ერთგვარ სექციებად, სხვადასხვა ტიპის, შეიძლება ითქვას, კომფორტულ და მყუდრო მიკრო ლაუნჯებად. ამასთან, ბარი ინტერიერის ერთ-ერთი საუკეთესო ნაწილია. გარე სივრცეში სტუმრებს ვთავაზობთ გათბობისა და გაგრილების თანამედროვე სისტემებით აღჭურვილ გამწვანებულ ტერასას, რომელიც ყველა სეზონზე ფუნქციონირებს.
გარდა ადგილზე სტუმრობისა, მომხმარებლებს ვთავაზობთ სერვისებს:
- ჩვენი საკურიერო სერვისი – Hacker Delivery
- გატანის სერვისი – Take Away
ამ სერვისების გამოყენება მომხმარებლებს შეუძლიათ შემდეგი არხებით:
- ტელეფონით – 597 400 300
- შეკვეთა პირდაპირ ჩვენი საიტიდან –
www.HP.ge
- მობილური აპლიკაციები Glovo, Wolt
„ჰაკერ-ფშორში“ დანერგილია HACCP სტანდარტი, რაც გულისხმობს სურსათის და პროდუქციის ხარისხის კონტროლს, როგორც შესყიდვის, ისე წარმოებისა და მომსახურების პროცესის ყველა ეტაპზე. HACCP არის ყველაზე აღიარებული საერთაშორისო ISO სტანდარტი, რომელსაც იყენებენ აშშ, დიდი ბრიტანეთი და ევროკავშირის ქვეყნები.
რას გვეტყვით თქვენი მენიუს სპეციფიკურობასთან დაკავშირებით?
მაღალი ხარისხი! ეს არის მიზანი, რასაც ემსახურება ჩვენი ყოველი მოქმედება და რის გამოც ამ ბიზნესში ვართ. შესაბამისად, ჩვენი მენიუს მთავარი სპეციფიკა მოკლედ ასე შეგვიძლია ჩამოვაყალიბოთ – სტუმარს შევთავაზოთ მხოლოდ ის, რაშიც საუკეთესოები ვართ და არა უბრალოდ ის, რისი გაკეთებაც შეგვიძლია. ამის ერთ-ერთი ნათელი მაგალითია, თუნდაც, „ჰაკერ-ფშორის“ ხინკალი. ჩვენი ძირითადი მიმართულება ლუდზეა მორგებული. თუმცა ქართულ ტრადიციულ კერძებსაც ცენტრალური ადგილი უჭირავს მენიუში.
რას გვეტყვით სასმელებზე, რომელიც ადგილზე მოსულ სტუმრებს ხვდებათ?
მსოფლიოში ერთ-ერთი საუკეთესო ლუდი რომ გვაქვს, უკვე არაერთხელ აღვნიშნე. შესაბამისად, მთავარი სასმელიც ის გახლავთ. ლუდი გერმანიიდან, Hacker-Pschorr-ის ლუდსახარშიდან შესაბამისი სტანდარტების დაცვით, სპეციალური კასრებით მოგვეწოდება. ამ ეტაპზე სტუმრებს ვთავაზობთ Hacker-Pschorr-ის ორ სახეობას: Hacker-Pschorr Gold და Hacker-Pschorr Weisbeer. გარდა ამისა, გვაქვს ქართული ღვინის სხვადასხვა გამორჩეული სახეობა. აქ დაგხვდებათ ბარი სასმელების მრავალფეროვანი არჩევანით, კოქტეილებითა და პროფესიონალი ბარმენით.
ვინ არიან „ჰაკერ-ფშორის“ გუნდის წევრები?
„ჰაკერ-ფშორის“ წარმატების უკან პროფესიონალების გუნდი დგას. დაარსების დღიდან უამრავი ძალისხმევაა ჩადებული იმაში, რომ ჩვენთან მოსულმა სტუმარმა თავი კომფორტულად იგრძნოს, ისიამოვნოს ჩვენი მენიუთი და კარგი გამოცდილება დააგროვოს. გუნდის თითოეული წევრი, თავისი მიმართულებით, მუდმივად ორიენტირებულია მომხმარებლის კმაყოფილებაზე, პროფესიულ განვითარებაზე და ლოიალურია კომპანიის მიმართ. საჯაროდ მინდა მადლობა გადავუხადო თითოეულ მათგანს. მათი წვლილი ძალიან დიდია იმაში, რასაც დღეს წარმოვადგენთ და რაზეც სიამაყით ვსაუბრობთ. შექმნის დღიდან არაერთი გამოწვევა ერთად დავძლიეთ. მათ შორის პანდემიის წლები, რა დროსაც კიდევ ერთხელ ნათლად გამოჩნდა მათი პროფესიონალიზმი, გუნდურობა და ერთგულება. ჩვენ ამას ძალიან ვაფასებთ. ჩვენი ხედვაა, „ჰაკერ-ფშორი“ ყოველთვის იყოს დასაქმების ყველაზე სასურველი ადგილი ქუთაისში, სადაც ერთი მხრივ, შესაძლებლობების გამოსავლენად საუკეთესო გარემოა და მეორე მხრივ, თითოეული თანამშრომლის ძალისხმევა, შესაბამისად, აღიარებული და დაფასებულია.
გვესაუბრეთ ადგილმდებარეობასთან დაკავშირებით.
„ჰაკერ-ფშორი“ ქუთაისის ისტორიულ უბანში, „ბჟოლებში“, გალაკტიონ ტაბიძის #18-ში მდებარეობს. შენობა აღიარებულია კულტურული მემკვიდრეობის ძეგლად. უნიკალური ფასადით და ლამაზი არქიტექტურით გამოირჩევა. ქალაქის ძირითად ღირშესანიშნაობებთან სიახლოვის გამო, „ჰაკერ-ფშორში“ მოხვედრა ძალიან მოსახერხებელია ფეხით და საზოგადოებრივი ტრანსპორტით. ავტომობილებისთვის გათვალისწინებულია პარკინგი.
დაბოლოს, როგორია სამომავლო გეგმები?
რა თქმა უნდა, განვლილ გზაზე ბევრი წარმატებული ინიციატივა და პროექტი იყო, მაგრამ ასევე იყო ბევრი გამოწვევა თუ შეცდომა. გასაგებია, რომ ეს საქმის განუყოფელი ნაწილია, თუმცა ვცდილობთ, პროცესებს მუდმივად დავაკვირდეთ, რათა ხარვეზი დროულად აღმოვაჩინოთ და აღმოვფხვრათ. ამაში ძალიან გვეხმარება მომხმარებლის თვალით დანახული „ჰაკერ-ფშორი“. როგორც მენიუ, კერძები და მათი ხარისხი, ასევე მომსახურება. ყოველთვის ღია ვიყავით და ვიქნებით მომხმარებლის ნებისმიერი უკუკავშირისთვის.
რაც შეეხება გეგმებს, გვაქვს იდეები სხვადასხვა მიმართულებით, ვგეგმავთ სიახლეებს, როგორც მენიუს, ასევე მომსახურების კუთხით. ძალიან გვინდა „ჰაკერ-ფშორის“ ხარისხი ხელმისაწვდომი გავხადოთ საქართველოს სხვა ქალაქებშიც.
ტექსტი: მარიამ ირემაძე
ფოტო: ლანა ვახტანგაძე
