ქართველი დიზაინერის ქეთევან კეკუტიას შექმნილი კაბა ცნობილმა ექიმმა, Drraniah Bogari-მ მოირგო. ცნობილი ექიმი დონალდ ტრამპის ქალიშვილის ტიფანი ტრამპისა და არაბი მილიარდელის ვაჟის მაიკლ ბულოსის ქორწილში იყო მიწვეული.
,,ძალიან სასიამოვნო შეგრძნებაა, როდესაც შენს შექმნილ კაბაზე აკეთებენ არჩევანს – ძალიან გამიხარდა. ჩემთვის, როგორც დიზაინერისთვის ასეთი ნდობის გამოცხადება არის უდიდესი მოტივაცია, მითუმეტეს, როცა იგებ, რომ შენმა კაბამ მოწონება დაიმსახურა ამ ქორწილში’’- აღნიშნა ქეთევანმა OK-ისთან საუბრისას.
შეგახსენებთ, „ქეთევან კეკუტია“ არის ახალი ქართული ბრენდი, რომელშიც წარმოდგენილია ქალის სამოსის მრავალფეროვანი არჩევანი.
,, როდესაც ხელნაკეთ კაბას ამზადებ, თითქოს თან ყველაფერზე ფიქრობ, თან არაფერზე, და მთელი ეს შენი წმინდა აზრები, ემოციები, პირდაპირ ნაჭერზე გადმოგაქვს და შედეგად ნამდვილი სასწაული იქმნება. თითოეული ჩემი ხელნაკეთი კაბის დამზადებას თვეზე მეტს ვანდომებ, ამიტომაც კოლექციაში სულ რამდენიმეა.’’
ქეთევანი აღნიშნავს, რომ თითოეული ადამიანი განსხვავებულია და თავის მხრივ განსაკუთრებული, რაც ხშირად არ იციან, სწორედ ამის დანახვაში ეხმარება ბრენდი მომხმარებელს.
,,მინდა აღვნიშნო, რომ ძალიან მიყვარს ქალურ ფორმებზე ყურადღების გამახვილება, ხშირად გამიზნულად ვქმნი ისეთ მოდელს, სადაც თეძოს ნაწილი გაგანიერებულია, რაც მომხმარებელს ძალიან მოსწონს. ჩემი ბრენდის იდეა ქალებისთვის საკუთარი თავის შეყვარებაა. მინდა ირწმუნონ, თუ როგორი განსაკუთრებულები არიან. ჩემთვის დიზაინერობა ხელოვნების უმაღლესი დარგია და მიმაჩნია, რომ თუ დიზაინერს არ შეუძლია სამოსში აზრის ჩაქსოვა, ის მოდას ვერ შექმნის.’’