#OK! „ვგრძნობ, რომ ჩემი მებრძოლი სული საბოლოოდ ბრუნდება” – რას ჰყვება ანჯელინა ჯოლი ცხოვრების ყველაზე რთულ პერიოდზე

ანჯელინა ჯოლი ახალ ფილმში „Couture“ მთავარ როლს ასრულებს, რომელშიც ის განასახიერებს მაქსინს – დაბალბიუჯეტიანი საშინელებათა ფილმების რეჟისორს, რომელიც კარიერულ გამოწვევებს, მარტოხელა დედობასა და განქორწინების პროცესს ერთდროულად უმკლავდება. სიუჟეტი განსაკუთრებით დრამატულ სახეს მას შემდეგ იღებს, რაც პერსონაჟი გაიგებს, რომ ძუძუს კიბო აქვს.

როგორც ფილმის რეჟისორმა და სცენარისტმა, ალის ვინოკურმა Variety-სთან საუბარში განაცხადა, სცენარი თავიდანვე ჯოლისთვის დაიწერა. რეჟისორი მიიჩნევს, რომ მსახიობსა და მის პერსონაჟს შორის განსაკუთრებული კავშირი არსებობს – არა მხოლოდ იმიტომ, რომ ორივე რეჟისორია, არამედ იმიტომაც, რომ ჯანმრთელობასთან დაკავშირებული რთული გადაწყვეტილებების მიღება ჯოლის რეალურ ცხოვრებაშიც მოუწია.

მიუხედავად იმისა, რომ ჯოლის კიბო არასოდეს ჰქონია, 2013 წელს მან საზოგადოებას გაუმხილა, რომ პროფილაქტიკური ორმაგი მასტექტომია ჩაიტარა. გადაწყვეტილება მას შემდეგ მიიღო, რაც გენეტიკურმა კვლევამ BRCA1 გენის მატარებლობა დაუდასტურა, რაც ძუძუსა და საკვერცხის კიბოს განვითარების რისკს მნიშვნელოვნად ზრდის. მსახიობის ოჯახური ისტორია ამ საკითხთან განსაკუთრებით მტკივნეულად არის დაკავშირებული. მისი დედა, მარშელინ ბერტრანი, საკვერცხის კიბოთი 56 წლის ასაკში გარდაიცვალა. ამავე დაავადებას ემსხვერპლა ჯოლის ბებიაც.

ფილმში ერთ-ერთი ყველაზე ემოციური სცენა სწორედ მასტექტომიისთვის მომზადების მომენტია. ჯოლიმ აღიარა, რომ გადაღებებისას საკუთარი გამოცდილება გაახსენდა და კიდევ ერთხელ დაფიქრდა სიცოცხლის მნიშვნელობაზე: „დედა ძალიან ახალგაზრდა ასაკში დავკარგე და ბებია საერთოდ არ გამიცნია. ამიტომ არასოდეს მიცხოვრია იმ განცდით, რომ ძალიან ხანგრძლივი ცხოვრება მელოდა. უკვე იმ ასაკსაც გადავცდი, როცა დედას დიაგნოზი დაუსვეს“, – ამბობს მსახიობი.

ინტერვიუში ჯოლიმ შვილებზეც ისაუბრა და აღნიშნა, რომ სიკვდილზე ფიქრი მის აღზრდის სტილზეც აისახებოდა:

„ხშირად ისე ვზრდიდი შვილებს, თითქოს ჩემი არყოფნისთვის ვამზადებდი და არა იმისთვის, რომ ოდესმე ბებია გავმხდარიყავი. ასე ხდება, როდესაც სიკვდილს რეალურ შესაძლებლობად აღიქვამ“, – თქვა მან.

მსახიობმა ასევე გაიხსენა ბრედ პიტთან განქორწინების შემდეგ პერიოდი და აღიარა, რომ გარკვეული დროით მსახიობობისთვის თავის დანებებაც ჰქონდა გადაწყვეტილი:

„განქორწინებამდე ფაქტობრივად შეწყვეტილი მქონდა მსახიობობა. ვფიქრობდი, რომ მთლიანად რეჟისურასა და საერთაშორისო პროექტებზე გადავერთვებოდი. მაგრამ შემდეგ მივხვდი, რომ თუ შვილებთან ახლოს ყოფნა და ფინანსური სტაბილურობის შენარჩუნება მინდოდა, მსახიობობას უნდა დავბრუნებოდი“.

მისი თქმით, დღეს შვილები უკვე ზრდასრულები არიან და სწორედ ისინი უბიძგებენ, რომ უფრო აქტიური გახდეს და საკუთარ ცხოვრებაში ახალი ეტაპი დაიწყოს:

„ვგრძნობ, რომ ჩემი მებრძოლი სული საბოლოოდ ბრუნდება. გარკვეული პერიოდი თითქოს დავკარგე, ახლა კი დიდწილად ჩემი შვილების დამსახურებით ისევ ვპოულობ საკუთარ თავს“, – აღნიშნა მსახიობმა.