რამდენიმე საათის წინ მუსიკალური ინდუსტრიის ყველაზე მნიშნელოვანი ღონისძიება Grammys-ის რიგით 63-ე დაჯილდოება ჩატარდა, რომელსაც არაერთი ცნობილი ადამიანი დაესწრო. საღამო ბიონსე ნოულზისთვის ისტორიული აღმოჩნდა, რადგან ის გახდა პირველი ქალი შემსრულებელი, რომელმაც წლების მანძილზე ჯამში ამერიკის ხმისჩამწერი აკადემიის 28 მუსიკალური ჯილდო მოიპოვა.
25 წლის ინგლისელი პოპვარსკვლავი დუა ლიპა გრემის წითელ ხალიჩაზე ვერსაჩეს ბზინვარე კაბით წარსდგა, მუსიკალური ინდუსტრიის უმნიშვნელოვანესი საღამო ახალგაზრდა მომღერლისთვის წარმატებულად დასრულდა, მიღებული 6 ნომინაციიდან პოპვარსკვლავმა გრემი წლის საუკეთესო პოპ ვოკალური ალბომისთვის Future Nostalgia მოიპოვა.
შეგახსენებთ, რომ დუა ლიპამ მუსიკალური კარიერა 2015 წელს დაიწყო, როდესაც სადებიუტო სინგლი New Love, 2017 წელს კი პირველი სტუდიური ალბომი გამოუშვა. მიუხედავად წარმატებული კარიერული საქმიანობისა, დუამ საყოველთაო აღიარება New Rules-ის გამოსვლის შემდეგ მოიპოვა, რომელიც გახდა მისი პირველი N1 სინგლი დიდ ბრიტანეთში. სიმღერა, რომლის მუსიკალური ვიდეო არც ახლა კარგავს აქტუალობას, ამჯერად მას Youtube-ზე 2 მილიარდზე მეტი ნახვა აქვს.
2018 წელს BRIT Awards-ის ნომინაციების გამოცხადების შემდეგ, 22 წლის დუა გახდა პირველი ქალი შემსრულებელი, რომელმაც ერთ წელიწადში ყველაზე მეტი 5 ნომინაცია მოიპოვა. (მათ შორის იყო კატეგორია “საუკეთესო ბრიტანული ალბომი“).
იხილეთ დუა ლიპას პერფორმანსი გრემის რიგით 63-ე დაჯილდოებაზე, მომღერალმა ღონისძიებაზე სიმღერები Levitating და Don’t Start Now შეასრულა.
