ქართული ბრენდის „ეთნოჰიტის“ შესახებ გიამბობთ, რომლის დაფუძნების იდეა და ინსპირაციაც საქართველოს სამუზეუმო არტეფაქტებს უკავშირდება. შესაბამისად, სამკაულები ქართულ ხასიათს უსვამს ხაზს. როგორია ბრენდის დაფუძნების ისტორია, როგორია მუშაობის სპეციფიკა და ტექნიკა… ამ და სხვა საინტერესო საკითხების შესახებ ბრენდის დამფუძნებელს, არინა ხეჩოევას ვესაუბრეთ.
უპირველესად, გაგვაცანით „ეთნოჰიტი“. რამდენი ხანია, რაც გაიხსნა?
ჩვენ ამ სფეროში უკვე 18 წელია ვმოღვაწეობთ, თუმცა ბრენდის იდეა ჩვენი მიმართულებიდან გამომდინარე გაჩნდა. სამკაულების ძირითადი კონცეფცია არის საქართველოს სამუზეუმო არტეფაქტები, რაც თანამედროვე სამკაულების შექმნის ინსპირაცია გახდა. ეს ყველაფერი კი ჩვენი ბრენდის სახელის დასტურია.
რას სთავაზობთ საზოგადოებას?
საზოგადოებას ვთავაზობთ ხელნაკეთ პროდუქტს, რომელიც ქართულ ხასიათს უსვამს ხაზს. ამის მაგალითია საყურე „ოქროს ხანა“, რომელიც განსაკუთრებული პოპულარობით სარგებლობს ყველა ასაკისა და გემოვნების ადამიანში.
მუშაობის სპეციფიკასა და ტექნიკაზე გვიამბეთ.
ბრენდი „ეთნოჰიტი“ უპირატესობას ანიჭებს მხოლოდ მაღალი 925 სინჯის ვერცხლს. სამკაულების ნაწილი მოოქრულია 24 -კარატიან ოქროში. ასევე ვიყენებთ ცირკონებსა და ნატურალურ ქვებს.
ჩვენი სამკაულები იქმნება უნიკალური, ვიტრაჟული და ტიხრული მინანქრის ტექნოლოგიით და გამოირჩევა თავისი ექსკლუზიური კოლექციის ხაზით.
კიდევ რა გამოარჩევს თქვენს ბრენდს?
ბაზარზე გამოვირჩევით უნიკალური დიზაინით, რომლის შექმნასა და განახლებაზეც მუდმივად ზრუნავს ჩვენი დიზაინერი. სწორედ ამის დამსახურებით ხშირად გვიწვევენ როგორც ადგილობრივ, ასევე საერთაშორისო გამოფენებზე. როგორიც არის: „ეთნოფესტი“, საშობაო გამოფენა „შერატონ მეტეხი პალასში“, გამოფენა „ექსპო ჯორჯიაში“, ამერიკის საელჩოში და ა.შ.
სად შეგვიძლია პროდუქციის შეძენა?
ჩვენი ბრენდის პროდუქციის შეძენა შესაძლებელია მხოლოდ ონლაინ, ფეისბუქ და ინსტაგრამ გვერდებზე.
ვინ არიან თქვენი მომხმარებლები?
ხშირ შემთხვევაში ჩვენი მომხმარებლები იძენენ სამკაულებს საზღვარგარეთ მყოფი ახლობლებისთვის, ასევე გვყავს მუდმივი მომხმარებელი, ბევრი ცნობილი ადამიანი და ა.შ.
ბოლოს შექმნილ ნამუშევარზე მოგვიყევით.
ახლახან შევქმენით ახალი საგაზაფხულო კოლექცია, რომელიც ყოველდღიურ სამოსს მიმზიდველს გახდის, საღამოს კაბას კი უფრო ელეგანტურს.
