23 ივლისს Starring Georgia-ს ფარგლებში საქართველოს Justin Timberlake ეწვევა-აღნიშნულ ინფორმაციას Black Sea Arena ავრცელებს. კონცერტი თბილისში, დინამო არენაზე გაიმართება. ბილეთების გაყიდვა 8 აპრილის 12:00 საათიდან TKT.GE-ზე დაიწყება. ფასს რაც შეეხება, ბილეთის საწყისი ღირებულება 125 ლარია, VIP ბილეთების ფასი კი 1400 ლარს შეადგენს.
ჯასტინ ტიმბერლეიკი მრავალმხრივი შემსრულებელი, მუსიკოსი, პროდიუსერი, კომპოზიტორი და მსახიობია. მსოფლიოს მასშტაბით არტისტის 54 მილიონზე მეტი ალბომი და 63 მილიონი სიმღერაა გაყიდული.
მომღერლის მუსიკალური კარიერა 30 წლის წინ დაიწყო, მაშინ, როდესაც ის ცნობილი ბოიბენდის, NSYNC-ის სოლისტი გახდა. ამ ბენდთან ერთად, მან 70 მილიონი ჩანაწერი გაყიდა. არტისტი პოპის, დენსისა და R&B-ის ჟანრებში GRAMMY-ს ათი ჯილდოს მფლობელია, ჯეი-ზისთან კოლაბორაციის შედეგად კი, არტისტმა მსოფლიოში 23 მილიარდზე მეტი აუდიო და ვიდეოსტრიმი მოიპოვა. გარდა ამისა, მას ეკუთვნის Emmy-ს ოთხი ჯილდო მუსიკალურ-იუმორისტულ შოუში – Saturday Night Live შთამბეჭდავი გამოსვლებისთვის.
ამასთანავე, ჯასტინ ტიმბერლეიკს გახმოვანებული აქვს DreamWorks-ის ანიმაციური მიუზიკლი TROLLS-ს. მისი ჰიტად ქცეული სიმღერა Can’t Stop the Feeling კი 2017 წელს გამოსული Trolls Holiday-იდან, „ოსკარზე“ წლის „საუკეთესო ორიგინალური სიმღერის“ ნომინაციაში იყო წარდგენილი. არტისტმა 2024 წლის 15 მარტს გამოუშვა მეექვსე სტუდიური ალბომი Everything I Thought It Was, რომელშიც 18 ახალი სიმღერა შედის, მათ შორის ისეთი ჰიტები, როგორებიცაა: Selfish და No Angels.
როგორც მსახიობი, ჯასტინ ტიმბერლეიკი მონაწილეობდა არაერთ ცნობილ ფილმში, მათ შორისაა: „The Social Network“, „Friends with Benefits“ და „In Time“.
პირადი ცხოვრება და გახმაურებული რომანები
მუსიკალური კარიერის გარდა, ჯასტინ ტიმბერლეიკი ცნობილია თავისი სკანდალური პირადი ცხოვრებითაც. მისი რომანები არაერთხელ გამხდარა საჯარო განხილვის საგანი. ურთიერთობა ჰოლივუდის ვარსკვლავებთან თუ ცნობილ მომღერლებთან მუსიკოსის ცხოვრებას მეტად საინტერესოს ხდის.
რომანი ბრიტნისთან:
1999-2002 წლებში მსახიობს ურთიერთობა ჰქონდა ბრიტნი სპირსისთან. წყვილის რომანი მაშინ დაიწყო, როცა ბრიტნი 17-ის, ჯასტინი კი 18 წლის იყო. მათი დაშორების მიზეზი, როგორც ცნობილია, პოპის დედოფლის ღალატი გახდა.
ურთიერთობა კამერონ დიაზთან
2003 წლიდან ჯასტინს კამერონ დიაზთან ჰქონდა გახმაურებული რომანი. როგორც ცნობილია, წყვილის ურთიერთობა 2006 წელს დასრულდა, თუმცა, ამის მიუხედეავად, ისინი კვლავ ინარჩუნებენ მეგობრულ ურთიერთობას, წყვილი 2007 წელს ერთად წარსდგა ანიმაციური ფილმის „შრეკი“ პრემიერაზე, 2011 წელს კი ფილმში „ცუდი მასწავლებელი“ მსახიობებმა ერთად იმუშავეს.
ქორწინება ჯესიკასთან-2012 წელი
ჯასტინი ტიმბერლეიკი 2012 წელს დაქორწინდა მსახიობ ჯესიკა ბილზე. წყვილს ორი შვილი ჰყავს, ვაჟები- 9 წლის საილასი და 4 წლის ფინესი. მიუხედავად იმისა, რომ ამ პერიოდის მანძილზე არაერთხელ დაიწერა ტიმბერლეიკის ღალატისა და წყვილის შესაძლო განქორწინების შესახებ, ჯესიკა და ჯასტინი დღემდე ერთად არიან და მაქსიმალურად ცდილობენ, რომ მათი შვილები ნაკლებად გახდნენ საზოგადოებისა და პაპარაცების განხილვის საგანი:
ჩვენ მაქსიმალურად ვცდილობთ, რომ რაც შეიძლება დიდხანს შევუნარჩუნოთ ჩვენს შვილებს ბავშვობა და ამასთანავე, გვსურს, რომ საზოგადოება არ მოექცეს მათ განსხვავებულად მხოლოდ ჩვენი საქმიანობის გამო”- აღნიშნა Mirrors-ის შემსრულებელმა.
23 ივლისს „დინამო არენაზე“ შეკრებილ ათიათასობით მელომანს შესაძლებლობა ექნება მოუსმინოს 44 წლის მსოფლიო ვარსკვლავის ჰიტებს .
ცნობისთვის, ჯასტინ ტიმბერლეიკი 2025 წლის მსოფლიო ტურნეს 4 მაისს მექსიკიდან იწყებს და 20 ივლისს საფრანგეთში დაასრულებს. თბილისში 23 ივლისს კონცერტის გამართვის შესახებ ინფორმაცია მომღერლის ვებგვერდზე ამ დროისთვის არ არის განთავსებული.
