მაიკლ დუგლასი მემუარებში, „One Helluva Ride“, თავისი ცხოვრების ყველაზე პირად დეტალებზე საუბრობს – მათ შორის, კეტრინ ზეტა-ჯონსთან ქორწინების რთულ პერიოდზე, 2013 წელს მათი დაშორების მიზეზებსა და მსახიობ კეტლინ ტერნერთან რომანზე. წიგნი 6 ოქტომბერს გამოიცა და მსახიობის კარიერასთან ერთად მის ოჯახურ ცხოვრებას, დამოკიდებულებას, შვილებთან ურთიერთობასა და წარსულ რომანტიკულ ურთიერთობებსაც ეხება.
მაიკლ დუგლასი და კეტრინ ზეტა-ჯონსი 2000 წელს დაქორწინდნენ და ორი შვილი, დილანი და კერისი, ჰყავთ. თუმცა 2013 წელს, ქორწინებიდან 13 წლის შემდეგ, წყვილმა ურთიერთობაში პაუზის აღება გადაწყვიტა.
დუგლასის თქმით, იმ პერიოდში ოჯახს ერთდროულად რამდენიმე რთულ საკითხთან გამკლავება უწევდა. მემუარებში ის წერს, რომ სახლში დაბრუნების შემდეგ მან და კეტრინმა გულწრფელად ისაუბრეს და საბოლოოდ ცალ-ცალკე ცხოვრების გადაწყვეტილება მიიღეს. მსახიობის თქმით, ეს ფაქტი მარტივი არ ყოფილა.
„გადავწყვიტეთ, გარკვეული დრო ცალ-ცალკე გაგვეტარებინა“, – იხსენებს დუგლასი წიგნში – „ამ პერიოდმა ერთი მნიშვნელოვანი რამ მასწავლა: მხოლოდ შვილების გამო ურთიერთობის შენარჩუნება ყოველთვის სწორი გადაწყვეტილება არ არის. ზოგჯერ საჭიროა ნაბიჯის უკან გადადგმა და იმის გარკვევა, რა არის მთელი ოჯახისთვის საუკეთესო.“
საბოლოოდ წყვილი შერიგდა და დღეს მათი ქორწინება კვლავ გრძელდება. მსახიობმა ისიც აღნიშნა, რომ წლების შემდეგ მათი კავშირი მხოლოდ ფიზიკურ მიზიდულობას აღარ ეფუძნება და ურთიერთობაში ერთმანეთისადმი ღრმა სიყვარული და პატივისცემაა მთავარი.
დუგლასი იმასაც ამბობს, რომ ხანგრძლივი ქორწინებისთვის იუმორი და ერთმანეთთან საუბრის უნარი განსაკუთრებით მნიშვნელოვანია.
40 წლის განმავლობაში დამალული რომანი
მემუარების ერთ-ერთი ყველაზე ხმაურიანი ნაწილი კი კეტლინ ტერნერს უკავშირდება. დუგლასმა პირველად საჯაროდ დაადასტურა, რომ 1984 წელს, ფილმის „Romancing the Stone“ გადაღებების დროს, მას და ტერნერს რომანტიკული ურთიერთობა ჰქონდათ.
იმ პერიოდში დუგლასი ჯერ კიდევ დიენდრა ლუკერზე იყო დაქორწინებული, თუმცა ტერნერთან შეხვედრისთანავე მათ შორის ძლიერი მიზიდულობა გაჩნდა.
„ჩვენ მაშინვე მოვიხიბლეთ ერთმანეთით“, – ვკითხულობთ მემუარებში.
მათი ურთიერთობის შესახებ არც რეჟისორმა რობერტ ზემეკისმა იცოდა. დუგლასის თქმით, ყველაფერი იმდენად კარგად დამალეს, რომ წლების განმავლობაში საზოგადოებაც მხოლოდ ეკრანზე არსებულ ქიმიას ამჩნევდა.
თუმცა სიტუაცია მაშინ შეიცვალა, როდესაც მექსიკაში გადაღებებზე დუგლასის იმდროინდელი მეუღლე დიენდრა შვილთან, კამერონთან ერთად ჩავიდა. ოჯახის ერთად ნახვის შემდეგ ტერნერმა ურთიერთობის დასრულება გადაწყვიტა.
საინტერესოა, რომ დუგლასმა და ტერნერმა წლების შემდეგაც შეინარჩუნეს მეგობრული ურთიერთობა კიდევ რამდენიმე ფილმში გამოჩნდნენ. მემუარების გამოცემამდე კი ტერნერს თავად დაუკავშირდა და მისი ნებართვა ითხოვა.
წიგნის შესახებ გავრცელებულ ამბავს კეტლინ ტერნერი გამოეხმაურა და აღნიშნა, რომ 40 წლის წინანდელი ისტორიის გამო დიდი აჟიოტაჟი მისთვის მოულოდნელი იყო. მსახიობმა დუგლასზე თბილად ისაუბრა, განაცხადა რომ ძალიან უყვარს და წიგნის წაკითხვასაც აპირებს.
ასევე დაგაინტერესებთ:
#OK! მაიკლ დუგლასისა და კეტრინ ზეტა-ჯონსის ყოფილი ბინა $7 მილიონად იყიდება
#OK! დიდი ხნის შემდეგ პირველად, მაიკლ დუგლასი საზოგადოებაში 22 წლის ქალიშვილთან ერთად გამოჩნდა
