ბრიტანელი მუსიკოსის, დევიდ ბოუის ალბომის –Aladdin Sane -ის ორიგინალი ყდა შესაძლოა, აუქციონებზე გაყიდულ ყველაზე ძვირადღირებულ ალბომის ყდად იქცეს. ფოტოგრაფ ბრაიან დაფის მიერ გადაღებული ფოტო, აუქციონზე სავარაუდოდ, 344 000 ევროდ გაიყიდება.
დევიდ ბოუის მუსიკის მოსმენისას, რომელი სურათი გახსენდებათ? სავარაუდოდ, მომღერლის პორტრეტი დახუჭული თვალებით და სახეზე ელვით, რაც ბუნებრივია.
ბრაიან დაფის მიერ გადაღებული ეს ფოტო 1973 წელს ბოუის მეექვსე ალბომის, Aladdin Sane-ის, გარეკანზე იყო გამოსახული. ის მომღერლის კარიერის ერთ-ერთ ყველაზე დასამახსოვრებელი და სავარაუდოდ, მუსიკის ისტორიაში ყველაზე ცნობილ ალბომის ფოტოა, რომელმაც ვიზაჟისტ პიერ ლაროშის ელვა როკის ყველაზე ცნობილ სიმბოლოდ აქცია.
„მამაჩემის შექმნილ ბოუის გამოსახულებას ხშირად პოპ-მუსიკის მონა ლიზას უწოდებენ“, – თქვა ბრაიან დაფის შვილმა და Duffy Archive-ის დამფუძნებელმა კრის დაფიმ.
აუქციონი, სადაც ლეგენდარული Aladdin Sane გაიყიდება, 22 ოქტომბერს ლონდონში, Bonhams-ის აუქციონის სახლში გაიხსნება. ალბომის ორიგინალი ყდა, სავარაუდოდ, 250,000–300,000 ფუნტ სტერლინგად (დაახლოებით 286,000–344,000 ევროდ) გაიყიდება, რაც იმას ნიშნავს, რომ მან შეიძლება მოხსნას Led Zeppelin-ის სადებიუტო ალბომის ყდის რეკორდი, რომელიც 2020 წელს 325,000 დოლარად (275,400 ევრო) გაიყიდა და ყველაზე ძვირადღირებული ალბომის ყდა გახდეს, რაც კი ოდესმე გაყიდულა.
Bonhams-ის აუქციონზე გასატან ლოტებში ასევე შედის სკამიც, რომელზეც ბოუი Aladdin Sane-ის გადაღებების დროს იჯდა და დევიდ ბოუის ფოტო, რომელშიც მომღერალი მთელი ტანით ჩანს. ფოტოს ღირებულება 150 000-დან 200 000 ფუნტ სტერლინგამდეა (172 000-დან 229 000 ევრო).
