დემნა გვასალია Gucci-ის კრეატიული ხელმძღვანელი გახდა. ის ამ პოზიციას ოფიციალურად დაიკავებს მას შემდეგ, რაც 2025 წლის 6 ივლისს წარადგენს თავის ბოლო კოლექციას Balenciaga-სთვის. დემნა იქნება პირველი არაიტალიელი ხელმძღვანელი 2004 წლის შემდეგ, რაც ამერიკელმა დიზიანერმა ტომ ფორდმა ეს პოზიცია დატოვა.
“ჩემთვის პატივია შევიტანო წვლილი მოდის სახლში, რომელსაც ღრმად ვცემ პატივს და დიდხანს ვაღმერთებდი. მოუთმენლად ველოდები, რომ სტეფანოსთან და მთელ გუნდთან ერთად დავწერო ახალი თავი Gucci-ის საოცარ ისტორიაში.”
მანამდე Gucci-ის კრეატიული დირექტორი საბატო დე სარნო იყო, რომელიც ამ პოზიციაზე 2023 წლის იანვარში დაინიშნა, ალესანდრო მიკელეს შემდეგ. მისი სადებიუტო კოლექციის ჩვენება მილანის მოდის კვირეულზე 2023 წლის სექტემბერში გაიმართა. საბატო დე სარნო Gucci-დან 2025 წლის თებერვაშლი გაათავისუფლეს. ამის მიზეზი ბრენდის გაყიდევბის მკვეთრი შემცირება გახდა, რაც Kering-ისთვის (Gucci-ის მფლობელი კომპანია) დიდი ფინანსური გამოწვევა იყო. 2024 წლის ბოლო კვარტალში Gucci-ის გაყიდვები 25 %-ით დაეცა, რაც დე სარნოს ხედვის მიმართ სერიოზულ ეჭვებს აჩენდა. მიუხედავად იმისა, რომ მისი პირველი კოლექციები დადებითად შეფასდა, კომერციული წარმატება არ მოჰყვა. ამ მიზეზით, Kering-მა მიიღო გადაწყვეტილება მისი გათავისუფლების შესახებ. ბრენდის კრეატიული ხელმძღვანელობა დროებით Gucci-ის შიდა გუნდმა გადაიბარა, სანამ ახალ დირექტორს დაასახელებდნენ.
13 მარტს Gucci-მ ქართველი დიზაინერი კრეატიულ დირექტორად დანიშნა.
“მისი შემოქმედებითი ძალა ზუსტად ის არის, რაც Gucci-ს სჭირდება,” – განაცხადა Kering-ის აღმასრულებელმა დირექტორმა, ფრანსუა-ანრი პინომ.
დემნა 2015 წლიდან Balenciaga-ს კრეატიული დირექტორია, მისი ხელმძღვანელობის პერიოდში ბრენდმა მნიშვნელოვანი ცვლილებები განიცადა და თანამედროვე მოდის ინდუსტრიაში ახალი სტანდარტები დაამკვიდრა. დემნამ Balenciaga-სთვის პირველი კოლექცია 2016 წლის გაზაფხულზე წარადგინა, რომელიც გამორჩეული იყო სტრუქტურული სილუეტებით და ინოვაციური დიზაინით. ამავე წელს მიიღო ჯილდო წლის საერთაშორისო დიზაინერად ბრიტანეთის მოდის დაჯილდოებაზე. 2017 წელს ამერიკის მოდის საბჭომ დემნა წლის საერთაშორისო დიზაინერად დაასახელა. მან 2021 წელს პირველად მიიღო მონაწილეობა Met Gala-ზე, რომელიც ნიუ-იორკში გაიმართა. ღონისძიებაზე იგი კიმ კარდაშიანთან ერთად გამოჩნდა. ჟურნალმა Time-სმა დემნა გვასალია 2022 წლის მსოფლიოს 100 ყველაზე გავლენიან ადამიანთა შორის დაასახელა, რაც მისი საერთაშორისო აღიარების კიდევ ერთი დასტურია. 2025 წელს კი საფრანგეთში ხელოვნების რაინდის წოდება მიიღო.
2025 წლის 9 მარტს დემნამ Balenciaga-ს შემოდგომა/ზამთრის კოლექცია წარადგინა. კოლექციაში მან შეინარჩუნა თავისი ავანგარდული სტილი, რომელიც აერთიანებდა უჩვეულო სილუეტებსა და მასალებს. Ჩვენებას მრავალი ცნობილი სახე ესწრებოდა, ხოლო კრიტიკოსებისგან დემნამ დადებითი შეფასება მიიღო.
მისი Gucci-ის კრეატიულ დირექტორად დანიშვნა მოდის ინდუსტრიის ერთ-ერთი ყველაზე განხილვადი მოვლენაა. დემნას უნიკალურმა ხედვამ და ავანგარდულმა სტილმა შესაძლოა ბრენდს ახალი სიცოცხლე შესძინოს. დრო გვიჩვენებს, თუ როგორ შეცვლის დემნა Gucci-ის მომავლს.
