9 აპრილის ერთ-ერთი ყველაზე ცნობილი ფოტო-კადრის სიმბოლო, ნანა მახარაძე, რომელიც ემიგრაციაში 11 წლის განმვალობაში იმყოფებოდა, რამდენიმე დღის წინ სამშობლოში დაბრუნდა.
ემიგრანტმა, ამ პერიოდის განმავლობაში განვლილ რთულ პერიოდზე და დაბრუნების ემოციებზე ჩვენთან ისაუბრა.
„დღეს, ალბათ, ყველაზე ბედნიერი ვარ. დამთავრდა ჩემი ცხოვრების ყველაზე რთული ეტაპი,რასაც ემიგრაცია ჰქვია. ვარ ჩემს უსაყვარლეს შვილთან და სამშობლოში. აქ არავინ მეკითხება ვინ ვარ. ვარ ქართველი ჩემს სამშობლოში.
ურთულესია საკუთარი სახლის კარების გამოხურვა,როცა კარის იქეთ ყველაზე ძვირფასს ტოვებ. მიდიხარ და პირველი რაც თავში გიტრიალებს,მალე დაბრუნების იმედია…
მერე ყველაფერი ბედისწერაა და დაუსრულებელი მონატრება. თითქოს თავიდან იბადები,სწავლობ ენას, იწყებ სიარულს, მეგობრებსაც იძენ, მაგრამ ყოველი ფიქრი შენი ქვეყნისკენ არის მიმართული.
იქ ხომ ყველაფერი დატოვე…
გადის წლები,რომლებიც ემიგრანტებისთვის საუკუნესავით გრძელია, არც დაბრუნებაა იოლი, მთელი გული და სული აქეთ გაქვს,მაგრამ მაინც ფიქრობ, შევძლებ თვითრეალიზებას, ეს ალბათ ყველაზე დიდი შიში და საზრუნავია ნებისმიერი ემიგრანტისთვის.
მაგრამ,მე დღეს აქ ვარ…
იმედი მაქვს ვიპოვი ჩემს ადგილს საკუთარ ქვეყანაში.“
იმის მიუხედავად, რომ 11 წელი დიდი დროა და ნანა მახარაძის ფიქრები მუდამ სამშობლოსკენ იყო, იტალიაში მაინც მოახერხა სიყვარულის პოვნა, მისი რჩეული Marco Sbragi-ია. როგორც, ემიგრანტი გვიყვება მისი მეუღლე პროფესიით პროგრამისტი და ამასთანავე ძალიან რომანტიკული ადამიანია:
„იტალია მუდამ იქნება ჩემსგულში. ქვეყანა,რომელმაც უამრავი რამ მასწავლა. ზღაპრულ სილამაზესთან ერთად,საუკეთესო ადამიანები დაუდიდესი სიყვარული მაჩუქა.
ჩემი და მარკოს გაცნობა შემთხვევით მოხდა. მშვიდი,გაწონასწორებული და ძალიან თბილი ადამიანია. ჰყავსტიპური იტალიური ოჯახი, არაჩვეულებრივი ორი ქალიშვილი და ერთი ყველაზე უსაყვარლესი შვილიშვილი.
პროფესიით პროგრამისტია,თუმცა საკმაოდ რომანტიკული ადამიანია. ჩემამდე საქართველოს შესახებ არაფერი იცოდა, მერე კი სიამოვნებით ეცნობოდა ჩემი ქვეყნის ისტორიას,კულტურას, ენას და დამწერლობას.
წერა-კითხვა უკვე იცის, ოღონდ ჯერჯერობით ყველა სიტყვის მნიშვნელობა არ ესმის და არ ტოვებს არცერთ შემთხვევას,რომ არ მითხრას ,,ურთულესი ენა გაქვთ“,-ო.
არცერთ შანს არ უშვებსხელიდან საქართველოს პოპულარიზაციისთვის, ყველას ეპატიჟება და დიდი იმედი გვაქვს, რომ მომავალ წელს მთელი ჩვენი იტალიური ოჯახი და მეგობრებიესტუმრება საქართველოს.
იმედი გვაქვს,რომ შევძლებთ საქართველოში კიდევ ერთხელ ყველაფრის თავიდან დაწყებას.“
ასევე იხილეთ, ნანა მახარაძის ვიდეო სადაც 9 აპრილის სიმბოლოდ ქცეულ ფოტოზე და ამ ტრაგიკულ დღეზე საუბრობს:
