Bela Borse – იგივე თათულის ჩანთები, ერთი წელია, რაც ბაზარზე ოპერირებს და მომხმარებელს განსაკუთრებული კოლექციებით ანებივრებს. სტილის შექმნის პროცესში მნიშვნელოვანი დატვირთვა აქვს აქსესუარის შერჩევას, რადგან ის გარკვეულ კრეატივს მოითხოვს. დამფუძნებელმა ტატიანა კუხიანიძემ წარმატებულ ბიზნესსა და სამომავლო გეგმებზე OK -სთან ინტერვიუში ისაუბრა.
ტატიანა, გაგვეცანით და გვიამბეთ, რატომ გადაწყვიტეთ აქსესუარების მაღაზიის გახსნა?
ჩემი პროფესია დაკავშირებულია სამედიცინო სფეროსთან, უმაღლესი განათლება ამ კუთხით მივიღე, ფარმაცევტ-პროვიზორის განხრით და 10 წელი ვმუშაობდი კლინიკაში. საკუთარი მაღაზიის გახსნა გადამაწყვეტინა აქსესუარების მიმართ სიყვარულმა, განსაკუთრებით ჩანთების. თავდაპირველად ონლაინ ვმუშაობდი, შემდეგ გადავწყვიტე გამერისკა და უკვე ერთი წელია, რაც მაღაზია არსებობს. პირველ ეტაპზე ჩვენთან მხოლოდ ჩანთები იყო წარმოდგენილი, თუმცა შემდეგ დავამატეთ სხვადასხვა აქსესუარი, რათა უფრო მრავალფეროვანი არჩევანი გვქონოდა. დიდი ხანი ვფიქრობდი მაღაზიის სახელწოდებაზეც, მინდოდა განსხვავებული ყოფილიყო, ამიტომ დავუკავშირე ოჯახის წევრს, დედას, რომელიც საუბრის დროს ხშირად მეძახის „ბელას“, რაც იტალიურად „ლამაზს“ ნიშნავს, ხოლო მაღაზიის სახელწოდება Bela Borse – ლამაზ ჩანთებს.
რა სირთულეებთანაა დაკავშირებული წარმატებული ბიზნესის მართვა?
სირთულეები და დაბრკოლებები ყოველთვის იყო, რადგან ეს საქმე დიდ პასუხისმგებლობასთანაა დაკავშირებული. მომხმარებელთან ურთიერთობა ყოველთვის რთული და მნიშვნელოვანი პროცესია, რადგან თავდაპირველად, სანამ ყველა დეტალს არ შეისწავლი, არ იცნობ ადამიანს და მის გემოვნებას. რა თქმა უნდა, ეს დროის გარკვეულ რესურსსაც მოითხოვს. ბიზნესის დაწყება ასევე დიდ ხარჯებთანაა დაკავშირებული, რის გამოც ავიღე საბანკო ვალდებულება, თუმცა ნებისმიერი სირთულის დაძლევაში მეხმარება ოჯახი, რომელიც მამხნევებს და ყოველთვის გვერდით მიდგას.
რა პროდუქციას სთავაზობს Bela Borse მომხმარებელს?
ჩვენს მაღაზიაში მომხმარებელს შეუძლია შეიძინოს: ჩანთები, შარფები, გემოვნებიანი სტილისთვის საჭირო აქსესუარები, სამკაულები და პარფიუმერია, ასევე გვაქვს სათვალეების ძალიან დიდი არჩევანი. მომხმარებელს ვთავაზობთ საკურიერო მომსახურებასაც საქართველოს მასშტაბით და პროდუქციას მსოფლიოს ნებისმიერ წერტილში ვაგზავნით.
თქვენი აზრით, რით არის გამორჩეული Bela Borse ბაზარზე?
ვთვლი, რომ განსხვავებული კოლექცია მაქვს. არ მიყვარს ერთფეროვნება, ყოველთვის ვეძებ სიახლეებს და ვაკვირდები ტენდენციებს. ასევე აქტიური ვარ თითქმის ყველა სოციალურ პლატფორმაზე, მყავს ჩემი დიდი აუდიტორია, რომელთანაც ყოველდღიურად ვკონტაქტობ და მათ საინტერესო სიახლეებსა და პოზიტიურ ენერგიებს ვუზიარებ.
რამდენად ითვალისწინებთ მომხმარებელთა გემოვნებას კოლექციის შერჩევის პროცესში?
ჩემთვის ყველაზე მთავარი და მნიშვნელოვანი მომხმარებელია და, რასაკვირველია, მათ აზრსა და გემოვნებას ყოველთვის ვითვალისწინებ. ვცდილობ მათ სურვილებს მოვერგო და ის აქსესუარი, რომელიც იმ მომენტში არ მაქვს ადგილზე, ჩამოვიტანო და კოლექცია შევავსო. ეს პროცესი ორმხრივია, მომხმარებლებიც მეკითხებიან რჩევას და ითვალისწინებენ ჩემს აზრს, რაც ძალიან დიდი სიამოვნებაა მათი მხრიდან.
სამომავლო გეგმები…
ვფიქრობ, ახლო მომავალში შევქმნა ჩემი ტანსაცმლის ხაზი, რომელიც განსხვავებული და ინდივიდუალურ სტილზე იქნება მორგებული, უფრო გავფართოვდე და ეს სფერო მთლიანად მოვიცვა, რათა ადამიანებს მუდმივად შევთავაზო სიახლეები.
ტექსტი: მაკუნა შავგულიძე
ფოტო: ნინი გორდაძე
