ნინო მეგრელიძე – ფუდ-ფოტოგრაფი და სტილისტი
გვესაუბრეთ თქვენს ბლოგზე. როგორ გაჩნდა იდეა და რამდენი ხანია, რაც ამ საქმიანობით ხართ დაკავებული?
ბლოგის იდეა 9 წლის წინ, ფოტოგრაფიის შესწავლისას გაჩნდა. ფუდ-ფოტოგრაფიას გავდიოდით, რამდენიმე დავალებაც შევასრულე და რადგან კულინარიით ისედაც ვიყავი გატაცებული, ძალიან სპონტანურად შევქმენი ბლოგი. სწორედ ამ გადაწყვეტილებამ განაპირობა ჩემი ახლანდელი პროფესია. ვარ ფუდ-ფოტოგრაფი და სტილისტი. დღესაც ისეთივე ენთუზიაზმით და სიხარულით ვმუშაობ, როგორც დასაწყისში. უდიდეს სიამოვნებას მანიჭებს მომზადება/გადაღების პროცესი. ფუდ-სტილისტი და ფუდ-ფოტოგრაფი ორი სხვადასხვა პროფესიაა. ერთი ამზადებს იდეალურ, სრულყოფილ კერძს, ხოლო მეორე იღებს მადისაღმძვრელ ფოტოს. ის, რომ ორივეს წარმატებით ვართმევ თავს, ბლოგის დამსახურებაა. ყველაფერი ცხრაწლიანმა გამოცდილებამ და პრაქტიკამ მოიტანა. ახალი რეცეპტების შექმნა და კულინარიაზე წერა, ჩემი საქმიანობის განუყოფელი ნაწილია.
როგორ მოდის იდეები? რა შეიძლება იყოს შთაგონების წყარო?
ჩემი ყოველდღიურობა სამზარეულოსთან არის დაკავშირებული. პანდემიის გამო, უმეტესად შინ ვმუშაობ, სხვადასხვა პროექტზე. აქ სრული კომფორტი მაქვს შექმნილი − სამზარეულოს ინვენტარი, უამრავი რეკვიზიტი, ჭურჭელი, ფონი, ტექსტილი… ნებისმიერი „იმიჯი“ შემიძლია გავაცოცხლო, სიზმრად ნანახიც კი. ფოტო და კულინარიული იდეები ხშირად მესიზმრება, გაღვიძებისთანავე ბლოკნოტში ვინიშნავ, თავთან რომ მიდევს ასეთი შემთხვევებისთვის.
კიდევ რა დატვირთვა აქვს Foodography-ს?
ჩემი საქმიანობის პარალელურად, ვცდილობ არ მოვაწყინო foodography-ს ერთგული მკითხველი და გავუზიარო ახალი რეცეპტები, კულინარიული ხრიკები, სიახლეები თუ ფოტოები, თუმცა ამას სულ უფრო იშვიათად ვახერხებ.
მაქვს გავლილი კონდიტერის პროფესიული კურსიც, რაც ძალიან მეხმარება ჩემს საქმიანობაში და ვფიქრობ, მკითხველებშიც მეტ ნდობას ბადებს. რომ არა მათი პოზიტიური უკუკავშირი, ალბათ ბლოგი დიდი ხნის წინ შეწყვეტდა არსებობას. მათთვის foodography სანდო და კომპეტენტური ბლოგია, რომელსაც ხშირად უბრუნდებიან საყვარელი რეცეპტებისთვის. ეს კი უდიდესი მოტივაციაა ავტორისთვის. ჩემი მკითხველები ჩემი თანამოაზრეები არიან − ჩვენ ინტერესები, გემოვნება და ესთეტიკის აღქმა გვაერთიანებს.
დაბოლოს…
foodography 9 წელია არსებობს და ჩემთან ერთად ვითარდება. შესაბამისად, რეცეპტებიც აღარ არის მარტივი, მაგრამ დაწვრილებითი აღწერა, რომელიც თითოეული კერძის რეცეპტს ახლავს, ნებისმიერს გაუადვილებს მომზადების პროცესს, ახალბედასაც კი. ყოველი ახალი დესერტი თუ კერძი ერთგვარი გამოწვევაა ჩემთვის და ჩემი მკითხველისთვისაც. ჩემთვის იმიტომ, რომ ვცდილობ შევქმნა რაღაც ახალი, მშვენიერი და უნაკლო. უნაკლო, რადგან გამოუსწორებელი პერფექციონისტი ვარ. ამას ალბათ ფოტოების დათვალიერებისას თავად მიხვდებით.
