თუკი განტვირთვის, დასვენების, ასევე გართობის შესაძლებლობას ეძებთ, სადაც გამორჩეული სამზარეულო და სერვისი დაგხვდებათ – მაშინ სწორ ადგილას მოხვდით, რადგან „თეატრი“ სწორედ ის მრავალფუნქციური სივრცეა, რომელიც ამ ყველაფერს აერთიანებს. შოუ, გასტრონომია და სერვისი – სხვა რა არის საჭირო იმისთვის, რომ ისიამოვნოთ და შინ დაუვიწყარი ემოციებითა და მოგონებებით დაბრუნდეთ.
ეს არის კონცეფცია, რომელმაც ყველა აალაპარაკა. განსაკუთრებით კი მათზე მოახდინა შთაბეჭდილება, ვინც უკვე ესტუმრნენ და საკუთარ თავზე გამოცადეს ეს ყველაფერი.
აქ ერთნაირად მნიშვნელოვანია: შოუ, გასტრონომია და სერვისი. „წისქვილი ჯგუფი“ კი გახდა პირველი ამ მიმართულებით და გარისკა გაეკეთებინა რაღაც სხვა, ახალი, ის, რაც გვსმენია, გაგვიგია, თუმცა აქამდე არავის განუხორციელებია.
არ შეიძლება არ აღინიშნოს პროფესიონალებისგან დაკომპლექტებული დიდი გუნდი, რომელიც ერთდროულად, სინქრონში, შეწყობილად ქმნის თითოეულ დეტალსა და ნიუანსს.
„თეატრის“ სამხატვრო ხელმძღვანელი და წარმოდგენების დამდგმელი რეჟისორი ზაალ ჩიქობავაა, რომლის ბიოგრაფიაშიც არაერთ საინტერესო შტრიხს იპოვით, სწორედ ამ დეტალებმა მიიყვანა ის ამ განსხვავებული ესთეტიკისა და შინაარსის თეატრთან.
როგორც ზაალი აღნიშნავს – „თეატრი“ საშუალებას გაძლევს, მთელი ფანტაზია ამოაფრქვიო და ის ნებისმიერი სტილისა და ჟანრის ღონისძიებას მოარგო. იგი ამ სივრცეს ახალი იდეების, ექსპერიმენტებისა და გამოცდილების გაზიარების ჰაბს ადარებს, რომელიც ყველასია და შესაბამისად, თითოეულ სტუმარს მარტივად შეუძლია თავისი წილი თეატრი იპოვოს და შეიყვაროს.
ამ „თეატრში“ ყველაფერი შეიძლება ნახოთ, ყველაფერი, რასაც ქართული კულტურა ჰქვია – აქ იცეკვებენ, იმღერებენ, იმპროვიზაციას მიმართავენ, ქართული სცენის კორიფეებს გაიხსენებენ, ქართული სიტყვის ძალას შეგაგრძნობინებენ. აქ შეგიძლია გაიცნო საქართველო. თქვენ მხოლოდ ინატრეთ, ისურვეთ და იმ საღამოზე აღმოჩნდებით, რომელსაც დაგეგმავთ და მოისურვებთ.
რა კონცეფციას ეფუძნება „წისქვილი ჯგუფის“ ახალი სივრცე – „თეატრი“ და რას უნდა ველოდოთ მისგან?
დასავლეთში ამგვარი სივრცეებს Dining Theatre-ს უწოდებენ, რაც სანახაობასთან ერთად სტუმრების ვახშმით გამასპინძლებასაც გულისხმობს. „თეატრიც“ სწორედ ამ კონცეფციას ეფუძნება. ეს ნიშნავს, რომ აქ ერთნაირად მნიშვნელოვანია სანახაობა და გასტრონომია.
„თეატრში“ ყველაფერი შეიძლება ნახოთ: საბალეტო თუ საოპერო წარმოდგენა, მიუზიკლი, კლასიკური და თანამედროვე მუსიკოსების კონცერტი, დაესწროთ ფესტივალს, გალა ვახშამს, კორპორაციულ ღონისძიებას, ტრენინგს, კონფერენციას, ქორწილს, დაბადების დღეს… ერთი სიტყვით, ნებისმიერი ჩანაფიქრის განხორციელებაა შესაძლებელი. სივრცეც იმგვარადაა მოწყობილი, რომ შინაარსისა და თემატიკის მიხედვით იგი მარტივად გარდაიქმნას. ის, რაც უცვლელი იქნება, არის სცენა – ვფიქრობ, სწორედ მისი ინსპირაციით, მის გარშემო აეწყობა ყველა ღონისძიება და მეტ თეატრალურობას შესძენს მათ.
ვის შეეძლება თეატრით სარგებლობა, ვისთვისაა იგი განკუთვნილი?
„თეატრი“ არის სივრცე ყველასთვის – აქ ნებისმიერს შეუძლია თავისი თეატრი იპოვოს და უნიკალური გამოცდილება მიიღოს. ჩვენს მულტიფუნქციურ სივრცეს საკუთარი დასიც ჰყავს და მოწვევის პრინციპითაც მუშაობს. შესაბამისად, შოუები და დადგმა მუდმივად განსხვავებულია.
„თეატრის“ გუნდი ასევე უმასპინძლებს, ორგანიზებას გაუწევს და „თეატრის“ შესაძლებლობების სრულად ათვისებაში დაეხმარება ყველას, ვისაც ამ სივრცეში მოუნდება კერძო წვეულება თუ სხვადასხვა ტიპის ღონისძიება. გამორჩეულ ვახშამს კი ჩვენი ბრენდშეფი და მისი გუნდი შესთავაზებს.
